Mid Day ਮੀਲ ’ਚ ਘਪਲਾ, ਸੈਂਟਰ ਹੈੱਡ ਟੀਚਰ ਨੂੰ ਨੋਟਿਸ; 49 ਵਿਦਿਆਰਥੀਆਂ ਦੀ ਫਰਜ਼ੀ ਹਾਜ਼ਰੀ ਪਾ ਕੇ ਕੀਤਾ ਘਪਲਾ

05/07/2025 | Public Times Bureau | Panjab

ਜ਼ਿਲ੍ਹੇ ਦੇ ਪਿੰਡ ਲੱਖੋਕੇ ਬਹਿਰਾਮ ਦੇ ਸਰਕਾਰੀ ਪ੍ਰਾਇਮਰੀ ਸਕੂਲ ’ਚ ਮਿੱਡ ਡੇ ਮੀਲ ’ਚ ਵਿਦਿਆਰਥੀਆਂ ਦੀ ਫਰਜ਼ੀ ਹਾਜ਼ਰੀ ਦਰਜ ਕਰ ਕੇ 322.22 ਰੁਪਏ ਦਾ ਘਪਲਾ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਹੀ ਨਹੀਂ, 49 ਵਿਦਿਆਰਥੀਆਂ ਦੀ ਫਰਜ਼ੀ ਹਾਜ਼ਰੀ ਪਾ ਕੇ ਚਾਰ ਕਿੱਲੋ 900 ਗ੍ਰਾਮ ਕਣਕ ਦੀ ਹੇਰਾਫੇਰੀ ਵੀ ਕੀਤੀ ਗਈ ਹੈ। ਇਹ ਬੇਨਿਯਮੀਆਂ ਦੋ ਜੁਲਾਈ ਨੂੰ ਬੀਪੀਈਓ ਵਲੋਂ ਕੀਤੀ ਗਈ ਚੈਕਿੰਗ ’ਚ ਸਾਹਮਣੇ ਆਈ ਹੈ।

ਚੈਕਿੰਗ ਦੌਰਾਨ ਸਕੂਲ ’ਚ ਹਾਜ਼ਰ ਵਿਦਿਆਰਥੀਆਂ ਦੀ ਗਿਣਤੀ 32 ਪਾਈ ਗਈ, ਜਦਕਿ ਹਾਜ਼ਰੀ ਰਜਿਸਟਰ ’ਚ 78 ਵਿਦਿਆਰਥੀਆਂ ਦੀ ਹਾਜ਼ਰੀ ਦਰਸਾਈ ਗਈ ਸੀ। ਹਾਲਾਂਕਿ ਮਿੱਡ ਡੇ ਮੀਲ ਐਪ ’ਤੇ 81 ਵਿਦਿਆਰਥੀਆਂ ਦੀ ਹਾਜ਼ਰੀ ਦਰਜ ਕੀਤੀ ਗਈ ਸੀ। ਇਸਦੇ ਬਾਅਦ ਬੀਪੀਈਓ ਨੇ ਸਕੂਲ ਦੀਆਂ ਸਾਰੀਆਂ ਕਲਾਸਾਂ ਦੇ ਇੰਚਾਰਜਾਂ ਤੋਂ ਰਿਪੋਰਟ ਮੰਗੀ, ਜਿਸਦੇ ਸਿੱਟੇ ਵਜੋਂ ਸੈਂਟਰ ਹੈੱਡ ਟੀਚਰ (ਸੀਐੱਚਟੀ) ਤੇ ਸਬੰਧਤ ਸਟਾਫ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਗਿਆ ਹੈ। ਸਾਰਿਆਂ ਨੂੰ ਸੱਤ ਜੁਲਾਈ ਨੂੰ ਬੀਪੀਈਓ ਦਫਤਰ ’ਚ ਹਾਜ਼ਰ ਹੋ ਕੇ ਆਪਣਾ ਸਪਸ਼ਟੀਕਰਨ ਦੇਣਾ ਪਵੇਗਾ।

ਬੀਪੀਈਓ ਜਸਵਿੰਦਰ ਸਿੰਘ ਨੇ ਕਿਹਾ ਕਿ ਇਹ ਚੈਕਿੰਗ ਅਚਾਨਕ ਕੀਤੀ ਗਈ ਸੀ, ਜਿਸ ਵਿਚ ਪਾਇਆ ਗਿਆ ਕਿ ਅਧਿਆਪਕਾਂ ਦੀ ਹਾਜ਼ਰੀ ਦੇ ਬਾਵਜੂਦ ਹਾਜ਼ਰੀ ਰਜਿਸਟਰ ’ਚ ਕਈ ਬਾਕਸ ਖਾਲੀ ਛੱਡੇ ਗਏ ਸਨ। ਉਨ੍ਹਾਂ ਨੇ ਕਿਹਾ ਕਿ ਹਾਜ਼ਰੀ ਰਜਿਸਟਰ ਦੇ ਮੁਤਾਬਕ ਸੀਐੱਚਟੀ ਸਵੇਰੇ ਅੱਠ ਤੋਂ ਦੁਪਹਿਰ ਦੋ ਵਜੇ ਤੱਕ ਸਕੂਲ ’ਚ ਹਾਜ਼ਰ ਸਨ। ਅਜਿਹੇ ’ਚ ਉਨ੍ਹਾਂ ਦੀ ਦੇਖਰੇਖ ’ਚ ਇਸ ਤਰ੍ਹਾਂ ਦੀ ਗੜਬੜੀ ਹੋਣਾ ਵੱਡਾ ਸਵਾਲ ਹੈ। ਇਸ ਸੰਦਰਭ ’ਚ ਸੀਐੱਚਟੀ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਉਨ੍ਹਾਂ ਦਾ ਫੋਨ ਸਵਿਚ ਆਫ ਸੀ।

Mid day meal scam notice to center head teacher scam committed by giving fake attendance of 49 students