ਕਰਨ ਔਜਲਾ ਦੇ ਆਸਟ੍ਰੇਲੀਆ ਟੂਰ ਨੂੰ ਵੀਜ਼ੇ ਦਾ ਅੜਿੱਕਾ, ਪਰਥ ਸ਼ੋਅ 24 ਅਗਸਤ ਤੱਕ ਮੁਲਤਵੀ

12/08/2026 | Public Times Bureau | Panjab

ਪੰਜਾਬੀ ਗਾਇਕ ਕਰਨ ਔਜਲਾ ਦੇ ਆਸਟ੍ਰੇਲੀਆ ਟੂਰ ਨੂੰ ਵੀਜ਼ਾ ਮਨਜ਼ੂਰੀ ਵਿੱਚ ਦੇਰੀ ਕਾਰਨ ਝਟਕਾ ਲੱਗਾ ਹੈ। 13 ਅਗਸਤ ਨੂੰ ਪਰਥ ਵਿੱਚ ਹੋਣ ਵਾਲਾ ਉਨ੍ਹਾਂ ਦਾ ਸੰਗੀਤਕ ਸ਼ੋਅ ਹੁਣ 24 ਅਗਸਤ ਤੱਕ ਮੁਲਤਵੀ ਕਰ ਦਿੱਤਾ ਗਿਆ ਹੈ। ਔਜਲਾ ਨੇ ਇੰਸਟਾਗ੍ਰਾਮ ਸਟੋਰੀ ਰਾਹੀਂ ਪ੍ਰਸ਼ੰਸਕਾਂ ਨੂੰ ਇਸ ਦੀ ਜਾਣਕਾਰੀ ਦਿੱਤੀ। ਸਥਾਨਕ ਮੀਡੀਆ ਰਿਪੋਰਟਾਂ ਮੁਤਾਬਕ ਵੀਜ਼ਾ ਪ੍ਰਕਿਰਿਆ ਵਿੱਚ ਦੇਰੀ ਪਛਾਣ ਸਬੰਧੀ ਉਲਝਣ ਕਾਰਨ ਹੋਣ ਦੀ ਗੱਲ ਸਾਹਮਣੇ ਆਈ ਹੈ। ਕਰਨ ਔਜਲਾ ਦਾ ਪੂਰਾ ਨਾਮ ਜਸਕਰਨ ਸਿੰਘ ਔਜਲਾ ਹੈ, ਜਦਕਿ ਕੈਨੇਡਾ ਵਿੱਚ ਮਈ 2024 ਦੌਰਾਨ ਕਥਿਤ ਅਪਰਾਧਿਕ ਮਾਮਲੇ ਵਿੱਚ ਗ੍ਰਿਫ਼ਤਾਰ ਇੱਕ ਹੋਰ ਵਿਅਕਤੀ ਦਾ ਨਾਮ ਵੀ ਜਸਕਰਨ ਸਿੰਘ ਦੱਸਿਆ ਗਿਆ ਹੈ। ਰਿਪੋਰਟ ਮੁਤਾਬਕ ਇਸੇ ਨਾਮ ਦੀ ਸਮਾਨਤਾ ਕਾਰਨ ਆਸਟ੍ਰੇਲੀਆਈ ਇਮੀਗ੍ਰੇਸ਼ਨ ਅਧਿਕਾਰੀਆਂ ਵੱਲੋਂ ਵਾਧੂ ਜਾਂਚ ਕੀਤੀ ਜਾ ਰਹੀ ਹੈ।

ਔਜਲਾ ਤੋਂ ਵਾਧੂ ਜਾਣਕਾਰੀ ਅਤੇ ਦਸਤਾਵੇਜ਼ ਮੰਗੇ ਜਾਣ ਦੀ ਗੱਲ ਵੀ ਸਾਹਮਣੇ ਆਈ ਹੈ। ਹਾਲਾਂਕਿ, ਗਾਇਕ ਅਤੇ ਕੈਨੇਡਾ ਵਿੱਚ ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀ ਵਿਚਕਾਰ ਕਿਸੇ ਸਿੱਧੇ ਸਬੰਧ ਦੀ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ। ਕਰਨ ਔਜਲਾ 2024 ਵਿੱਚ ਵੀ ਆਸਟ੍ਰੇਲੀਆ ਦਾ ਦੌਰਾ ਕਰ ਚੁੱਕੇ ਹਨ। ਇਸ ਦੌਰਾਨ ਉਨ੍ਹਾਂ ਨੂੰ ਵੀਜ਼ਾ ਮਿਲਿਆ ਸੀ। ਹੁਣ 16 ਅਗਸਤ ਦੇ ਐਡੀਲੇਡ ਸ਼ੋਅ ਤੋਂ ਇਲਾਵਾ 18 ਅਤੇ 19 ਅਗਸਤ ਨੂੰ ਮੈਲਬੌਰਨ ਦੇ ਰੋਡ ਲੇਵਰ ਐਰੀਨਾ ਵਿੱਚ ਹੋਣ ਵਾਲੇ ਸ਼ੋਅ ’ਤੇ ਵੀ ਨਜ਼ਰ ਹੈ। ਫਿਲਹਾਲ ਪਰਥ ਦਾ ਸ਼ੋਅ ਰੱਦ ਨਹੀਂ ਕੀਤਾ ਗਿਆ, ਸਗੋਂ 24 ਅਗਸਤ ਲਈ ਮੁੜ ਤੈਅ ਕੀਤਾ ਗਿਆ ਹੈ। ਔਜਲਾ ਨੇ ਵੀਜ਼ਾ ਮਾਮਲਾ ਜਲਦ ਹੱਲ ਹੋਣ ਦੀ ਉਮੀਦ ਜਤਾਈ ਹੈ।

Visa Hurdle For Karan Aujla s Australia Tour Perth Show Postponed To August 24