ਪੰਜ ਮੈਂਬਰੀ ਭਰਤੀ ਕਮੇਟੀ ਵੱਲੋਂ ਜ਼ਿਲ੍ਹਾਵਾਰ ਮੀਟਿੰਗਾਂ ਦਾ ਐਲਾਨ, ਭੂੰਦੜ ਸਮੇਤ ਸਮੁੱਚੀ ਲੀਡਰਸ਼ਿਪ ਨੂੰ ਕਾਪੀਆਂ ਪ੍ਰਾਪਤ ਕਰਨ ਦੀ ਕੀਤੀ ਅਪੀਲ

19/03/2025 | Public Times Bureau | Panjab

ਸ੍ਰੀ ਅਕਾਲ ਤਖ਼ਤ ਸਾਹਿਬ (Sri Akal Takht Sahib) ਦੀ ਫ਼ਸੀਲ ਤੋਂ ਬਣੀ ਭਰਤੀ ਕਮੇਟੀ ਦੇ ਮੈਬਰਾਂ ਮਨਪ੍ਰੀਤ ਸਿੰਘ ਇਯਾਲੀ, ਜਥੇਦਾਰ ਗੁਰਪ੍ਰਤਾਪ ਸਿੰਘ ਵਡਾਲਾ, ਇਕਬਾਲ ਸਿੰਘ ਝੂੰਦਾ, ਜਥੇਦਾਰ ਸੰਤਾ ਸਿੰਘ ਉਮੈਦਪੁਰ, ਬੀਬੀ ਸਤਵੰਤ ਕੌਰ ਨੇ ਭਰਤੀ ਦੇ ਆਗਾਜ਼ ਲਈ ਦਿੱਤੇ ਪ੍ਰੋਗਰਾਮ ਨੂੰ ਕਾਮਯਾਬ ਬਣਾਉਣ ਲਈ ਸਮੁੱਚੇ ਪੰਜਾਬ ਤੋਂ ਮਿਲੇ ਵੱਡੇ ਜਨ ਸਮਰਥਨ ਲਈ ਧੰਨਵਾਦ ਕੀਤਾ। ਪੰਜਾਬ ਸਮੇਤ ਹਰਿਆਣਾ, ਦਿੱਲੀ, ਰਾਜਸਥਾਨ ਤੇ ਹਿਮਾਚਲ ਤੋਂ ਪਹੁੰਚੇ ਪੰਥ ਪ੍ਰਸਤ ਸੱਜਣਾਂ ਦਾ ਦਿਲ ਦੀ ਗਹਿਰਾਈਆਂ ਤੋਂ ਸਤਿਕਾਰ ਭੇਟ ਕੀਤਾ। ਭਰਤੀ ਕਮੇਟੀ ਨੇ ਕੀਤੇ ਗਏ ਪ੍ਰਬੰਧ ਘੱਟ ਪੈਣ ਅਤੇ ਭਰਤੀ ਲਈ ਕਾਪੀਆਂ ਦੀ ਮੰਗ ਪੂਰੀ ਨਾ ਹੋ ਸਕਣ ਲਈ ਮਾਫ਼ੀ ਮੰਗੀ ਅਤੇ ਦੁਹਰਾਇਆ ਕਿ ਆਉਣ ਵਾਲੇ ਦੋ ਚਾਰ ਦਿਨਾਂ ਅੰਦਰ ਕਾਪੀਆਂ ਦੀ ਮੰਗ ਨੂੰ ਪੂਰਾ ਕਰ ਦਿੱਤਾ ਜਾਵੇਗਾ।

ਪੰਜ ਮੈਂਬਰੀ ਭਰਤੀ ਕਮੇਟੀ ਵੱਲੋ ਭਰਤੀ ਲਈ ਮੀਟਿੰਗਾਂ ਦਾ ਪ੍ਰੋਗਰਾਮ ਜਾਰੀ ਕੀਤਾ ਗਿਆ ਹੈ ਜਿਸ ਤਹਿਤ 24 ਮਾਰਚ ਨੂੰ ਜ਼ਿਲ੍ਹਾ ਮਲੇਰਕੋਟਲਾ, 26 ਮਾਰਚ ਨੂੰ ਜ਼ਿਲ੍ਹਾ ਜਲੰਧਰ, 29 ਮਾਰਚ ਨੂੰ ਸੰਗਰੂਰ, 31 ਮਾਰਚ ਨੂੰ ਜ਼ਿਲ੍ਹਾ ਪਟਿਆਲਾ, 4 ਅਪ੍ਰੈਲ ਨੂੰ ਗੁਰਦਾਸਪੁਰ, 6 ਅਪ੍ਰੈਲ ਨੂੰ ਰੋਪੜ ਜ਼ਿਲ੍ਹੇ ਦੀਆਂ ਮੀਟਿੰਗਾਂ ਰੱਖੀਆਂ ਹਨ। ਜਿੱਥੋਂ ਵਰਕਰ ਭਰਤੀ ਸਬੰਧੀ ਕਾਪੀਆਂ ਵੀ ਲੈ ਸਕਣਗੇ। ਕਿਉਂਕਿ ਕਮੇਟੀ ਦੀ ਸੋਚ ਹੈ ਕੇ ਭਰਤੀ ਕਾਪੀ ਕੋਈ ਵੀ ਵਰਕਰ ਲੈ ਸਕਦਾ ਹੈ ਭਰਤੀ 'ਚ ਪਹਿਲਾਂ ਤੋਂ ਤਹਿ ਅਜਾਰੇਦਾਰੀ ਸਿਸਟਮ ਪ੍ਰਵਾਨ ਨਹੀਂ, ਇਸੇ ਲਈ ਅਸੀਂ ਮਿਸਡ ਕਾਲ ਲਈ ਨੰਬਰ ਵੀ ਜਾਰੀ ਕੀਤਾ ਹੈ।ਭਰਤੀ ਕਮੇਟੀ ਨੇ ਮੁੜ ਦੁਹਰਾਇਆ ਕਿ ਭਰਤੀ ਅਧਾਰ ਕਾਰਡ, ਵੋਟਰ ਆਈ ਡੀ ਕਾਰਡ ਅਤੇ ਡ੍ਰਾਈਵਿੰਗ ਲਾਇਸੈਂਸ ਨੰਬਰ ਲੈ ਕੇ ਪੂਰਨ ਪਾਰਦਰਸ਼ਤਾ ਅਤੇ ਬਿਨਾ ਕਿਸੇ ਸਿਆਸੀ ਭੇਦ ਭਾਵ ਦੇ ਸ਼ੁਰੂ ਹੋਈ ਹੈ ਅਤੇ ਇਸ ਨੂੰ ਪੂਰਾ ਵੀ ਏਸੇ ਵਿਸ਼ਵਾਸ ਦੇ ਨਾਲ ਕੀਤਾ ਜਾਵੇਗਾ।

Five member Recruitment Committee Announces District wise Meetings Appeals To Entire Leadership Including Bhunder To Get Copies