ਪੰਜਾਬ ਦੇ ਇਨ੍ਹਾਂ ਤਿੰਨ ਜ਼ਿਲ੍ਹਿਆਂ ਦੀ ਬਦਲੇਗੀ ਨੁਹਾਰ, ਬਣਨਗੀਆਂ ਵਿਸ਼ਵ-ਪੱਧਰੀ ਸੜਕਾਂ, ਅੱਜ ਜਾਰੀ ਹੋਣਗੇ ਟੈਂਡਰ

15/03/2025 | Public Times Bureau | Panjab

ਪੰਜਾਬ ਸਰਕਾਰ ਨੇ ਲੁਧਿਆਣਾ, ਅੰਮ੍ਰਿਤਸਰ ਅਤੇ ਜਲੰਧਰ ਦੀ ਨੁਹਾਰ ਬਦਲਣ ਲਈ ਇਕ ਵੱਡੀ ਯੋਜਨਾ ਦਾ ਐਲਾਨ ਕੀਤਾ ਹੈ। ਵਿੱਤ ਮੰਤਰੀ ਹਰਪਾਲ ਚੀਮਾ ਨੇ ਅੱਜ ਇੱਥੇ ਇਕ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਕਿ ਇਹ ਪ੍ਰਾਜੈਕਟ ਇਨ੍ਹਾਂ ਤਿੰਨ ਸ਼ਹਿਰਾਂ ਵਿਚ ਵਿਸ਼ਵ-ਪੱਧਰੀ ਸੜਕਾਂ ਬਣਾਉਣ ਲਈ ਹੈ, ਜਿਸਨੂੰ ਤਿੰਨ ਪੜਾਵਾਂ ਵਿਚ ਲਾਗੂ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਜੇਕਰ ਇਹ ਪ੍ਰਾਜੈਕਟ ਸਫਲ ਹੁੰਦਾ ਹੈ ਤਾਂ ਇਸਨੂੰ ਸਾਰੇ ਪੰਜਾਬ ਵਿਚ ਲਾਗੂ ਕੀਤਾ ਜਾਵੇਗਾ।

ਚੀਮਾ ਅੱਜ ਇੱਥੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਸੜਕਾਂ ਨੂੰ ਤਿੰਨ ਪੜਾਵਾਂ ਵਿਚ ਬਣਾਇਆ ਜਾਵੇਗਾ, ਜਿਸ ਵਿਚ ਪਹਿਲਾ ਪੜਾਅ ਡਿਜ਼ਾਈਨ ਪੱਧਰ ਦਾ ਹੋਵੇਗਾ, ਜਿਸਦੇ ਟੈਂਡਰ ਅੱਜ ਜਾਰੀ ਕੀਤੇ ਜਾ ਰਹੇ ਹਨ। ਪੰਜਾਬ ਇਨਫਰਾਸਟਰਕਚਰ ਡਿਵੈਲਪਮੈਂਟ ਬੋਰਡ ਦੀ ਇਸ 42 ਕਿਲੋਮੀਟਰ ਦੀ ਸੜਕ ਯੋਜਨਾ ਬਾਰੇ ਦੱਸਦੇ ਹੋਏ ਉਨ੍ਹਾਂ ਕਿਹਾ ਕਿ ਹਰ ਸੜਕ ਦੀ ਵੱਖਰੀ ਲੇਨ ਹੋਵੇਗੀ, ਜਿਸ ਵਿਚ ਪੈਦਲ ਚਲਣ ਵਾਲਿਆਂ ਲਈ, ਸਾਈਕਲ ਚਲਾਉਣ ਵਾਲਿਆਂ ਲਈ ਅਤੇ ਹੋਰ ਵਾਹਨਾਂ ਲਈ ਵਿਵਸਥਾ ਹੋਵੇਗੀ।

ਇਨ੍ਹਾਂ ਸੜਕਾਂ 'ਤੇ ਪੌਦੇ ਅਤੇ ਰੁੱਖ ਲਗਾਉਣ ਦੀ ਵੀ ਵੱਖਰੀ ਤਰ੍ਹਾਂ ਦੀ ਵਿਵਸਥਾ ਕੀਤੀ ਜਾਵੇਗੀ। ਹਰ ਤਿੰਨ ਮਹੀਨੇ ਬਾਅਦ ਰੀਲਾਈਨਿੰਗ ਹੋਵੇਗੀ ਅਤੇ ਸਫ਼ੈਦ ਪੱਟੀ ਦੁਬਾਰਾ ਬਣਾਈ ਜਾਵੇਗੀ ਤਾਂ ਜੋ ਪਤਾ ਲੱਗ ਸਕੇ ਕਿ ਕਿਹੜੀ ਲੇਨ ਵਿਚ ਕਿਹੜਾ ਵਾਹਨ ਚੱਲਣਾ ਹੈ। ਚੀਮਾ ਨੇ ਦੱਸਿਆ ਕਿ ਇਨ੍ਹਾਂ ਪੁਰਾਣੇ ਸ਼ਹਿਰਾਂ ਵਿਚ ਗਲੀਆਂ ਦੇ ਨਾਲ ਨਾਲ ਨਾਲੀਆਂ ਬਣੀਆਂ ਹੋਈਆਂ ਹਨ। ਸੀਵਰੇਜ ਆਦਿ ਦਾ ਪਾਣੀ ਓਵਰਫਲੋ ਹੁੰਦਾ ਰਹਿੰਦਾ ਹੈ। ਇਸ ਲਈ ਇਸਦਾ ਡਿਜ਼ਾਈਨ ਅਜਿਹਾ ਬਣਾਇਆ ਜਾਵੇਗਾ ਕਿ ਪਾਣੀ ਬਾਹਰ ਸੜਕ 'ਤੇ ਨਾ ਆ ਸਕੇ ਅਤੇ ਬਰਸਾਤ ਦਾ ਪਾਣੀ ਵੀ ਤੇਜ਼ੀ ਨਾਲ ਨਿਕਲ ਸਕੇ। ਚੀਮਾ ਨੇ ਕਿਹਾ ਕਿ ਇਨ੍ਹਾਂ ਸੜਕਾਂ ਦੀ ਮਿਆਦ ਦਸ ਸਾਲ ਲਈ ਨਿਰਧਾਰਿਤ ਕੀਤੀ ਗਈ ਹੈ ਅਤੇ ਇਨ੍ਹਾਂ ਦਸ ਸਾਲਾਂ ਤੱਕ ਸੰਬੰਧਿਤ ਨਿਰਮਾਣ ਕੰਪਨੀ ਹੀ ਇਸਦਾ ਰੱਖ-ਰਖਾਅ ਕਰੇਗੀ। ਗਲੀਆਂ ਆਦਿ ਵਿਚ ਜਾਣ ਲਈ ਜਗ੍ਹਾ-ਜਗ੍ਹਾ ਸੰਕੇਤ ਲਗਾਏ ਜਾਣਗੇ।

The Face Of These Three Districts Of Punjab Will Change World class Roads Will Be Built Tenders Will Be Issued Today