ਗੁਰੂਗ੍ਰਾਮ ਵਿੱਚ ਲਾਪਤਾ ਜਾਵੇਦਾ ਖਾਤੂਨ ਕਤਲ ਮਾਮਲੇ ਦਾ ਖੁਲਾਸਾ, ਮਿੱਤਰ ਸੰਜੇ ਗ੍ਰਿਫ਼ਤਾਰ

10/12/2025 | Public Times Bureau | National

ਹਰਿਆਣਾ ਦੇ ਗੁਰੂਗ੍ਰਾਮ ਵਿੱਚ 27 ਨਵੰਬਰ ਤੋਂ ਲਾਪਤਾ ਜਾਵੇਦਾ ਖਾਤੂਨ ਦੇ ਕਤਲ ਦਾ ਸਨਸਨੀਖੇਜ਼ ਖੁਲਾਸਾ ਹੋਇਆ ਹੈ। ਪੁਲਿਸ ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਜਾਵੇਦਾ ਦਾ ਕਤਲ ਉਸਦੇ ਦੋਸਤ ਸੰਜੇ ਨੇ ਹੀ ਕੀਤਾ। ਦੋਵਾਂ ਦੇ ਨਾਜਾਇਜ਼ ਸਬੰਧਾਂ ਨੂੰ ਲੈ ਕੇ ਹੋਈ ਬਹਿਸ ਕਤਲ ਦਾ ਕਾਰਨ ਬਣੀ।
ਜਾਂਚ ਮੁਤਾਬਕ, 27 ਨਵੰਬਰ ਦੀ ਰਾਤ ਜਾਵੇਦਾ ਆਪਣੇ ਦੋਸਤ ਸੰਜੇ ਨੂੰ ਸੁਸ਼ਾਂਤ ਲੋਕ ਸਥਿਤ ਕਿਰਾਏ ਦੇ ਕਮਰੇ ‘ਚ ਮਿਲਣ ਗਈ ਸੀ। ਓਥੇ ਦੋਵਾਂ ਵਿੱਚ ਤਕਰਾਰ ਹੋਈ ਅਤੇ ਸੰਜੇ ਨੇ ਗਲਾ ਘੁੱਟ ਕੇ ਉਸਦੀ ਹੱਤਿਆ ਕਰ ਦਿੱਤੀ। ਕਤਲ ਤੋਂ ਬਾਅਦ ਸੰਜੇ ਨੇ ਲਾਸ਼ ਨੂੰ ਇਫਕੋ ਚੌਕ ਮੈਟਰੋ ਸਟੇਸ਼ਨ ਨੇੜੇ ਸ਼ਰਾਬ ਦੇ ਠੇਕੇ ਦੇ ਪਿੱਛੇ ਖਾਲੀ ਪਈ ਜ਼ਮੀਨ ਵਿੱਚ ਦੱਬ ਦਿੱਤਾ।
ਐਤਵਾਰ ਨੂੰ ਰਾਹਗੀਰਾਂ ਨੇ ਮਿੱਟੀ ‘ਚੋਂ ਔਰਤ ਦੀ ਲਾਸ਼ ਦਾ ਚਿਹਰਾ ਨਜ਼ਰ ਆਉਂਦੇ ਦੇਖ ਕੇ ਕੰਟਰੋਲ ਰੂਮ ਨੂੰ ਸੂਚਿਤ ਕੀਤਾ। ਸੈਕਟਰ-29 ਪੁਲਿਸ, ਐੱਫਐੱਸਐੱਲ ਅਤੇ ਫਿੰਗਰਪ੍ਰਿੰਟ ਟੀਮ ਮੌਕੇ ‘ਤੇ ਪਹੁੰਚੇ ਅਤੇ ਲਾਸ਼ ਨੂੰ ਬਾਹਰ ਕੱਢ ਕੇ ਜਾਂਚ ਸ਼ੁਰੂ ਕੀਤੀ।
ਜਾਵੇਦਾ ਮੂਲ ਰੂਪ ਵਿੱਚ ਅਸਾਮ ਦੇ ਦਾਰਾਂਗ ਜ਼ਿਲ੍ਹੇ ਦੀ ਰਹਿਣ ਵਾਲੀ ਸੀ ਅਤੇ ਸੁਖਰਾਲੀ ਵਿੱਚ ਇੱਕ ਮਹਿਲਾ ਮਿੱਤਰ ਨਾਲ ਕਿਰਾਏ ‘ਤੇ ਰਹਿੰਦੀ ਸੀ। ਉਸਦੀ ਮਿੱਤਰ ਨੇ 1 ਦਸੰਬਰ ਨੂੰ ਸੈਕਟਰ-18 ਥਾਣੇ ਵਿੱਚ ਗੁੰਮਸ਼ੁਦਗੀ ਦੀ ਰਿਪੋਰਟ ਦਰਜ ਕਰਵਾਈ ਸੀ।
ਪੁਲਿਸ ਨੇ ਜਾਂਚ 'ਚ ਤਰੱਕੀ ਕਰਦਿਆਂ ਸੋਮਵਾਰ ਦੁਪਹਿਰ 26 ਸਾਲਾ ਮੁਲਜ਼ਮ ਸੰਜੇ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਪੁੱਛਗਿੱਛ ਵਿੱਚ ਉਸਨੇ ਕਤਲ ਦੀ ਘਟਨਾ ਕਬੂਲ ਕਰ ਲਈ ਹੈ। ਸੰਜੇ ਗੁਰੂਗ੍ਰਾਮ ਵਿੱਚ AC ਰਿਪੇਅਰ ਦਾ ਕੰਮ ਕਰਦਾ ਹੈ ਅਤੇ ਆਪਣੇ ਤਾਏ ਦੇ ਨਾਲ ਸੁਸ਼ਾਂਤ ਲੋਕ ਵਿੱਚ ਰਹਿੰਦਾ ਸੀ।

Missing Javed Khatun Murder Case Revealed In Gurugram Friend Sanjay Arrested