ਭਾਰਤੀ ਹਵਾਈ ਫ਼ੌਜ ਦੇ ਜਵਾਨ ਨੇ ਡਿਊਟੀ ਦੌਰਾਨ ਕੀਤੀ ਖ਼ੁਦਕੁਸ਼ੀ, ਪਰਿਵਾਰ ਨੇ ਫ਼ੋਨ ਕਾਲਾਂ 'ਤੇ ਜਤਾਇਆ ਸ਼ੱਕ

15/11/2025 | Public Times Bureau | National

ਲੁਧਿਆਣਾ ਦੇ ਪਿੰਡ ਨਵੀਂ ਆਬਾਦੀ ਅਕਾਲਗੜ੍ਹ ਦੇ ਰਹਿਣ ਵਾਲੇ 25 ਸਾਲਾ ਭਾਰਤੀ ਹਵਾਈ ਫੌਜ ਦੇ ਜਵਾਨ ਸ਼ੁਭਮ ਕੁਮਾਰ ਨੇ ਉੱਤਰ ਪ੍ਰਦੇਸ਼ ਦੇ ਬਰੇਲੀ ਸਥਿਤ ਤ੍ਰਿਸ਼ੂਲ ਏਅਰ ਫੋਰਸ ਸਟੇਸ਼ਨ ‘ਚ ਡਿਊਟੀ ਦੌਰਾਨ ਆਪਣੀ ਸਰਵਿਸ ਰਿਵਾਲਵਰ ਨਾਲ ਮੱਥੇ ਵਿੱਚ ਗੋਲੀ ਮਾਰ ਕੇ ਖੁਦਕੁਸ਼ੀ ਕਰ ਲਈ। ਸ਼ਨੀਵਾਰ ਨੂੰ ਉਸ ਦਾ ਪਿੰਡ ਅਕਾਲਗੜ੍ਹ ਦੇ ਸ਼ਮਸ਼ਾਨਘਾਟ ਵਿੱਚ ਸਰਕਾਰੀ ਸਨਮਾਨਾਂ ਨਾਲ ਸਸਕਾਰ ਕਰ ਦਿੱਤਾ ਗਿਆ।
ਮਿਲੀ ਜਾਣਕਾਰੀ ਅਨੁਸਾਰ, ਸ਼ੁਭਮ ਵੀਰਵਾਰ ਸ਼ਾਮ 7:30 ਵਜੇ ਤੋਂ ਸ਼ੁੱਕਰਵਾਰ ਸਵੇਰੇ 7 ਵਜੇ ਤੱਕ ਰੇਡੀਓ ਡਿਊਟੀ ‘ਤੇ ਤਾਇਨਾਤ ਸੀ। ਇਹ ਦਰਦਨਾਕ ਘਟਨਾ ਸਵੇਰੇ ਲਗਭਗ 5:30 ਵਜੇ ਵਾਪਰੀ। ਡਿਊਟੀ ਮੁੱਕਣ ਤੋਂ ਬਾਅਦ ਲਗਭਗ 8 ਵਜੇ ਉਸਦੀ ਲਾਸ਼ ਦਫ਼ਤਰ ਵਿੱਚ ਖੂਨ ਨਾਲ ਲਿੱਬੜੀ ਹੋਈ ਮਿਲੀ। ਸਾਥੀਆਂ ਦੇ ਮੁਤਾਬਕ ਸ਼ੁਭਮ ਨੇ ਆਪਣੇ ਮੋਬਾਈਲ ‘ਤੇ ਗੱਲ ਕਰਦੇ ਹੋਏ ਖੁਦ ਨੂੰ ਗੋਲੀ ਮਾਰੀ। ਉਸ ਨੂੰ ਤੁਰੰਤ ਫੌਜੀ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਮ੍ਰਿਤਕ ਐਲਾਨ ਦਿੱਤਾ।
ਸ਼ਨੀਵਾਰ ਸਵੇਰੇ ਮ੍ਰਿਤਕ ਜਵਾਨ ਦੀ ਦੇਹ ਹਵਾਈ ਜਹਾਜ਼ ਰਾਹੀਂ ਏਅਰ ਫੋਰਸ ਸਟੇਸ਼ਨ ਹਲਵਾਰਾ ਲਿਆਂਦੀ ਗਈ, ਜਿੱਥੇ ਤੋਂ ਉਸ ਨੂੰ ਪਿੰਡ ਅਕਾਲਗੜ੍ਹ ਵਿੱਚ ਸਰਕਾਰੀ ਸਨਮਾਨਾਂ ਨਾਲ ਅੰਤਿਮ ਵਿਦਾਈ ਦਿੱਤੀ ਗਈ। ਹਲਵਾਰਾ ਏਅਰ ਫੋਰਸ ਸਟੇਸ਼ਨ ਦੇ ਏਓਸੀ ਪ੍ਰਸ਼ਾਂਤ ਅਗਨੀਹੋਤਰੀ ਨੇ ਟੁਕੜੀ ਸਮੇਤ ਜਵਾਨ ਨੂੰ ਸਲਾਮੀ ਦਿੱਤੀ ਅਤੇ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ।
ਦੂਜੇ ਪਾਸੇ, ਪਰਿਵਾਰ ਨੇ ਘਟਨਾ ਤੋਂ ਠੀਕ ਪਹਿਲਾਂ ਆਈਆਂ ਫੋਨ ਕਾਲਜ਼ ‘ਤੇ ਗੰਭੀਰ ਸ਼ੱਕ ਜਤਾਇਆ ਹੈ ਅਤੇ ਪ੍ਰਸ਼ਾਸਨ ਤੋਂ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਦੀ ਮੰਗ ਕੀਤੀ ਹੈ।

Indian Air Force Soldier Commits Suicide While On Duty Family Raises Suspicions Over Phone Calls