ਮੁੱਲਾਂਪੁਰ 'ਚ ਭਾਂਡਿਆਂ ਦੇ ਸ਼ੋ ਰੂਮ 'ਚ ਲੱਗੀ ਅੱਗ, ਜਾਨੀ ਨੁਕਸਾਨ ਤੋਂ ਬਚਾਅ

21/03/2025 | Public Times Bureau | Panjab

ਸ਼ਹਿਰ ਦੇ ਰਾਏਕੋਟ ਰੋਡ 'ਤੇ ਸਥਿਤ ਭਾਂਡਿਆਂ ਦੇ ਇੱਕ ਮਸ਼ਹੂਰ ਸੋ ਰੂਮ ਦੀ ਦੂਜੀ ਮੰਜ਼ਿਲ 'ਤੇ ਅਚਾਨਕ ਅੱਗ ਲੱਗ ਜਾਣ ਕਾਰਨ ਹੋਰਨਾਂ ਦੁਕਾਨਦਾਰਾਂ ਅੰਦਰ ਵੀ ਹਫੜਾ ਦਫੜੀ ਮੱਚ ਗਈ। ਜਿੰਦਲ ਬਰਤਨ ਦੇ ਮਾਲਕ ਰਾਮ ਨਿਵਾਸ ਨੇ ਦੱਸਿਆ ਕਿ ਸ਼ਹਿਰ ਅੰਦਰ ਬਿਜਲੀ ਗਈ ਹੋਣ ਕਾਰਨ ਦੁਕਾਨ ਦੀ ਉਪਰਲੀ ਮੰਜ਼ਿਲ ਉੱਤੇ ਜਰਨੇਟਰ ਚੱਲ ਰਿਹਾ ਸੀ।

ਜਦੋਂ ਇੱਕਦਮ ਲਾਈਟਾਂ ਜਗਣ ਬੁਝਣ ਲੱਗੀਆਂ ਤਾਂ ਉਨ੍ਹਾਂ ਆਪਣੇ ਇੱਕ ਮੁਲਾਜ਼ਮ ਨੂੰ ਜਨਰੇਟਰ ਦੇਖਣ ਲਈ ਭੇਜਿਆ ਜਦੋਂ ਉਸ ਨੇ ਉਪਰ ਜਾ ਕੇ ਦੇਖਿਆ ਤਾਂ ਜਨਰੇਟਰ ਕੋਲ ਪਏ ਗੱਤੇ ਦੇ ਡੱਬਿਆਂ ਨੂੰ ਅੱਗ ਲੱਗ ਚੁੱਕੀ ਸੀ ਜਿਹੜੀ ਕਿ ਹੌਲੀ ਹੌਲੀ ਜ਼ਿਆਦਾ ਭੜਕ ਉੱਠੀ।ਇਸਦੀ ਜਾਣਕਾਰੀ ਫਾਇਰ ਬ੍ਰਿਗੇਡ ਦਫਤਰ ਨੂੰ ਦਿੱਤੀ ਗਈ ਤਾਂ ਮੌਕੇ ਉੱਤੇ ਤਿੰਨ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਨੇ ਆ ਕੇ ਅੱਗ ਉੱਤੇ ਕਾਬੂ ਪਾ ਲਿਆ।

ਉਹਨਾਂ ਦੱਸਿਆ ਕਿ ਅੱਗ ਜਨਰੇਟਰ ਤੋਂ ਸ਼ਾਰਟ ਸਰਕਟ ਕਾਰਨ ਭੜਕੀ। ਰਾਮ ਨਿਵਾਸ ਨੇ ਦੱਸਿਆ ਕਿ ਉਹ ਨੁਕਸਾਨ ਬਾਰੇ ਅਜੇ ਕੁਝ ਨਹੀਂ ਦੱਸ ਸਕਦੇ ਕਿਉਂਕਿ ਸੜਿਆ ਹੋਇਆ ਸਮਾਨ ਦੇਖਣ ਉਪਰੰਤ ਹੀ ਕੁੱਝ ਕਿਹਾ ਜਾ ਸਕਦਾ ਹੈ।ਪਰ ਫਿਰ ਵੀ ਵੱਡਾ ਨੁਕਸਾਨ ਹੋਣ ਤੋਂ ਬਚਾਅ ਰਿਹਾ। ਜੇਕਰ ਅੱਗ ਬੁਝਾਉਣ ਵਾਲੀਆਂ ਗੱਡੀਆਂ ਸਮੇਂ ਸਿਰ ਨਾ ਪੁੱਜਦੀਆਂ ਤਾਂ ਵੱਡਾ ਹਾਦਸਾ ਵਾਪਰ ਸਕਦਾ ਸੀ।

Fire Breaks Out In Utensil Showroom In Mullanpur No Loss Of Life