ਤਿੰਨ ਘੰਟਿਆਂ 'ਚ ਚੁੱਕ ਦਿੱਤਾ 399 ਦਿਨਾਂ ਤੋਂ ਚੱਲ ਰਿਹਾ ਕਿਸਾਨ ਮੋਰਚਾ, ਖੁੱਲ੍ਹਿਆ ਸ਼ੰਭੂ ਅਤੇ ਖਨੌਰੀ ਬਾਰਡਰ

20/03/2025 | Public Times Bureau | Panjab

ਸ਼ੰਭੂ ਬਾਰਡਰ ਤੇ ਸੰਯੁਕਤ ਕਿਸਾਨ ਮੋਰਚਾ ਗੈਰ ਰਾਜਨੀਤਿਕ ਅਤੇ ਕਿਸਾਨ ਮਜ਼ਦੂਰ ਮੋਰਚਾ 400 ਦਿਨ ਪੂਰੇ ਕਰਨ ਤੋਂ ਪਹਿਲਾਂ ਹੀ ਪੁਲਿਸ ਨੇ ਚੁੱਕ ਦਿੱਤਾ ਹੈ। ਬੁੱਧਵਾਰ ਦੇਰ ਸ਼ਾਮ ਭਾਰੀ ਪੁਲਿਸ ਫੋਰਸ ਵੱਲੋਂ ਸ਼ੰਭੂ ਬਾਰਡਰ 'ਤੇ ਬੈਠੇ ਕਿਸਾਨਾਂ ਨੂੰ ਕੌਮੀ ਸ਼ਾਹ ਮਾਰਗ ਖਾਲੀ ਕਰਨ ਦੀ ਚਿਤਾਵਨੀ ਦਿੱਤੀ। ਜਿਸ ਤੋਂ ਬਾਅਦ ਪੁਲਿਸ ਨੇ ਜੇਸੀਬੀ ਮਸ਼ੀਨਾਂ ਦੇ ਨਾਲ ਇੱਕ-ਇੱਕ ਕਰਕੇ ਸ਼ੰਭੂ ਬਾਰਡਰ 'ਤੇ ਬਣੇ ਕਿਸਾਨਾਂ ਦੇ ਟੈਂਟਾਂ ਨੂੰ ਤੋੜ ਦਿੱਤਾ ਅਤੇ ਰਾਹ ਵਿੱਚ ਖੜੇ ਕਿਸਾਨਾਂ ਦੇ ਵਾਹਨਾਂ ਨੂੰ ਹਟਾ ਦਿੱਤਾ ਗਿਆ। ਪੁਲਿਸ ਦੀ ਇਸ ਕਾਰਵਾਈ ਦੌਰਾਨ ਸ਼ੰਭੂ ਬਾਰਡਰ ਤੇ ਕੁਝ ਕੁ ਕਿਸਾਨ ਹੀ ਮੌਜੂਦ ਸਨ ਜਿਨ੍ਹਾਂ ਵਿੱਚੋਂ ਕੁਝ ਨੂੰ ਪੁਲਿਸ ਨੇ ਹਿਰਾਸਤ ਵਿੱਚ ਲੈ ਲਿਆ ਅਤੇ ਕੁਝ ਕਿਸਾਨ ਆਪੋ-ਆਪਣਾ ਸਮਾਨ ਚੁੱਕ ਕੇ ਬਾਰਡਰ ਤੋਂ ਪਰੇ ਹੋ ਗਏ।

ਜਾਣਕਾਰੀ ਅਨੁਸਾਰ ਭਾਰੀ ਪੁਲਿਸ ਫੋਰਸ ਬੁੱਧਵਾਰ ਸਵੇਰ ਤੋਂ ਹੀ ਸ਼ੰਭੂ ਬਾਰਡਰ ਦੇ ਆਲੇ ਦੁਆਲੇ ਇਕੱਤਰ ਹੋਣੇ ਸ਼ੁਰੂ ਹੋ ਗਈ। ਵੱਡੀ ਗਿਣਤੀ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ, ਐਂਬੂਲੈਂਸਾਂ, ਜੇਸੀਬੀ ਮਸ਼ੀਨਾਂ, ਵਾਟਰ ਕੈਨਨ ਅਤੇ ਪੁਲਿਸ ਦੇ ਹੋਰ ਵਾਹਨ ਇਕੱਤਰ ਕੀਤੇ ਗਏ। ਭਾਰੀ ਗਿਣਤੀ ਪੁਲਿਸ ਸ਼ੰਭੂ ਬਾਰਡਰ ਦੇ ਆਸ ਪਾਸ ਪਹੁੰਚ ਗਈ। ਸ਼ਾਮ ਨੂੰ ਕਿਸਾਨ ਆਗੂਆਂ ਅਤੇ ਸਰਕਾਰ ਵਿਚਕਾਰ ਬੈਠਕ ਖਤਮ ਹੋਣ ਤੋਂ ਬਾਅਦ ਪੁਲਿਸ ਨੇ ਆਗੂਆਂ ਦੀ ਫੜੋ ਫੜੀ ਵਾਲੀ ਕਾਰਵਾਈ ਸ਼ੁਰੂ ਕੀਤੀ। ਇਸੇ ਦੌਰਾਨ ਸ਼ੰਭੂ ਬੈਰੀਅਰ ਉੱਤੇ ਸੰਯੁਕਤ ਕਿਸਾਨ ਮੋਰਚਾ ਗੈਰ ਰਾਜਨੀਤਿਕ ਅਤੇ ਕਿਸਾਨ ਮਜ਼ਦੂਰ ਮੋਰਚੇ ਦੀ ਅਗਵਾਈ ਕਰਨ ਵਾਲੇ ਆਗੂ ਸਰਵਨ ਸਿੰਘ ਪੰਧੇਰ ਨੂੰ ਪੁਲਿਸ ਵੱਲੋਂ ਸ਼ਾਮ ਨੂੰ ਹਿਰਾਸਤ ਵਿੱਚ ਲਿਆ ਗਿਆ। ਜਿਸ ਤੋਂ ਬਾਅਦ ਪੁਲਿਸ ਫੋਰਸ ਨੇ ਸ਼ੰਭੂ ਬਾਰਡਰ ਤੇ ਵੀ ਗਤੀਵਿਧੀ ਤੇਜ਼ ਕਰ ਦਿੱਤੀ।

ਸ਼ੰਭੂ ਮੋਰਚੇ ਦੇ ਨੇੜੇ 108 ਐਂਬੂਲੇਂਸਾਂ ਅਤੇ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਮੋਰਚੇ ਨੇੜੇ ਦਰਖ਼ਤਾਂ ਪਿੱਛੇ ਲੋਕਾ ਕੇ ਖੜ੍ਹੀਆਂ ਕੀਤੀਆਂ ਗਈਆਂ। ਮੁੱਖ ਕੌਮੀ ਸ਼ਾਹ ਮਾਰਗ ਤੇ ਹਰਿਆਣਾ ਪੁਲਿਸ ਵੱਲੋਂ ਲਗਾਈਆਂ ਰੋਕਾਂ ਨੇੜੇ ਰੋਜ਼ਾਨਾ ਸੈਂਕੜੇ ਹਰਿਆਣਾ ਪੁਲਿਸ ਦੇ ਜਵਾਨ ਖੜ੍ਹੇ ਰਹਿੰਦੇ ਹਨ ਪਰ ਅੱਜ ਇਕ ਵੀ ਪੁਲਿਸ ਮੁਲਾਜਮ ਜਾਂ ਹੋਰ ਫੋਰਸਾਂ ਦਾ ਕੋਈ ਜਵਾਨ ਨਜਰ ਨਹੀਂ ਆਇਆ। ਸ਼ਾਮ 7 ਵਜੇ ਤੋਂ ਬਾਅਦ ਸ਼ੰਬੂ ਮੋਰਚੇ ਦੇ ਨੇੜੇ ਪੰਜਾਬ ਪੁਲਿਸ ਦੀ ਨਫਰੀ ਵਧਣ ਲੱਗੀ। ਜਿਸ ਤੋਂ ਬਾਅਦ ਮੋਰਚੇ ਤੇ ਮੌਜੂਦ ਕਿਸਾਨ ਵੀ ਆਪਣੇ ਵਾਹਨਾਂ ਨੂੰ ਇਧਰ ਉਧਰ ਕਰਨ ਲੱਗੇ। ਕਰੀਬ 8:30 ਵਜੇ ਤੱਕ ਬਾਰਡਰ ਤੇ ਪੁਲਸ ਨਫਰੀ ਕਰੀਬ ਤਿੰਨ ਤੋਂ ਚਾਰ ਹਜ਼ਾਰ ਤੱਕ ਪੁੱਜ ਗਈ। ਦੇਖਦੇ ਹੀ ਦੇਖਦੇ ਪੁਲਿਸ ਫੋਰਸ ਕਿਸਾਨ ਮੋਰਚੇ ਵੱਲ ਵਧੀ ਤਾਂ ਮੌਕੇ ਤੇ ਮੌਜੂਦ ਕੁਝ ਕਿਸਾਨਾਂ ਨੇ ਵਿਰੋਧ ਕਰਨਾ ਚਾਹਿਆ। ਪਰ ਪੁਲਿਸ ਅੱਗੇ ਕਿਸੇ ਦੀ ਨਾ ਚੱਲੀ ਅਤੇ ਕਿਸਾਨਾਂ ਨੇ ਮੋਰਚਾ ਖਾਲੀ ਹੋ ਗਿਆ। ਪੁਲਿਸ ਨੇ ਜੇਸੀਬੀ ਮਸ਼ੀਨਾਂ ਦੇ ਨਾਲ ਪਹਿਲਾਂ ਮੋਰਚੇ ਦੇ ਸਟੇਜ ਪੱਟੀ ਅਤੇ ਫਿਰ ਇਕ ਇਕ ਕਰਕੇ ਕਿਸਾਨਾਂ ਦੇ ਟੈਂਟ ਤੋੜ ਦਿੱਤੇ ਗਏ। ਪੁਲਿਸ ਵਲੋਂ ਕਰੀਬ ਢਾਈ ਤੋਂ ਤਿੰਨ ਘੰਟੇ ਵਿਚ ਸ਼ੰਬੂ ਬਾਰਡਰ ਨੂੰ ਖਾਲੀ ਕਰ ਦਿੱਤਾ।

The 399 day old Kisan Morcha Was Lifted In Three Hours Shambhu And Khanauri Borders Opened