ਜ਼ੀਰਕਪੁਰ ਦੇ ਫਲੈਟ ਮਾਮਲੇ ’ਚ ਰੇਰਾ ਦਾ ਵੱਡਾ ਹੁਕਮ, ਬਿਲਡਰ ਨੂੰ 22.20 ਲੱਖ ਰੁਪਏ ਵਾਪਸ ਕਰਨ ਦੇ ਨਿਰਦੇਸ਼

07/10/2026 | Public Times Bureau | Panjab

ਕਿਸ਼ਨਪੁਰਾ ਸਥਿਤ ਰਾਇਲ ਐਮਪਾਇਰ (ਰਾਇਲ ਮਿਨਾਰ) ਪ੍ਰਾਜੈਕਟ ਵਿੱਚ ਫਲੈਟ ਬੁੱਕ ਕਰਵਾਉਣ ਦੇ ਬਾਵਜੂਦ ਕਬਜ਼ਾ ਨਾ ਮਿਲਣ ਦੇ ਮਾਮਲੇ ਵਿੱਚ ਪੰਜਾਬ ਰੇਰਾ ਨੇ ਸ਼ਿਕਾਇਤਕਰਤਾ ਦੇ ਹੱਕ ਵਿੱਚ ਫ਼ੈਸਲਾ ਸੁਣਾਇਆ ਹੈ। ਅਥਾਰਟੀ ਨੇ ਬਿਲਡਰ ਨੂੰ 22.20 ਲੱਖ ਰੁਪਏ ਵਾਪਸ ਕਰਨ ਅਤੇ ਇਸ ’ਤੇ ਨਿਯਮਾਂ ਅਨੁਸਾਰ ਵਿਆਜ ਦੇਣ ਦੇ ਹੁਕਮ ਦਿੱਤੇ ਹਨ।

ਸ਼ਿਕਾਇਤਕਰਤਾ ਨੇ 2011 ਵਿੱਚ 35 ਲੱਖ ਰੁਪਏ ਵਿੱਚ ਫਲੈਟ ਬੁੱਕ ਕਰਵਾਇਆ ਸੀ ਅਤੇ ਬਿਲਡਰ ਨੂੰ 22.20 ਲੱਖ ਰੁਪਏ ਅਦਾ ਕੀਤੇ ਸਨ। ਸਮਝੌਤੇ ਮੁਤਾਬਕ 21 ਤੋਂ 24 ਮਹੀਨਿਆਂ ਵਿੱਚ ਕਬਜ਼ਾ ਮਿਲਣਾ ਸੀ, ਪਰ ਕਬਜ਼ਾ ਨਹੀਂ ਦਿੱਤਾ ਗਿਆ ਅਤੇ ਰਕਮ ਵੀ ਵਾਪਸ ਨਹੀਂ ਕੀਤੀ ਗਈ।

ਸੁਣਵਾਈ ਦੌਰਾਨ ਬਿਲਡਰ ਪੇਸ਼ ਨਾ ਹੋਣ ਕਾਰਨ ਉਸ ਨੂੰ ਐਕਸ-ਪਾਰਟੀ ਕਰ ਦਿੱਤਾ ਗਿਆ। ਰੇਰਾ ਨੇ ਦਸਤਾਵੇਜ਼ਾਂ ਦੇ ਆਧਾਰ ’ਤੇ ਮਾਮਲੇ ਦੀ ਜਾਂਚ ਕੀਤੀ। ਰਿਕਾਰਡ ਮੁਤਾਬਕ ਮਈ 2022 ਵਿੱਚ ਪ੍ਰਾਜੈਕਟ ਦੀ ਜ਼ਮੀਨ ਤੀਜੀ ਧਿਰ ਨੂੰ ਟਰਾਂਸਫਰ ਕਰ ਦਿੱਤੀ ਗਈ ਸੀ, ਜਦਕਿ ਬਾਅਦ ਵਿੱਚ ਇਸੇ ਜ਼ਮੀਨ ’ਤੇ ਵਪਾਰਕ ਪ੍ਰਾਜੈਕਟ ਲਈ ਮਨਜ਼ੂਰੀ ਲਈ ਗਈ।

ਰੇਰਾ ਨੇ ਕਿਹਾ ਕਿ ਰਿਹਾਇਸ਼ੀ ਪ੍ਰਾਜੈਕਟ ਪੂਰਾ ਨਾ ਹੋਣ ਅਤੇ ਕਬਜ਼ਾ ਨਾ ਮਿਲਣ ਕਾਰਨ ਸ਼ਿਕਾਇਤਕਰਤਾ ਨੂੰ ਰਿਫੰਡ ਲੈਣ ਦਾ ਅਧਿਕਾਰ ਹੈ। ਬਿਲਡਰ ਨੂੰ ਹੁਕਮ ਦੀ ਤਾਰੀਖ ਤੋਂ 90 ਦਿਨਾਂ ਅੰਦਰ ਮੂਲ ਰਕਮ ਅਤੇ ਨਿਰਧਾਰਤ ਵਿਆਜ ਅਦਾ ਕਰਨਾ ਹੋਵੇਗਾ।

Major Rera Order In Zirakpur Flat Case Builder Directed To Refund 22 20 Lakh