ਬੇਂਗਲੁਰੂ 'ਚ ਦਰਦਨਾਕ ਹਾਦਸਾ, ਮੈਟਰੋ ਵਾਇਡਕਟ ਆਟੋਰਿਕਸ਼ਾ 'ਤੇ ਡਿੱਗਿਆ; ਡਰਾਈਵਰ ਦੀ ਮੌਤ

16/04/2025 | Public Times Bureau | Panjab

ਕਰਨਾਟਕ ਦੀ ਰਾਜਧਾਨੀ ਬੇਂਗਲੁਰੂ ਵਿੱਚ ਇੱਕ ਦਰਦਨਾਕ ਹਾਦਸਾ ਵਾਪਰਿਆ ਹੈ। ਇੱਥੇ ਨਮਾ ਮੈਟਰੋ ਪ੍ਰਾਜੈਕਟ ਦਾ ਇੱਕ ਵਾਇਡਕਟ ਆਟੋਰਿਕਸ਼ਾ 'ਤੇ ਡਿੱਗ ਗਿਆ। ਇਸ ਹਾਦਸੇ ਵਿੱਚ ਡਰਾਈਵਰ ਦੀ ਜਾਨ ਚਲੀ ਗਈ। ਇੱਕ ਹੋਰ ਯਾਤਰੀ ਗੰਭੀਰ ਜ਼ਖਮੀ ਹੈ। ਇਹ ਘਟਨਾ ਮੰਗਲਵਾਰ ਅੱਧੀ ਰਾਤ ਕਰੀਬ ਯੇਲਹਾਂਕਾ ਨੇੜੇ ਕੋਗਿਲੂ ਕਰਾਸ ਨੇੜੇ ਵਾਪਰੀ। ਮ੍ਰਿਤਕ ਡਰਾਈਵਰ ਦੀ ਪਛਾਣ ਕਾਸਿਮ ਸਾਬ ਵਜੋਂ ਹੋਈ ਹੈ। ਉਹ ਹੇਗੜੇ ਨਗਰ ਦਾ ਰਹਿਣ ਵਾਲਾ ਸੀ।

ਪੁਲਿਸ ਅਨੁਸਾਰ ਕਾਸਿਮ ਆਪਣੇ ਆਟੋ ਵਿੱਚ ਇੱਕ ਯਾਤਰੀ ਨਾਲ ਨਾਗਾਵਾੜਾ ਵੱਲ ਜਾ ਰਿਹਾ ਸੀ। ਮੈਟਰੋ ਪ੍ਰੋਜੈਕਟ ਦੇ ਇੱਕ ਵਾਈਡਕਟ ਨੂੰ ਇੱਕ 18-ਪਹੀਆ ਟਰੱਕ ਦੁਆਰਾ ਲਿਜਾਇਆ ਜਾ ਰਿਹਾ ਸੀ। ਇਸ ਨੂੰ ਏਅਰਪੋਰਟ ਮੈਟਰੋ ਲਾਈਨ ਵਿੱਚ ਵਰਤਿਆ ਜਾਣਾ ਸੀ ਪਰ ਇਸ ਤੋਂ ਪਹਿਲਾਂ ਕੋਗਿਲੂ ਕਰਾਸ 'ਤੇ ਮੋੜ ਲੈਂਦੇ ਸਮੇਂ ਟਰੱਕ ਦਾ ਟ੍ਰੇਲਰ ਆਪਣੇ ਇੰਜਣ ਤੋਂ ਵੱਖ ਹੋ ਗਿਆ ਤੇ ਦੋ ਹਿੱਸਿਆਂ ਵਿੱਚ ਵੰਡ ਗਿਆ। ਇਸ ਕਾਰਨ ਟਰੱਕ 'ਤੇ ਲੱਦਿਆ ਹੋਇਆ ਵਾਈਡਕਟ ਆਟੋ ਰਿਕਸ਼ਾ 'ਤੇ ਡਿੱਗ ਗਿਆ। ਡਰਾਈਵਰ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਯਾਤਰੀ ਵਾਲ-ਵਾਲ ਬਚ ਗਿਆ।

ਪੁਲਿਸ ਨੇ ਦੱਸਿਆ ਕਿ ਯਾਤਰੀ ਹਾਦਸੇ ਤੋਂ ਕੁਝ ਪਲ ਪਹਿਲਾਂ ਆਟੋ ਤੋਂ ਉੱਤਰ ਗਿਆ ਸੀ ਪਰ ਡਰਾਈਵਰ ਕਾਸਿਮ ਆਟੋ ਵਿੱਚ ਹੀ ਬੈਠਾ ਰਿਹਾ। ਹਾਦਸੇ ਵਿੱਚ ਆਟੋ ਵੀ ਪੂਰੀ ਤਰ੍ਹਾਂ ਨੁਕਸਾਨਿਆ ਗਿਆ। ਟਰੱਕ ਡਰਾਈਵਰ ਮੌਕੇ ਤੋਂ ਫਰਾਰ ਹੋ ਗਿਆ ਹੈ। ਪੁਲਿਸ ਉਸ ਦੀ ਭਾਲ ਵਿੱਚ ਰੁੱਝੀ ਹੋਈ ਹੈ।

ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਰਾਹਗੀਰ ਤੇ ਸਥਾਨਕ ਲੋਕ ਮੌਕੇ 'ਤੇ ਪਹੁੰਚ ਗਏ ਪਰ ਵਾਈਡਕਟ ਬਹੁਤ ਵੱਡਾ ਸੀ। ਇਸ ਨੂੰ ਹਟਾਉਣ ਲਈ ਇੱਕ ਕਰੇਨ ਦੀ ਲੋੜ ਸੀ ਪਰ ਕਰੇਨ ਦੇਰ ਨਾਲ ਪਹੁੰਚੀ। ਲੋਕਾਂ ਨੇ ਇਸ 'ਤੇ ਆਪਣਾ ਗੁੱਸਾ ਜ਼ਾਹਰ ਕੀਤਾ। ਹਾਲਾਂਕਿ ਕਰੇਨ ਦੇ ਆਉਣ ਤੋਂ ਬਾਅਦ ਵਾਈਡਕਟ ਨੂੰ ਹਟਾ ਦਿੱਤਾ ਗਿਆ। ਇਸ ਤੋਂ ਬਾਅਦ ਕਾਸਿਮ ਦੀ ਲਾਸ਼ ਨੂੰ ਬਾਹਰ ਕੱਢਿਆ ਗਿਆ। ਲੋਕਾਂ ਨੇ ਬੇਂਗਲੁਰੂ ਮੈਟਰੋ ਰੇਲ ਕਾਰਪੋਰੇਸ਼ਨ ਲਿਮਟਿਡ (BMRCL) ਪ੍ਰਤੀ ਆਪਣਾ ਗੁੱਸਾ ਜ਼ਾਹਰ ਕੀਤਾ ਤੇ ਅਧਿਕਾਰੀਆਂ 'ਤੇ ਲਾਪਰਵਾਹੀ ਦਾ ਦੋਸ਼ ਲਗਾਇਆ।

Tragic Accident In Bengaluru Metro Viaduct Falls On Autorickshaw Driver Dies