PGI ਨਿਊ OPD ਕੈਂਟੀਨ 'ਤੇ ਵੱਧ ਵਸੂਲੀ ਦੇ ਦੋਸ਼, ਨਿਯਮਾਂ ਦੀ ਉਲੰਘਣਾ ਦਾ ਇਲਜ਼ਾਮ

20/07/2026 | Public Times Bureau | Panjab

ਪੀਜੀਆਈ ਦੀ ਨਿਊ ਓਪੀਡੀ ਕੈਂਟੀਨ ਵਿੱਚ ਖਾਣ-ਪੀਣ ਵਾਲੀਆਂ ਵਸਤਾਂ ਦੀਆਂ ਵੱਧ ਕੀਮਤਾਂ ਵਸੂਲਣ ਅਤੇ ਟੈਂਡਰ ਦੀਆਂ ਸ਼ਰਤਾਂ ਦੀ ਉਲੰਘਣਾ ਕਰਨ ਦੇ ਦੋਸ਼ ਸਾਹਮਣੇ ਆਏ ਹਨ। ਜਾਂਚ ਦੌਰਾਨ ਪਤਾ ਲੱਗਾ ਕਿ ਕੈਂਟੀਨ ਸੰਚਾਲਕ ਵੱਲੋਂ ਕਈ ਵਸਤਾਂ ਨਿਰਧਾਰਤ ਦਰਾਂ ਤੋਂ ਵੱਧ ਕੀਮਤ 'ਤੇ ਵੇਚੀਆਂ ਜਾ ਰਹੀਆਂ ਹਨ। ਟੈਂਡਰ ਅਨੁਸਾਰ ਸਾਂਬਰ-ਵੜਾ ਅਤੇ ਇਡਲੀ ਦੀ ਕੀਮਤ 40 ਰੁਪਏ ਤੈਅ ਹੈ, ਪਰ ਕੈਂਟੀਨ ਵਿੱਚ ਇਸ ਦੀ ਥਾਂ ਡੋਸਾ ਵੇਚਿਆ ਜਾ ਰਿਹਾ ਹੈ, ਜਿਸ ਲਈ 80 ਰੁਪਏ ਲਏ ਜਾ ਰਹੇ ਹਨ। ਇਸੇ ਤਰ੍ਹਾਂ 60 ਰੁਪਏ ਦੀ ਨਿਰਧਾਰਤ ਥਾਲੀ 80 ਰੁਪਏ ਵਿੱਚ ਵੇਚਣ ਦਾ ਮਾਮਲਾ ਸਾਹਮਣੇ ਆਇਆ ਹੈ।
ਸੈਂਡਵਿਚ, ਪਰੌਂਠਾ ਅਤੇ ਹੋਰ ਖਾਣ-ਪੀਣ ਦੀਆਂ ਵਸਤਾਂ 'ਤੇ ਵੀ ਵੱਧ ਰਕਮ ਵਸੂਲਣ ਦੇ ਦੋਸ਼ ਹਨ। ਟੈਂਡਰ ਵਿੱਚ ਸ਼ਾਮਲ ਕਈ ਵਸਤਾਂ ਜਿਵੇਂ ਸਮੋਸਾ, ਪੈਟੀ, ਬ੍ਰੈੱਡ ਪਕੌੜਾ, ਵੇਸਣ ਬਰਫ਼ੀ, ਗੁਲਾਬ ਜਾਮੁਨ, ਚਨਾ-ਕੁਲਚਾ, ਮੱਠੀ, ਦੁੱਧ, ਬਰਗਰ ਅਤੇ ਹੌਟ ਡੌਗ ਕੈਂਟੀਨ ਵਿੱਚ ਉਪਲਬਧ ਨਹੀਂ ਹਨ। ਦੋਸ਼ ਹੈ ਕਿ ਘੱਟ ਮੁਨਾਫ਼ੇ ਵਾਲੀਆਂ ਵਸਤਾਂ ਵੇਚਣ ਤੋਂ ਸੰਚਾਲਕ ਬਚ ਰਿਹਾ ਹੈ। ਇਸ ਤੋਂ ਇਲਾਵਾ ਨਿਊ ਓਪੀਡੀ ਕੈਂਟੀਨ ਦੇ ਨਾਲ ਨਾਜਾਇਜ਼ ਤੌਰ 'ਤੇ ਜੂਸ ਸਟਾਲ ਚਲਾਉਣ ਦਾ ਮਾਮਲਾ ਵੀ ਸਾਹਮਣੇ ਆਇਆ ਹੈ। ਟੈਂਡਰ ਦੀਆਂ ਸ਼ਰਤਾਂ ਮੁਤਾਬਕ ਕੇਵਲ ਪੈਕਡ ਜੂਸ ਵੇਚਿਆ ਜਾ ਸਕਦਾ ਹੈ।
ਜਦਕਿ ਇੱਥੇ ਤਾਜ਼ਾ ਜੂਸ ਤਿਆਰ ਕਰਕੇ ਵੇਚਣ ਦਾ ਦੋਸ਼ ਹੈ। ਪੀਜੀਆਈ ਨਿਊ ਓਪੀਡੀ ਵਿੱਚ ਰੋਜ਼ਾਨਾ ਵੱਡੀ ਗਿਣਤੀ ਵਿੱਚ ਮਰੀਜ਼ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਪਹੁੰਚਦੇ ਹਨ। ਮਰੀਜ਼ਾਂ ਅਤੇ ਤੀਮਾਰਦਾਰਾਂ ਨੇ ਪ੍ਰਸ਼ਾਸਨ ਤੋਂ ਮਾਮਲੇ ਦੀ ਜਾਂਚ ਕਰਕੇ ਕਾਰਵਾਈ ਕਰਨ ਅਤੇ ਟੈਂਡਰ ਦੀਆਂ ਸ਼ਰਤਾਂ ਅਨੁਸਾਰ ਵਸਤਾਂ ਮੁਹੱਈਆ ਕਰਵਾਉਣ ਦੀ ਮੰਗ ਕੀਤੀ ਹੈ। ਪੀਜੀਆਈ ਦੇ ਡਿਪਟੀ ਡਾਇਰੈਕਟਰ ਪੰਕਜ ਰਾਏ ਨੇ ਕਿਹਾ ਕਿ ਨਿਯਮਾਂ ਅਨੁਸਾਰ ਕੈਂਟੀਨ ਸੰਚਾਲਕ ਖ਼ਿਲਾਫ਼ ਯੋਗ ਕਾਰਵਾਈ ਕੀਤੀ ਜਾਵੇਗੀ।

Allegations Of Overcharging And Rule Violations At The Pgi New Opd Canteen