ਬੰਗਾਲ ਚੋਣ ਮਾਹੌਲ ਵਿੱਚ ਆਈਪੀਐਸ ਅਜੈ ਪਾਲ ਸ਼ਰਮਾ ਵਿਵਾਦਾਂ ਦੇ ਘੇਰੇ ‘ਚ, ਨਿਰਪੱਖਤਾ ‘ਤੇ ਉੱਠੇ ਸਵਾਲ

30/04/2026 | Public Times Bureau | Panjab

2026 ਦੀਆਂ ਪੱਛਮੀ ਬੰਗਾਲ ਵਿਧਾਨ ਸਭਾ ਚੋਣਾਂ ਦੇ ਮਾਹੌਲ ਵਿਚਾਲੇ ਲੁਧਿਆਣਾ ਨਾਲ ਸਬੰਧਤ ਆਈਪੀਐਸ ਅਧਿਕਾਰੀ ਅਜੈ ਪਾਲ ਸ਼ਰਮਾ ਰਾਜਨੀਤਿਕ ਚਰਚਾ ਦਾ ਕੇਂਦਰ ਬਣ ਗਏ ਹਨ। ਵਰਤਮਾਨ ਵਿੱਚ ਚੋਣ ਕਮਿਸ਼ਨ ਲਈ ਪੁਲਿਸ ਆਬਜ਼ਰਵਰ ਵਜੋਂ ਤਾਇਨਾਤ ਸ਼ਰਮਾ ਨੂੰ ਲੈ ਕੇ ਇੱਕ ਵਾਇਰਲ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਵਿਵਾਦ ਖੜਾ ਹੋ ਗਿਆ ਹੈ, ਜਿਸ ਵਿੱਚ ਉਹ ਟੀਐਮਸੀ ਨੇਤਾ ਜਹਾਂਗੀਰ ਖਾਨ ਦੇ ਘਰ ਮੌਜੂਦ ਦਿਖਾਈ ਦੇ ਰਹੇ ਹਨ।
ਇਸ ਘਟਨਾ ਤੋਂ ਬਾਅਦ ਵਿਰੋਧੀ ਧਿਰ ਵੱਲੋਂ ਉਨ੍ਹਾਂ ਦੀ ਨਿਰਪੱਖਤਾ ‘ਤੇ ਸਵਾਲ ਉਠਾਏ ਜਾ ਰਹੇ ਹਨ ਅਤੇ ਚੋਣ ਪ੍ਰਕਿਰਿਆ ਦੀ ਪਾਰਦਰਸ਼ਤਾ ਨੂੰ ਲੈ ਕੇ ਵੀ ਚਰਚਾ ਤੇਜ਼ ਹੋ ਗਈ ਹੈ। ਹਾਲਾਂਕਿ, ਇਸ ਮਾਮਲੇ ਬਾਰੇ ਅਧਿਕਾਰਤ ਜਾਂਚ ਅਤੇ ਸਪੱਸ਼ਟੀਕਰਨ ਦੀ ਪ੍ਰਕਿਰਿਆ ਹਜੇ ਜਾਰੀ ਹੈ ਅਤੇ ਕਿਸੇ ਨਤੀਜੇ ‘ਤੇ ਨਹੀਂ ਪਹੁੰਚਿਆ ਗਿਆ।
ਲੁਧਿਆਣਾ ਦੇ ਵਿਕਾਸ ਨਗਰ ਨਾਲ ਸਬੰਧਤ ਅਜੈ ਪਾਲ ਸ਼ਰਮਾ ਨੂੰ ਇਮਾਨਦਾਰ ਅਤੇ ਕੜੇ ਅਨੁਸ਼ਾਸਨ ਵਾਲੇ ਅਧਿਕਾਰੀ ਵਜੋਂ ਜਾਣਿਆ ਜਾਂਦਾ ਹੈ। ਉਹ ਉੱਤਰ ਪ੍ਰਦੇਸ਼ ਕੇਡਰ ਦੇ 2011 ਬੈਚ ਦੇ ਆਈਪੀਐਸ ਅਧਿਕਾਰੀ ਹਨ ਅਤੇ ਉਨ੍ਹਾਂ ਨੂੰ “ਸਿੰਘਮ” ਅਤੇ “ਡਾਕਟਰ ਕਾਪ” ਦੇ ਨਾਂ ਨਾਲ ਵੀ ਜਾਣਿਆ ਜਾਂਦਾ ਹੈ।
ਉਨ੍ਹਾਂ ਦੀ ਸਿੱਖਿਆ ਆਰਐਸ ਮਾਡਲ ਸਕੂਲ, ਸ਼ਾਸਤਰੀ ਨਗਰ ਤੋਂ ਹੋਈ ਅਤੇ ਪਰਿਵਾਰਕ ਪਿਛੋਕੜ ਵੀ ਸਿੱਖਿਆ ਨਾਲ ਜੁੜਿਆ ਰਿਹਾ ਹੈ। ਉਨ੍ਹਾਂ ਦੇ ਪਿਤਾ ਅਮਰਜੀਤ ਸ਼ਰਮਾ ਸਰਕਾਰੀ ਸਕੂਲ ਵਿੱਚ ਲੈਕਚਰਾਰ ਰਹੇ ਹਨ, ਜਦਕਿ ਮਾਤਾ ਪ੍ਰੇਮ ਸ਼ਰਮਾ ਨੇ ਘਰ ਦੀ ਜ਼ਿੰਮੇਵਾਰੀ ਸੰਭਾਲਦਿਆਂ ਬੱਚਿਆਂ ਦੀ ਪੜ੍ਹਾਈ ‘ਤੇ ਵਿਸ਼ੇਸ਼ ਧਿਆਨ ਦਿੱਤਾ।
ਸ਼ਰਮਾ ਦੇ ਛੋਟੇ ਭਰਾ ਅਮਿਤ ਪਾਲ ਸ਼ਰਮਾ ਵੀ ਆਈਏਐਸ ਅਧਿਕਾਰੀ ਹਨ। ਦੋਵੇਂ ਭਰਾਵਾਂ ਨੇ ਪਹਿਲਾਂ ਡਾਕਟਰੀ ਦੀ ਪੜ੍ਹਾਈ ਕੀਤੀ ਅਤੇ ਬਾਅਦ ਵਿੱਚ ਸਿਵਲ ਸੇਵਾਵਾਂ ਵੱਲ ਰੁਖ ਕੀਤਾ।
ਵਿਵਾਦ ਦੇ ਵਿਚਕਾਰ ਵੀ ਲੁਧਿਆਣਾ ਵਿੱਚ ਮਿਲੀ-ਜੁਲੀ ਪ੍ਰਤੀਕਿਰਿਆ ਸਾਹਮਣੇ ਆ ਰਹੀ ਹੈ। ਸਥਾਨਕ ਲੋਕ ਇੱਕ ਪਾਸੇ ਉਨ੍ਹਾਂ ਦੀਆਂ ਪ੍ਰਾਪਤੀਆਂ ‘ਤੇ ਮਾਣ ਜਤਾਉਂਦੇ ਹਨ, ਜਦਕਿ ਦੂਜੇ ਪਾਸੇ ਉਠ ਰਹੇ ਸਵਾਲਾਂ ਕਾਰਨ ਚਿੰਤਾ ਵੀ ਜ਼ਾਹਰ ਕਰ ਰਹੇ ਹਨ। ਇਸ ਸਮੇਂ ਸਾਰੀ ਨਜ਼ਰ ਜਾਂਚ ਦੇ ਨਤੀਜਿਆਂ ਅਤੇ ਅਧਿਕਾਰਤ ਸਪੱਸ਼ਟੀਕਰਨ ‘ਤੇ ਟਿਕੀ ਹੋਈ ਹੈ।

Ips Ajay Pal Sharma In The Crosshairs Of Controversies In Bengal Election Atmosphere Questions Raised On Impartiality