“ਡਰਾਈਫਰੂਟ ਘਪਲਾ! 1.25 ਕਰੋੜ ਦੇ ਬਦਾਮ-ਲੌਂਗ ਨਾਲ ਭਰਿਆ ਟਰੱਕ ਲੈ ਕੇ ਡਰਾਈਵਰ ਫ਼ਰਾਰ”

21/01/2026 | Public Times Bureau | Panjab

ਦਿੱਲੀ ਦੀ ਇੱਕ ਟਰਾਂਸਪੋਰਟ ਕੰਪਨੀ ਦਾ ਟਰੱਕ, ਜੋ ਮੁੰਬਈ ਦੇ ਨਵਾਸ਼ੇਵਾ ਪੋਰਟ ਤੋਂ ਇੱਕ ਕਰੋੜ ਰੁਪਏ ਤੋਂ ਵੱਧ ਮੁੱਲ ਦੇ ਡਰਾਈਫਰੂਟ ਲੈ ਕੇ ਰਵਾਨਾ ਹੋਇਆ ਸੀ, ਗੁਰੂਗ੍ਰਾਮ ਦੇ ਬਿਲਾਸਪੁਰ ਥਾਣਾ ਖੇਤਰ ਤੋਂ ਅਚਾਨਕ ਲਾਪਤਾ ਹੋ ਗਿਆ ਹੈ। ਟਰੱਕ ਡਰਾਈਵਰ ਦਾ ਮੋਬਾਈਲ ਫ਼ੋਨ ਵੀ ਸਵਿੱਚ ਆਫ਼ ਆ ਰਿਹਾ ਹੈ।
ਟਰਾਂਸਪੋਰਟ ਕੰਪਨੀ ਦੇ ਮਾਲਕ ਨੇ ਬਿਲਾਸਪੁਰ ਥਾਣੇ ਵਿੱਚ ਟਰੱਕ ਚੋਰੀ ਹੋਣ ਦੀ ਸ਼ਿਕਾਇਤ ਦਰਜ ਕਰਵਾਈ ਹੈ ਅਤੇ ਇਸ ਮਾਮਲੇ ਵਿੱਚ ਟਰੱਕ ਡਰਾਈਵਰ ’ਤੇ ਹੀ ਸ਼ੱਕ ਜਤਾਇਆ ਗਿਆ ਹੈ।
ਦਿੱਲੀ ਦੇ ਸੰਜੇ ਟਰਾਂਸਪੋਰਟ ਨਗਰ ਦੇ ਰਹਿਣ ਵਾਲੇ ਪ੍ਰਵੀਨ ਸੇਠੀ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਟਰੱਕ ਵਿੱਚ ਬਦਾਮ ਦੇ 900 ਬੈਗ ਅਤੇ ਲੌਂਗ ਦੇ 65 ਬੈਗ ਲੱਦੇ ਹੋਏ ਸਨ। ਬਦਾਮ ਦੀ ਕੀਮਤ ਲਗਭਗ 1 ਕਰੋੜ 2 ਲੱਖ 75 ਹਜ਼ਾਰ 560 ਰੁਪਏ ਅਤੇ ਲੌਂਗ ਦੀ ਕੀਮਤ ਲਗਭਗ 23 ਲੱਖ ਰੁਪਏ ਦੱਸੀ ਗਈ ਹੈ।
ਇਹ ਟਰੱਕ 14 ਜਨਵਰੀ ਨੂੰ ਮੁੰਬਈ ਤੋਂ ਕੁੰਡਲੀ ਸਥਿਤ ਗੋਦਾਮ ਲਈ ਰਵਾਨਾ ਹੋਇਆ ਸੀ। ਟਰੱਕ ਨੂੰ ਨੂਹ (ਮੇਵਾਤ) ਦੇ ਪਿੰਡ ਸੇਵਕਾ ਦਾ ਰਹਿਣ ਵਾਲਾ ਰਿਜ਼ਵਾਨ ਚਲਾ ਰਿਹਾ ਸੀ।
ਸ਼ਿਕਾਇਤਕਰਤਾ ਮੁਤਾਬਕ 17 ਜਨਵਰੀ ਨੂੰ ਦੁਪਹਿਰ ਕਰੀਬ 12 ਵਜੇ ਟਰੱਕ ਦੀ ਜੀਪੀਐਸ ਲੋਕੇਸ਼ਨ ਬੰਦ ਹੋ ਗਈ। ਟਰੱਕ ਦੀ ਆਖਰੀ ਲੋਕੇਸ਼ਨ ਜੈਪੁਰ-ਦਿੱਲੀ ਹਾਈਵੇ ’ਤੇ ਬਿਲਾਸਪੁਰ ਦੇ ਬਸੰਤ ਢਾਬੇ ਨੇੜੇ ਮਿਲੀ ਸੀ। ਇਸ ਤੋਂ ਬਾਅਦ ਡਰਾਈਵਰ ਨਾਲ ਕੋਈ ਸੰਪਰਕ ਨਹੀਂ ਹੋ ਸਕਿਆ। ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

dried Fruit Scam Driver Absconds With Truck Loaded With Almonds And Cloves Worth Rs 1 25 Crore