ਅਮਰੀਕਾ 'ਚ ਭਾਰਤੀ ਮੂਲ ਦੇ CEO 'ਤੇ ਲੱਗਾ 4200 ਕਰੋੜ ਦੀ ਧੋਖਾਧੜੀ ਦਾ ਦੋਸ਼, ਪੜ੍ਹੋ ਕੀ ਹੈ ਪੂਰਾ ਮਾਮਲਾ?

01/11/2025 | Public Times Bureau | America

ਅਮਰੀਕੀ ਨਿਵੇਸ਼ ਫਰਮ ਬਲੈਕਰੌਕ ਕਥਿਤ ਤੌਰ ‘ਤੇ 500 ਮਿਲੀਅਨ ਡਾਲਰ (ਲਗਭਗ 4,200 ਕਰੋੜ ਰੁਪਏ) ਤੋਂ ਵੱਧ ਦੀ ਧੋਖਾਧੜੀ ਦਾ ਸ਼ਿਕਾਰ ਹੋਈ ਹੈ। ਕੰਪਨੀ ਨੇ ਭਾਰਤੀ ਮੂਲ ਦੇ ਸੀਈਓ ਬੰਕਿਮ ਬ੍ਰਹਮਭੱਟ ‘ਤੇ ਇਹ ਧੋਖਾਧੜੀ ਕਰਨ ਦਾ ਦੋਸ਼ ਲਗਾਇਆ ਹੈ। ਬਲੈਕਰੌਕ ਦਾ ਦੋਸ਼ ਹੈ ਕਿ ਬ੍ਰਹਮਭੱਟ ਦੀ ਟੈਲੀਕਾਮ ਕੰਪਨੀ ਨੇ ਜਾਅਲੀ ਖਾਤਿਆਂ ਦੀ ਵਰਤੋਂ ਕਰਕੇ ਇਹ ਘਪਲਾ ਕੀਤਾ। ਹਾਲਾਂਕਿ, ਬ੍ਰਹਮਭੱਟ ਦੇ ਵਕੀਲ ਨੇ ਸਾਰੇ ਦੋਸ਼ਾਂ ਨੂੰ ਰੱਦ ਕੀਤਾ ਹੈ।

ਬਲੈਕਰੌਕ ਦੀ ਨਿੱਜੀ ਕ੍ਰੈਡਿਟ ਕਾਰਡ ਨਿਵੇਸ਼ ਕੰਪਨੀ, HPS ਨੇ ਸਤੰਬਰ 2020 ਵਿੱਚ ਬ੍ਰਹਮਭੱਟ ਦੀ ਕੰਪਨੀ ਨਾਲ ਸੌਦਾ ਕੀਤਾ ਸੀ। 2021 ਵਿੱਚ HPS ਨੇ 385 ਮਿਲੀਅਨ ਡਾਲਰ ਦਾ ਨਿਵੇਸ਼ ਕੀਤਾ, ਜੋ ਅਗਸਤ 2024 ਵਿੱਚ 430 ਮਿਲੀਅਨ ਡਾਲਰ ਤੱਕ ਵਧਾ ਦਿੱਤਾ ਗਿਆ।

ਜੁਲਾਈ 2025 ਵਿੱਚ, HPS ਨੂੰ ਨਿਵੇਸ਼ ਨਾਲ ਸਬੰਧਤ ਕੁਝ ਜਾਅਲੀ ਈਮੇਲ ਪਤੇ ਮਿਲੇ। ਬ੍ਰਹਮਭੱਟ ਨੇ ਕੰਪਨੀ ਨੂੰ ਵਿਸ਼ਵਾਸ ਦਿਲਾਇਆ, ਪਰ ਕੰਪਨੀ ਦਾ ਦੋਸ਼ ਹੈ ਕਿ ਇਸ ਘਟਨਾ ਤੋਂ ਬਾਅਦ ਬ੍ਰਹਮਭੱਟ ਨੇ ਫੋਨ ਕਾਲਾਂ ਦਾ ਜਵਾਬ ਦੇਣਾ ਬੰਦ ਕਰ ਦਿੱਤਾ। HPS ਅਧਿਕਾਰੀਆਂ ਨੇ ਜਦੋਂ ਬ੍ਰਹਮਭੱਟ ਦੀ ਕੰਪਨੀ ਦਾ ਦੌਰਾ ਕੀਤਾ, ਤਾਂ ਉਹ ਬੰਦ ਹੋ ਚੁੱਕੀ ਸੀ। ਪੁੱਛਗਿੱਛ ਤੋਂ ਪਤਾ ਲੱਗਾ ਕਿ ਬ੍ਰਹਮਭੱਟ ਦੀ ਕੰਪਨੀ ਦੇਵਾਲੀਆ ਹੋ ਚੁੱਕੀ ਸੀ।

ਵਾਲ ਸਟਰੀਟ ਜਰਨਲ ਦੇ ਅਨੁਸਾਰ, ਗਾਰਡਨ ਸਿਟੀ ਵਿੱਚ ਬ੍ਰਹਮਭੱਟ ਦੇ ਘਰ ਦਾ ਦੌਰਾ ਕਰਨ 'ਤੇ ਉਹ ਘਰ ‘ਚ ਮੌਜੂਦ ਨਹੀਂ ਸੀ। HPS ਦਾ ਕਹਿਣਾ ਹੈ ਕਿ ਬ੍ਰਹਮਭੱਟ ਭਾਰਤ ਵਿੱਚ ਹੈ। ਅਗਸਤ 2025 ਵਿੱਚ ਕੰਪਨੀ ਨੇ ਬ੍ਰਹਮਭੱਟ ਵਿਰੁੱਧ ਮੁਕੱਦਮਾ ਦਾਇਰ ਕੀਤਾ। ਪੁਲਿਸ ਜਾਂਚ ਵਿੱਚ ਇਹ ਸਾਹਮਣੇ ਆਇਆ ਕਿ ਕੰਪਨੀ ਵੱਲੋਂ ਭੇਜੇ ਗਏ ਸਾਰੇ ਈਮੇਲ ਧੋਖਾਧੜੀ ਵਾਲੇ ਸਨ।

Indian origin ceo in america accused of fraud worth rs 4200 crore read what is the whole matter