ਸਾਈਬਰ ਠੱਗਾਂ ਨੇ ਲੁਧਿਆਣਾ ਵਾਸੀ ਨੂੰ ਬਣਾਇਆ ਨਿਸ਼ਾਨਾ, ਮੋਟਾ ਮੁਨਾਫ਼ਾ ਦਵਾਉਣ ਦਾ ਝਾਂਸਾ ਦੇ ਕੇ ਠੱਗੇ 16 ਲੱਖ

11/02/2025 | Public Times Bureau | Ludhiana

ਪੀਏਯੂ ਕੈਂਪਸ ਦੇ ਰਹਿਣ ਵਾਲੇ ਵਿਅਕਤੀ ਨੂੰ ਨਿਸ਼ਾਨਾ ਬਣਾਉਂਦਿਆਂ ਸਾਈਬਰ ਠੱਗਾਂ ਨੇ ਉਸ ਕੋਲੋਂ 16 ਲੱਖ 8 ਹਜਾਰ ਰੁਪਏ ਹਾਸਿਲ ਕਰ ਲਏ । ਮੁਲਜਮਾਂ ਨੇ ਮੋਟਾ ਮੁਨਾਫਾ ਦਵਾਉਣ ਦਾ ਝਾਂਸਾ ਦੇ ਕੇ ਉਸਨੂੰ ਧੋਖਾਧੜੀ ਦਾ ਸ਼ਿਕਾਰ ਬਣਾਇਆ ਸੀ। ਇਸ ਮਾਮਲੇ ਵਿੱਚ ਪੜਤਾਲ ਤੋਂ ਬਾਅਦ ਥਾਣਾ ਸਾਈਬਰ ਕ੍ਰਾਈਮ ਦੀ ਟੀਮ ਨੇ ਪੀਏਯੂ ਕੈਂਪਸ ਦੇ ਵਾਸੀ ਇਰਵਿਨਪ੍ਰੀਤ ਸਿੰਘ ਦੀ ਸ਼ਿਕਾਇਤ ਤੇ ਅਣਪਛਾਤੇ ਠੱਗਾਂ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ। ਪੁਲਿਸ ਨੂੰ ਸ਼ਿਕਾਇਤ ਦਿੰਦਿਆਂ ਇਰਵਿਨਪ੍ਰੀਤ ਸਿੰਘ ਨੇ ਦੱਸਿਆ ਕਿ ਦਸੰਬਰ 2024 ਵਿੱਚ ਉਸਨੇ ਆਪਣੇ ਇੰਸਟਾਗਰਾਮ ਤੇ ਇੱਕ ਐਡਵਰਟਾਈਜਮੈਂਟ ਦੇਖੀ । ਜਿਵੇਂ ਹੀ ਉਸਨੇ ਐਡ ਤੇ ਕਲਿੱਕ ਕੀਤਾ ਤਾਂ ਵਟਸਐਪ ਓਪਨ ਹੋ ਗਿਆ ।

ਅਣਪਛਾਤੇ ਵਿਅਕਤੀ ਵੱਲੋਂ ਉਸਨੂੰ ਵਟਸਐਪ ਗਰੁੱਪ ਵਿੱਚ ਸ਼ਾਮਿਲ ਕਰ ਲਿਆ ਗਿਆ । ਗਰੁੱਪ ਵਿੱਚ ਐਂਟਰ ਹੁੰਦੇ ਹੀ ਠੱਗਾਂ ਨੇ ਜਾਲ ਵਿਛਾਉਣਾ ਸ਼ੁਰੂ ਕਰ ਦਿੱਤਾ । ਉਨ੍ਹਾਂ ਨੇ ਲੁਭਾਵਣੇ ਦਾਅਵੇ ਕਰਦਿਆਂ ਇਹ ਕਿਹਾ ਕਿ ਸਟੋਕ ਟ੍ਰੇਡਿੰਗ ਦੇ ਜ਼ਰੀਏ ਉਸਨੂੰ ਮੋਟਾ ਮੁਨਾਫਾ ਹੋਵੇਗਾ। ਠੱਗਾਂ ਦੀਆਂ ਗੱਲਾਂ ਵਿੱਚ ਆਏ ਇਰਵਿਨਪ੍ਰੀਤ ਸਿੰਘ ਨੇ 10 ਜਨਵਰੀ ਤੋਂ ਲੈ ਕੇ 28 ਜਨਵਰੀ ਤੱਕ 16 ਲੱਖ 8 ਹਜਾਰ ਰੁਪਏ ਇਨਵੈਸਟ ਕਰ ਦਿੱਤੇ । ਇਰਵਿਨ ਪ੍ਰੀਤ ਸਿੰਘ ਨੂੰ ਮੁਨਾਫਾ ਤਾਂ ਕੀ ਮਿਲਣਾ ਸੀ ਸ਼ਾਤਰ ਠੱਗ ਉਸਦੇ 16 ਲੱਖ 8 ਹਜਾਰ ਰੁਪਏ ਵੀ ਲੈ ਗਏ । ਇਸ ਮਾਮਲੇ ਸਬੰਧੀ ਉਸਨੇ ਸਾਈਬਰ ਕ੍ਰਾਈਮ ਦੀ ਟੀਮ ਨੂੰ ਇੱਕ ਲਿਖਿਤ ਸ਼ਿਕਾਇਤ ਦਿੱਤੀ । ਪੜਤਾਲ ਤੋਂ ਬਾਅਦ ਪੁਲਿਸ ਨੇ ਅਣਪਛਾਤੇ ਠੱਗਾਂ ਦੇ ਖਿਲਾਫ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

Cyber thugs targeted the residents of ludhiana cheated 16 lakh on the pretense of making huge profits