ਨੂੰਹ ਨੂੰ ਘਰੋਂ ਕੱਢਿਆ ਬਾਹਰ, ਜ਼ਮੀਨ ਤੇ ਕਤਲ ਕੇਸ, ਚ ਗਵਾਹੀ ਵਾਪਸ ਲੈਣ ਲਈ ਪਾਇਆ ਜਾ ਰਿਹਾ ਦਬਾਅ

18/02/2023 | Public Times Bureau | Ludhiana

ਲੁਧਿਆਣਾ ਚ ਦੇਰ ਰਾਤ ਸਹੁਰੇ ਵਾਲਿਆਂ ਨੇ ਨੂੰਹ ਨੂੰ ਘਰੋਂ ਕੱਢ ਦਿੱਤਾ। ਸਹੁਰੇ ਪੱਖ ਅਤੇ ਨੂੰਹ ਦੇ ਜ਼ਮੀਨੀ ਵਿਵਾਦ ਅਤੇ ਕਤਲ ਦਾ ਕੇਸ ਅਦਾਲਤ ਵਿੱਚ ਚੱਲ ਰਿਹਾ ਹੈ। ਪੀੜਤ ਔਰਤ ਰੂਪਦੀਪ ਨੇ ਦੱਸਿਆ ਕਿ ਉਸ ਦੇ ਪਤੀ ਗਗਨਦੀਪ ਦਾ 11 ਅਕਤੂਬਰ 2021 ਨੂੰ ਉਸ ਦੇ ਜੇਠ ਨੇ ਕਤਲ ਕਰ ਦਿੱਤਾ ਸੀ। ਰੁਪਦੀਪ ਨੇ ਦੱਸਿਆ ਕਿ ਉਸ ਦੇ ਸਹੁਰੇ ਉਸ ਤੇ ਕਤਲ ਦੇ ਮਾਮਲੇ ਚ ਗਵਾਹੀ ਵਾਪਿਸ ਲੈਣ ਲਈ ਦਬਾਅ ਪਾ ਰਹੇ ਹਨ। ਉਹ ਸ਼ੁੱਕਰਵਾਰ ਨੂੰ ਇਸ ਮਾਮਲੇ ਦੇ ਸਿਲਸਿਲੇ ਚ ਵਕੀਲ ਨੂੰ ਮਿਲਣ ਗਈ ਸੀ। ਸ਼ਾਮ ਨੂੰ ਜਦੋਂ ਉਹ ਵਾਪਸ ਆਈ ਤਾਂ ਉਸ ਦੇ ਸਹੁਰੇ ਨੇ ਉਸ ਨੂੰ ਘਰ ਅੰਦਰ ਵੜਨ ਨਹੀਂ ਦਿੱਤਾ। ਕਰੀਬ ਢਾਈ ਤੋਂ ਤਿੰਨ ਘੰਟੇ ਤੱਕ ਔਰਤ ਨੇ ਘਰ ਦੇ ਬਾਹਰ ਕਾਫੀ ਦਰਵਾਜ਼ਾ ਖੜਕਾਇਆ ਪਰ ਉਸ ਦਾ ਸਹੁਰਾ ਇਸ ਗੱਲ ਤੇ ਅੜਿਆ ਹੋਇਆ ਹੈ ਕਿ ਉਹ ਉਸ ਨੂੰ ਸਵੇਰੇ ਘਰ ਵੜਨ ਦੇਵੇਗਾ। ਰੂਪਦੀਪ ਦੇ ਪਿਤਾ ਅਤੇ ਰਿਸ਼ਤੇਦਾਰ ਵੀ ਮੌਕੇ ਤੇ ਪਹੁੰਚ ਗਏ। ਰੁਪਦੀਪ ਅਨੁਸਾਰ ਉਹ ਇਸ ਘਰ ਵਿੱਚ ਰਹਿੰਦੀ ਹੈ ਅਤੇ ਉਸ ਦਾ ਸਹੁਰਾ ਘਰ ਦਾ ਤਾਲਾ ਤੋੜ ਕੇ ਅੰਦਰ ਦਾਖ਼ਲ ਹੋਇਆ ਹੈ। ਰੂਪਦੀਪ ਅਨੁਸਾਰ ਉਸ ਕੋਲ ਇੱਕ ਵੀਡੀਓ ਵੀ ਹੈ ਜਿਸ ਵਿੱਚ ਸਹੁਰਾ ਘਰ ਵਿੱਚ ਭੰਨ-ਤੋੜ ਕਰਦਾ ਨਜ਼ਰ ਆ ਰਿਹਾ ਹੈ। ਰੁਪਦੀਪ ਅਨੁਸਾਰ ਉਹ ਗਵਾਹੀ ਤੋਂ ਮੁੱਕਰਣ ਵਾਲੀ ਨਹੀਂ ਹੈ, ਉਹ ਅਦਾਲਤ ਵਿੱਚ ਖੁਦ ਸੱਚ ਬਿਆਨ ਕਰੇਗੀ। ਰੂਪਦੀਪ ਦੇ ਪਿਤਾ ਸੁਸ਼ੀਲ ਦੁਸਾਂਝ ਨੇ ਦੱਸਿਆ ਕਿ ਧੀ ਦੇ ਜੇਠ ਪਲਵਿੰਦਰ ਸਿੰਘ ਨੇ ਜ਼ਮੀਨ ਹੜੱਪਣ ਲਈ ਉਸ ਦੇ ਛੋਟੇ ਭਰਾ ਗਗਨਦੀਪ ਦਾ ਕਤਲ ਕਰ ਦਿੱਤਾ। ਸਹੁਰਾ ਪੱਖ ਲਗਾਤਾਰ ਬੇਟੀ ਨੂੰ ਧਮਕੀਆਂ ਦੇ ਰਿਹਾ ਹੈ। ਬੇਟੀ ਨਾਲ ਲੜਾਈ ਵੀ ਹੋਈ ਹੈ। ਸੁਸ਼ੀਲ ਨੇ ਦੱਸਿਆ ਕਿ ਹਰਜੀਤ ਸਿੰਘ ਬਿੰਦਰਾ ਅਤੇ ਕੁਝ ਹੋਰ ਵਿਅਕਤੀ ਜ਼ਬਰਦਸਤੀ ਗੇਟ ਦੇ ਤਾਲੇ ਤੋੜ ਕੇ ਘਰ ਅੰਦਰ ਦਾਖਲ ਹੋਏ। ਜੇਕਰ ਉਸ ਨੂੰ ਅਦਾਲਤ ਦੇ ਘਰ ਅੰਦਰ ਵੜਨ ਦੇ ਹੁਕਮ ਹਨ ਤਾਂ ਉਹ ਤਾਲੇ ਤੋੜ ਕੇ ਅੰਦਰ ਕਿਉਂ ਵੜਿਆ। ਪੁਲਿਸ ਅਧਿਕਾਰੀ ਮੌਕੇ ਤੇ ਪਹੁੰਚ ਗਏ। ਪੁਲੀਸ ਨੇ ਸਹੁਰੇ ਹਰਜੀਤ ਸਿੰਘ ਨਾਲ ਗੱਲ ਕਰਨ ਦੀ ਕਾਫੀ ਕੋਸ਼ਿਸ਼ ਕੀਤੀ ਪਰ ਉਸ ਨੇ ਕਿਸੇ ਅਧਿਕਾਰੀ ਦੀ ਗੱਲ ਨਹੀਂ ਸੁਣੀ। ਸੁਸ਼ੀਲ ਦੁਸਾਂਝ ਨੇ ਕਿਹਾ ਕਿ ਮੇਰੀ ਬੇਟੀ ਅਤੇ ਦੋਹਤੀ ਦੀ ਜਾਨ ਨੂੰ ਖਤਰਾ ਹੈ। ਮੁਲਜ਼ਮ ਖ਼ਿਲਾਫ਼ ਕੇਸ ਵੀ ਦਰਜ ਕਰ ਲਿਆ ਗਿਆ ਹੈ।ਸਹੁਰਾ ਹਰਜੀਤ ਸਿੰਘ ਬਿੰਦਰਾ ਨੇ ਦੱਸਿਆ ਕਿ ਮੇਰੀ ਨੂੰਹ ਪਹਿਲਾਂ ਹੀ ਘਰੋਂ ਬਾਹਰ ਹੈ। ਜਦੋਂ ਉਹ ਘਰ ਆਇਆ ਤਾਂ ਘਰ ਵਿਚ ਕੋਈ ਨਹੀਂ ਸੀ। ਹਰਜੀਤ ਨੇ ਕਿਹਾ ਕਿ ਸਵੇਰੇ ਉਹ ਉਸ ਨੂੰ ਘਰ ਦਾਖਲ ਕਰਵਾ ਦੇਵੇਗਾ। ਉਸ ਨੇ ਚਾਬੀ ਨਾਲ ਗੇਟ ਖੋਲ੍ਹਿਆ ਹੈ। ਕਿਸੇ ਵੀ ਤਰ੍ਹਾਂ ਦਾ ਕੋਈ ਤਾਲਾ ਨਹੀਂ ਟੁੱਟਿਆ। ਹਰਜੀਤ ਸਿੰਘ ਨੇ ਕਿਹਾ ਕਿ ਮੇਰੀ ਜਾਨ ਨੂੰ ਵੀ ਖਤਰਾ ਹੈ। ਸਵੇਰੇ ਪੂਰੀ ਗੱਲਬਾਤ ਤੋਂ ਬਾਅਦ ਨੂੰਹ ਨੂੰ ਘਰ ਵਿਚ ਦਾਖਲ ਕਰਵਾਵਾਂਗੇ। ਨੂੰਹ ਦੇ ਰਿਸ਼ਤੇਦਾਰ ਸਾਰੇ ਲੋਕਲ ਹਨ, ਰਾਤ ਉਨ੍ਹਾਂ ਕੋਲ ਰਹੇ। ਸਵੇਰੇ ਗੱਲ ਕਰਾਂਗੇ। ਹਰਜੀਤ ਨੇ ਦੱਸਿਆ ਕਿ ਉਹ ਵੀ ਪਿਛਲੇ ਡੇਢ ਸਾਲ ਤੋਂ ਬੇਘਰ ਹੈ। ਹਰਜੀਤ ਅਨੁਸਾਰ ਪੁਲੀਸ ਨੂੰ ਘਰ ਦੇ ਅੰਦਰ ਦਾ ਮੌਕਾ ਵੀ ਦਿਖਾਇਆ ਗਿਆ ਹੈ।

Daughter in law Thrown Out Of The House Pressure Being Put To Withdraw Testimony In The Case Of Murder On Land