ਮਹਾਂਕੁੰਭ ’ਚ ਨਾਕਸ ਬੰਦੋਬਸਤਾਂ ਦਾ ਮਾਮਲਾ

12/02/2025 | Public Times Bureau | National

ਪ੍ਰਯਾਗਰਾਜ ਅਤੇ ਨਾਲ ਹੀ ਉਸ ਦੇ ਆਲੇ-ਦੁਆਲੇ ਦੇ ਸ਼ਹਿਰਾਂ ਵਿਚ ਟਰੈਫਿਕ ਜਾਮ ਦੀ ਸਮੱਸਿਆ ਸਿਰਫ਼ ਇਹੀ ਨਹੀਂ ਦੱਸ ਰਹੀ ਹੈ ਕਿ ਵੱਡੀ ਗਿਣਤੀ ਵਿਚ ਲੋਕ ਆਪਣੇ ਵਾਹਨਾਂ ਜ਼ਰੀਏ ਮਹਾਂਕੁੰਭ ਵਿਚ ਪੁੱਜ ਰਹੇ ਹਨ ਬਲਕਿ ਇਹ ਵੀ ਦੱਸ ਰਹੀ ਹੈ ਕਿ ਸ਼ਾਸਨ-ਪ੍ਰਸ਼ਾਸਨ ਇਹ ਅਨੁਮਾਨ ਨਹੀਂ ਲਗਾ ਸਕਿਆ ਕਿ ਜ਼ਿਆਦਾ ਗਿਣਤੀ ਵਿਚ ਸ਼ਰਧਾਲੂਆਂ ਦੇ ਆਉਣ ਦਾ ਸਿਲਸਿਲਾ ਬਰਕਰਾਰ ਰਹੇਗਾ।

ਇਹ ਵੀ ਸਪਸ਼ਟ ਹੈ ਕਿ ਜਨਤਕ ਟਰਾਂਸਪੋਰਟ ਦੇ ਓਨੇ ਸਾਧਨ ਉਪਲਬਧ ਨਹੀਂ ਕਰਵਾਏ ਜਾ ਸਕੇ ਜਿੰਨੇ ਜ਼ਰੂਰੀ ਸਨ। ਪਹਿਲਾਂ ਮੰਨਿਆ ਜਾ ਰਿਹਾ ਸੀ ਕਿ ਮਹਾਂਕੁੰਭ ਵਿਚ ਮੁੱਖ ਇਸ਼ਨਾਨ ਦੇ ਮੌਕਿਆਂ ’ਤੇ ਹੀ ਵੱਡੀ ਗਿਣਤੀ ਵਿਚ ਸ਼ਰਧਾਲੂ ਆਉਣਗੇ ਪਰ ਅਜਿਹਾ ਲੱਗਦਾ ਹੈ ਕਿ ਲੋਕਾਂ ਨੇ ਇਹ ਸਮਝਿਆ ਕਿ ਮਹਾਂਕੁੰਭ ਦੇ ਆਖ਼ਰੀ ਗੇੜ ਅਤੇ ਮੁੱਖ ਇਸ਼ਨਾਨ ਤੋਂ ਪਹਿਲਾਂ ਦੇ ਦਿਨਾਂ ਵਿਚ ਭੀੜ ਘੱਟ ਹੋਵੇਗੀ, ਇਸ ਲਈ ਤਦ ਜਾਣਾ ਉੱਚਿਤ ਰਹੇਗਾ।

ਇਸੇ ਦਾ ਨਤੀਜਾ ਇਹ ਹੋਇਆ ਕਿ ਪ੍ਰਯਾਗਰਾਜ ਪੁੱਜਣ ਵਾਲੇ ਸਾਰੇ ਰਸਤਿਆਂ ’ਤੇ ਕਈ-ਕਈ ਕਿੱਲੋਮੀਟਰ ਦਾ ਜਾਮ ਦੇਖਣ ਨੂੰ ਮਿਲ ਰਿਹਾ ਹੈ। ਪ੍ਰਯਾਗਰਾਜ ਆਉਣ ਵਾਲੇ ਸ਼ਰਧਾਲੂ ਕਿਉਂਕਿ ਚਿੱਤਰਕੂਟ, ਵਾਰਾਨਸੀ, ਮਿਰਜਾਪੁਰ, ਅਯੁੱਧਿਆ ਵੀ ਪੁੱਜ ਰਹੇ ਹਨ, ਇਸ ਲਈ ਇਨ੍ਹਾਂ ਸ਼ਹਿਰਾਂ ਵਿਚ ਵੀ ਜਾਮ ਲੱਗ ਰਿਹਾ ਹੈ। ਸਥਿਤੀ ਇਹ ਹੈ ਕਿ ਪ੍ਰਯਾਗਰਾਜ ਤੋਂ ਸੈਂਕੜੇ ਕਿੱਲੋਮੀਟਰ ਦੂਰ ਮੱਧ ਪ੍ਰਦੇਸ਼ ਦੇ ਸ਼ਹਿਰਾਂ ਵਿਚ ਵੀ ਵਾਹਨ ਰੇਂਗਦੇ ਹੋਏ ਦਿਸੇ। ਇਸ ਕਾਰਨ ਤਮਾਮ ਲੋਕਾਂ ਨੂੰ ਸੜਕਾਂ ’ਤੇ ਆਪਣਾ ਸਮਾਂ ਗੁਜ਼ਾਰਨਾ ਪੈ ਰਿਹਾ ਹੈ। ਅਨੁਮਾਨ ਹੈ ਕਿ ਪ੍ਰਯਾਗਰਾਜ ਵਿਚ ਹਰ ਘੰਟੇ ਪੰਜ-ਛੇ ਹਜ਼ਾਰ ਵਾਹਨ ਪੁੱਜ ਰਹੇ ਹਨ। ਇੰਨੇ ਜ਼ਿਆਦਾ ਵਾਹਨਾਂ ਦੀ ਪਾਰਕਿੰਗ ਸੰਭਵ ਨਹੀਂ ਹੈ। ਇਸ ਲਈ ਹੋਰ ਵੀ ਨਹੀਂ, ਕਿਉਂਕਿ ਅਨੇਕ ਸ਼ਰਧਾਲੂ ਕਈ ਦਿਨ ਮਹਾਂਕੁੰਭ ਵਿਚ ਗੁਜ਼ਾਰਨੇ ਚਾਹੁੰਦੇ ਹਨ। ਚੰਗਾ ਹੁੰਦਾ ਕਿ ਮੋਟਰ-ਗੱਡੀਆਂ ਦੀ ਪਾਰਕਿੰਗ ਦੀ ਆਗਿਆ ਇਕ ਤੈਅ ਸਮੇਂ ਲਈ ਹੀ ਦਿੱਤੀ ਜਾਂਦੀ।

ਇਸੇ ਦੇ ਨਾਲ ਹਰ ਦਿਨ ਇਹ ਸੂਚਨਾ ਵੀ ਜਨਤਕ ਕੀਤੀ ਜਾਂਦੀ ਕਿ ਪ੍ਰਯਾਗਰਾਜ ਪੁੱਜਣ ਲਈ ਕਿਹੜੇ-ਕਿਹੜੇ ਦਿਨ ਸੁਵਿਧਾਜਨਕ ਹੋਣਗੇ। ਸਿਰਫ਼ ਨਿੱਜੀ ਵਾਹਨਾਂ ਰਾਹੀਂ ਪ੍ਰਯਾਗਰਾਜ ਪੁੱਜਣ ਵਾਲਿਆਂ ਨੂੰ ਹੀ ਸਮੱਸਿਆਵਾਂ ਨਾਲ ਦੋ-ਚਾਰ ਨਹੀਂ ਹੋਣਾ ਪੈ ਰਿਹਾ ਹੈ, ਜਹਾਜ਼ਾਂ, ਟਰੇਨਾਂ ਅਤੇ ਬੱਸਾਂ ਰਾਹੀਂ ਜਾਣ ਵਾਲਿਆਂ ਨੂੰ ਵੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਅਜਿਹਾ ਨਾ ਹੋ ਸਕੇ, ਇਸ ਵਾਸਤੇ ਸਰਕਾਰ ਨੂੰ ਪਹਿਲਾਂ ਤੋਂ ਤਿਆਰ ਰਹਿਣਾ ਚਾਹੀਦਾ ਸੀ ਅਤੇ ਹਾਲਾਤ ਦੇ ਹਿਸਾਬ ਨਾਲ ਤਤਕਾਲ ਰਣਨੀਤੀ ਬਦਲਣੀ ਚਾਹੀਦੀ ਸੀ।

The Case Of Nax Settlements In Mahakumbh