ਚੰਡੀਗੜ੍ਹ ਦੇ ਇਲਾਂਟੇ ਮਾਲ 'ਚ ਬੰਬ ਦੀ ਧਮਕੀ...ਲਗਭਗ ਇੱਕ ਘੰਟਾ ਚੱਲੀ ਮੌਕ ਡ੍ਰਿਲ

12/01/2026 | Public Times Bureau | Panjab

ਆਉਣ ਵਾਲੇ ਗਣਤੰਤਰ ਦਿਵਸ 2026 ਦੇ ਮੱਦੇਨਜ਼ਰ ਕੇਂਦਰ ਸ਼ਾਸਤ ਪ੍ਰਦੇਸ਼ ਚੰਡੀਗੜ੍ਹ ਵਿੱਚ ਸੁਰੱਖਿਆ ਪ੍ਰਬੰਧ ਹੋਰ ਮਜ਼ਬੂਤ ਕਰ ਦਿੱਤੇ ਗਏ ਹਨ। ਵੱਖ-ਵੱਖ ਸੁਰੱਖਿਆ ਏਜੰਸੀਆਂ ਵਿਚਕਾਰ ਤਾਲਮੇਲ ਨੂੰ ਪਰਖਣ ਅਤੇ ਐਮਰਜੈਂਸੀ ਸਥਿਤੀਆਂ ਨਾਲ ਨਜਿੱਠਣ ਦੀ ਤਿਆਰੀ ਨੂੰ ਯਕੀਨੀ ਬਣਾਉਣ ਲਈ ਚੰਡੀਗੜ੍ਹ ਪੁਲਿਸ ਦੇ ਆਪ੍ਰੇਸ਼ਨ ਸੈੱਲ ਵੱਲੋਂ ਸੋਮਵਾਰ (12 ਜਨਵਰੀ) ਨੂੰ ਇੰਡਸਟਰੀਅਲ ਏਰੀਆ ਫੇਜ਼-1 ਸਥਿਤ ਏਲਾਂਤੇ ਮਾਲ ਵਿੱਚ ਇੱਕ ਵੱਡੀ ਮੌਕ ਡ੍ਰਿਲ ਕੀਤੀ ਗਈ।
ਇਹ ਮੌਕ ਡ੍ਰਿਲ ਐਸਪੀ/ਓਪਰੇਸ਼ਨ ਗੀਤਾਂਜਲੀ ਖੰਡੇਲਵਾਲ (ਆਈਪੀਐਸ) ਦੇ ਨਿਰਦੇਸ਼ਨ ਅਤੇ ਡੀਐਸਪੀ/ਓਪਰੇਸ਼ਨ ਵਿਕਾਸ ਸ਼ਯੋਕੰਦ ਦੀ ਨਿਗਰਾਨੀ ਹੇਠ ਅੰਜ਼ਾਮ ਦਿੱਤੀ ਗਈ। ਇਸ ਦੌਰਾਨ ਚੰਡੀਗੜ੍ਹ ਪ੍ਰਸ਼ਾਸਨ ਦੀਆਂ ਸਾਰੀਆਂ ਐਮਰਜੈਂਸੀ ਸੇਵਾਵਾਂ ਨੇ ਸਰਗਰਮੀ ਨਾਲ ਹਿੱਸਾ ਲਿਆ।
ਅਭਿਆਸ ਦੌਰਾਨ ਆਪ੍ਰੇਸ਼ਨ ਸੈੱਲ ਦੇ ਕਮਾਂਡੋਜ਼ ਵੱਲੋਂ ਏਲਾਂਤੇ ਮਾਲ ਨੂੰ ਘੇਰ ਕੇ ਖਾਲੀ ਕਰਵਾਇਆ ਗਿਆ। ਇਸ ਤੋਂ ਬਾਅਦ ਐਚਆਈਟੀ ਟੀਮਾਂ, ਬੰਬ ਡਿਸਪੋਜ਼ਲ ਸਕੁਐਡ ਅਤੇ ਡੌਗ ਸਕੁਐਡ ਨੇ ਸਾਂਝੇ ਤੌਰ ’ਤੇ ਸਰਚ ਆਪ੍ਰੇਸ਼ਨ ਚਲਾਇਆ। ਤਲਾਸ਼ੀ ਦੌਰਾਨ ਮਾਲ ਦੇ ਸੀਬੀਟੀਐਲ ਐਂਟਰੀ ਪੁਆਇੰਟ ਨੇੜੇ ਇੱਕ ਡਮੀ ਬੰਬ ਬਰਾਮਦ ਕੀਤਾ ਗਿਆ।
ਮੌਕ ਡ੍ਰਿਲ ਵਿੱਚ ਕਵਿਕ ਰਿਐਕਸ਼ਨ ਟੀਮ (ਕਿਊਆਰਟੀ), ਪੀਸੀਆਰ ਵਾਹਨ, ਜੀਐਮਐਸਐਚ-16 ਅਤੇ ਪੁਲਿਸ ਹਸਪਤਾਲ ਸੈਕਟਰ-26 ਦੀਆਂ ਐਂਬੂਲੈਂਸਾਂ, ਡਾਇਲ-112, ਫਾਇਰ ਬ੍ਰਿਗੇਡ, ਸਿਵਲ ਡਿਫੈਂਸ, ਮੋਬਾਈਲ ਫੋਰੈਂਸਿਕ ਟੀਮ, ਡੌਗ ਸਕੁਐਡ, ਬੰਬ ਸਕੁਐਡ ਅਤੇ ਇੰਡਸਟਰੀਅਲ ਏਰੀਆ ਥਾਣੇ ਦੀ ਪੁਲਿਸ ਟੀਮ ਤੁਰੰਤ ਮੌਕੇ ’ਤੇ ਪਹੁੰਚੀ।
ਪੂਰੀ ਤਲਾਸ਼ੀ ਤੋਂ ਬਾਅਦ ਹੋਰ ਕੋਈ ਸ਼ੱਕੀ ਵਸਤੂ ਨਹੀਂ ਮਿਲੀ। ਬਰਾਮਦ ਕੀਤੇ ਗਏ ਡਮੀ ਬੰਬ ਨੂੰ ਰੇਤ ਨਾਲ ਭਰੇ ਵਾਹਨ ਵਿੱਚ ਰੱਖ ਕੇ ਪਾਇਲਟ ਅਤੇ ਐਸਕਾਰਟ ਪੀਸੀਆਰ ਵਾਹਨਾਂ ਦੀ ਸੁਰੱਖਿਆ ਹੇਠ ਸੈਕਟਰ-26 ਪੁਲਿਸ ਲਾਈਨਜ਼ ਦੇ ਖੁੱਲ੍ਹੇ ਮੈਦਾਨ ਵਿੱਚ ਲਿਜਾ ਕੇ ਸੁਰੱਖਿਅਤ ਢੰਗ ਨਾਲ ਨਕਾਰਾ ਕਰ ਦਿੱਤਾ ਗਿਆ।
ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਮੌਕ ਡ੍ਰਿਲ ਦਾ ਮੁੱਖ ਉਦੇਸ਼ ਕਿਸੇ ਵੀ ਸੰਭਾਵਿਤ ਖ਼ਤਰੇ ਦੀ ਸਥਿਤੀ ਵਿੱਚ ਤੁਰੰਤ ਪ੍ਰਤੀਕਿਰਿਆ, ਆਪਸੀ ਤਾਲਮੇਲ ਅਤੇ ਤਿਆਰੀ ਦੀ ਜਾਂਚ ਕਰਨਾ ਸੀ, ਤਾਂ ਜੋ ਅਸਲ ਘਟਨਾ ਦੌਰਾਨ ਜਾਨ-ਮਾਲ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਇਆ ਜਾ ਸਕੇ।

Bomb Threat At Chandigarh s Elante Mall Mock Drill Lasted For About An Hour