ਜਲੰਧਰ 'ਚ Hit & Run ਦਾ ਮਾਮਲਾ, ਸਕੂਟਰ ਨੂੰ ਟੱਕਰ ਮਾਰ ਕੇ ਕਾਰ ਸਵਾਰ ਹੋਇਆ ਫਰਾਰ, ਬਜ਼ੁਰਗ ਜੋੜਾ ਗੰਭੀਰ ਜ਼ਖ਼ਮੀ

24/03/2025 | Public Times Bureau | Panjab

ਜਲੰਧਰ-ਪਠਾਨਕੋਟ ਨੈਸ਼ਨਲ ਹਾਈਵੇ 'ਤੇ ਸਥਿਤ ਅੱਡਾ ਕਿਸ਼ਨਗੜ੍ਹ ਦੇ ਸ਼ਮਸ਼ਾਨਘਾਟ ਸਾਹਮਣੇ ਸਕੂਟਰ ਸਵਾਰ ਬਜ਼ੁਰਗ ਜੋੜੇ ਨੂੰ ਤੇਜ਼ ਰਫਤਾਰ ਕਾਰ ਨੇ ਜ਼ੋਰਦਾਰ ਟੱਕਰ ਮਾਰੀ ਜਿਸ ਵਿਚ ਬਜ਼ੁਰਗ ਜੋੜਾ ਗੰਭੀਰ ਜ਼ਖਮੀ ਹੋ ਗਿਆ। 108 ਐਂਬੂਲੈਂਸ ਰਾਹੀਂ ਦੋਵਾਂ ਸਿਵਲ ਹਸਪਤਾਲ ਕਾਲਾ ਬੱਕਰਾ ਵਿਖੇ ਦਾਖ਼ਲ ਕਰਵਾਇਆ ਗਿਆ।ਜਾਣਕਾਰੀ ਅਨੁਸਾਰ ਸੇਵਾਮੁਕਤ ਅਧਿਆਪਕ ਗੁਰਮੇਲ ਸਿੰਘ 70 ਸਾਲ ਪੁੱਤਰ ਮਹਿੰਗਾ ਸਿੰਘ ਵਾਸੀ ਬਿਆਸ ਪਿੰਡ ਅਤੇ ਪਿੱਛੇ ਬੈਠੀ ਉਸ ਦੀ ਪਤਨੀ ਸੇਵਾਮੁਕਤ ਅਧਿਆਪਕਾ ਕੁਲਦੀਪ ਕੌਰ 68 ਸਾਲ ਆਪਣੇ ਚੇਤਕ ਸਕੂਟਰ ਨੰਬਰ ਪੀਬੀ-08- ਏਯੂ 2259 'ਤੇ ਦੁਪਹਿਰ ਡੇਢ ਵਜੇ ਬਿਆਸ ਪਿੰਡ ਤੋਂ ਕਿਸ਼ਨਗੜ੍ਹ ਵੱਲ ਨੂੰ ਆ ਰਹੇ ਸਨ। ਅੱਡੇ ਨੇੜੇ ਪਿੱਛੋਂ ਮੁਕੇਰੀਆਂ ਤੋਂ ਆ ਰਹੀ ਤੇਜ਼ ਰਫਤਾਰ ਬਰੀਜ਼ਾ ਕਾਰ ਨੰਬਰ ਪੀਬੀ -07 ਬੀਐਸ - 0714 ਨੇ ਸਕੂਟਰ ਨੂੰ ਟੱਕਰ ਮਾਰੀ ਜਿਸ ਵਿਚ ਬਜ਼ੁਰਗ ਜੋੜਾ ਗੰਭੀਰ ਜ਼ਖ਼ਮੀ ਹੋ ਗਇਾ। ਕਾਰ ਸਵਾਰ ਮੌਕੇ ਤੋਂ ਫਰਾਰ ਹੋ ਗਿਆ। ਘਟਨਾ ਸਤਾਨ ਨੇੜੇ ਰੇਹੜੀ 'ਤੇ ਸ਼ਿਕੰਜਵੀ ਪੀ ਰਹੇ ਰਾਹਗੀਰਾਂ ਵੱਲੋਂ ਪਿੱਛਾ ਕਰ ਕੇ ਕੁਝ ਦੂਰੀ 'ਤੇ ਕਾਰ ਨੂੰ ਘੇਰਿਆ ਗਿਆ।

ਮੌਕੇ 'ਤੇ ਕਿਸ਼ਨਗੜ੍ਹ ਪੁਲਿਸ ਚੌਕੀ ਦੇ ਮੁਲਾਜ਼ਮ ਵੀ ਪਹੁੰਚ ਗਏ। ਰਾਹਗੀਰਾਂ ਨੇ ਦੱਸਿਆ ਕਿ ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਕਾਰ ਦਾ ਅਗਲਾ ਟਾਇਰ ਫਟ ਗਿਆ ਜਿਸ ਕਾਰਨ ਸਿਰਫ ਅੱਧਾ ਕੁ ਕਿਲੋਮੀਟਰ ਤਕ ਹੀ ਜਾ ਸਕੀ ਤੇ ਰਾਹਗੀਰਾਂ ਨੇ ਉਸ ਨੂੰ ਘੇਰ ਲਿਆ। ਗੰਭੀਰ ਜ਼ਖ਼ਮੀ ਬਜ਼ੁਰਗ ਜੋੜੇ ਨੂੰ 108 ਐਂਬੂਲੈਂਸ ਰਾਹੀਂ ਸਿਵਲ ਹਸਪਤਾਲ ਕਾਲਾ ਬੱਕਰਾ ਵਿਖੇ ਇਲਾਜ ਲਈ ਲਿਆਂਦਾ। ਜਿਨ੍ਹਾਂ ਦੇ ਸਿਰ ਅਤੇ ਲੱਕ ਵਿਚ ਗੰਭੀਰ ਸੱਟਾਂ ਲੱਗੀਆਂ ਹਨ। ਸਿਵਿਲ ਹਸਪਤਾਲ ਵੱਲੋਂ ਦੋਵਾਂ ਨੂੰ ਜਲੰਧਰ ਰੈਫਰ ਕਰ ਦਿੱਤਾ ਗਿਆ ਪਰ ਪਿੰਡ ਵਾਲੇ ਉਨ੍ਹਾਂ ਨੂੰ ਇਲਾਜ ਲਈ ਨਿੱਜੀ ਹਸਪਤਾਲ ਲੈ ਗਏ। ਮੌਕੇ 'ਤੇ ਪਹੁੰਚੀ ਪੁਲਿਸ ਕਾਰ ਤੇ ਹਾਦਸਾਗ੍ਰਸਤ ਚੇਤਕ ਸਕੂਟਰ ਨੂੰ ਚੌਕੀ ਕਿਸ਼ਨਗੜ੍ਹ ਲੈ ਗਈ। ਹਾਦਸੇ ਸਬੰਧੀ ਪੁਲਿਸ ਵੱਲੋਂ ਜਾਂਚ ਕੀਤੀ ਜਾ ਰਹੀ ਹੈ।

Hit Run Case In Jalandhar Car Driver Hits Scooter And Flees Elderly Couple Seriously Injured