ਸੜਕ ਹਾਦਸੇ 'ਚ ਪ੍ਰਵਾਸੀ ਪੰਜਾਬੀ ਦੀ ਮੌਤ, ਛੱਪੜ 'ਚੋਂ ਮਿਲੀ ਲਾਸ਼

06/02/2025 | Public Times Bureau | Panjab

ਹਲਕਾ ਉੜਮੁੜ ਦੇ ਬਲਾਕ ਟਾਂਡਾ ਅਧੀਨ ਪੈਂਦੇ ਪਿੰਡ ਨੰਗਲੀ ਨੇੜੇ ਵਾਪਰੇ ਇੱਕ ਹਾਦਸੇ ਦੌਰਾਨ ਇਕ ਪ੍ਰਵਾਸੀ ਪੰਜਾਬੀ ਦੀ ਮੌਤ ਹੋ ਗਈ ਤੇ ਉਸਦੀ ਲਾਸ਼ ਸੜਕ ਨੇੜੇ ਛੱਪੜ 'ਚੋਂ ਬਰਾਮਦ ਹੋਈ। ਮ੍ਰਿਤਕ ਦੀ ਪਛਾਣ ਪ੍ਰੀਤਮ ਸਿੰਘ ਪੁੱਤਰ ਸੁਜਾਨ ਸਿੰਘ ਵਾਸੀ ਪਿੰਡ ਮਿਆਣੀ ਵਜੋਂ ਹੋਈ ਹੈ।ਜਾਣਕਾਰੀ ਅਨੁਸਾਰ ਪ੍ਰੀਤਮ ਸਿੰਘ ਬੈਲਜੀਅਮ ਦਾ ਵਸਨੀਕ ਸੀ ਤੇ ਉਸਦਾ ਪਰਿਵਾਰ ਪਿੰਡ ਮਿਆਣੀ ਵਿਖੇ ਰਹਿੰਦਾ ਸੀ। ਪ੍ਰੀਤਮ ਸਿੰਘ ਕਰੀਬ 4 ਦਿਨ ਪਹਿਲਾਂ ਬੈਲਜੀਅਮ ਤੋਂ ਪੰਜਾਬ ਆਇਆ ਸੀ। ਮਿਤੀ 5 ਫਰਵਰੀ ਨੂੰ ਸਵੇਰੇ ਆਪਣੇ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਨੰਗਲ ਲੁਬਾਣਾ ਵਿਖੇ ਕਿਸੇ ਨਜ਼ਦੀਕੀ ਦੋਸਤ ਦਾ ਸਾਮਾਨ ਜੋ ਬੈਲਜੀਅਮ ਤੋਂ ਲੈ ਕੇ ਆਇਆ ਦੇਣ ਲਈ ਗਿਆ ਸੀ ਪਰ ਰਸਤੇ ਵਿੱਚ ਬੇਗੋਵਾਲ ਉਸਦਾ ਉਹ ਦੋਸਤ ਮਿਲ ਗਿਆ।

ਪ੍ਰੀਤਮ ਸਿੰਘ ਨੇ ਦੋਸਤ ਉੱਥੇ ਸਾਮਾਨ ਦੇਣ ਤੋਂ ਬਾਅਦ ਆਪਣੇ ਉਸ ਦੋਸਤ ਨਾਲ ਬੇਗੋਵਾਲ ਵਿਖੇ ਕਬੱਡੀ ਟੂਰਨਾਮੈਂਟ ਵੇਖਿਆ ਤੇ ਦੇਰ ਸ਼ਾਮ ਵਾਪਸ ਆਉਂਦੇ ਸਮੇਂ ਪ੍ਰੀਤਮ ਸਿੰਘ ਦਾ ਮੋਟਰਸਾਈਕਲ ਕਿਸੇ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਵੀਰਵਾਰ ਸਵੇਰੇ ਉਸ ਦੀ ਲਾਸ਼ ਪਿੰਡ ਨੰਗਲੀ ਦੇ ਛੱਪੜ ਵਿੱਚੋਂ ਮਿਲੀ ਹੈ। ਮ੍ਰਿਤਕ ਦੇ ਪਰਿਵਾਰ ਦੇ ਦੱਸਣ ਮੁਤਾਬਿਕ ਉਹ ਕੱਲ੍ਹ ਸਵੇਰੇ ਤੋਂ ਲਾਪਤਾ ਸੀ। ਪ੍ਰੀਤਮ ਸਿੰਘ ਵਿਆਹਿਆ ਹੋਇਆ ਸੀ ਤੇ ਦੋ ਬੱਚਿਆਂ ਦਾ ਪਿਤਾ ਸੀ। ਇਹ ਹਾਦਸਾ ਕਿਹੜੇ ਹਾਲਾਤ ਵਿੱਚ ਹੋਇਆ ਟਾਂਡਾ ਪੁਲਿਸ ਦੇ ਏਐੱਸਆਈ ਰਜੇਸ਼ ਕੁਮਾਰ ਚੌਕੀ ਇੰਚਾਰਜ ਬੈਂਸ ਅਵਾਣ ਮਾਮਲੇ ਦੀ ਜਾਂਚ ਕਰ ਰਹੇ ਹਨ । ਫਿਲਹਾਲ ਟਾਂਡਾ ਪੁਲਿਸ ਨੇ 174 ਦੀ ਕਾਰਵਾਈ ਕਰਨ ਤੋਂ ਮ੍ਰਿਤਕ ਦੀ ਲਾਸ਼ ਵਾਰਸਾਂ ਹਵਾਲੇ ਕਰ ਦਿੱਤੀ।

Immigrant Punjabi Died In Road Accident Body Found In Pond