ਸੀਮਤ ਜੰਗਬੰਦੀ ਦੌਰਾਨ ਰੂਸ ਨੇ ਯੂਕਰੇਨ ’ਤੇ ਕੀਤਾ ਹਮਲਾ, ਸੱਤ ਮੌਤਾਂ; ਯੂਕਰੇਨੀ ਹਵਾਈ ਫ਼ੌਜ ਦਾ ਦਾਅਵਾ, ਰੂਸ ਨੇ ਭੇਜੇ ਸਨ 179 ਡ੍ਰੋਨ

23/03/2025 | Public Times Bureau | Ukrain

ਯੂਕਰੇਨੀ ਅਧਿਕਾਰੀਆਂ ਨੇ ਕਿਹਾ ਕਿ ਸੀਮਿਤ ਜੰਗਬੰਦੀ ’ਤੇ ਸਹਿਮਤੀ ਦੇ ਬਾਵਜੂਦ ਰੂਸ ਨੇ ਯੂਕਰੇਨੀ ਸ਼ਹਿਰ ਜੋਪੋਰੀਜੀਆ ’ਤੇ ਡ੍ਰੋਨ ਹਮਲੇ ਕੀਤੇ ਜਿਸ ’ਚ ਤਿੰਨ ਵਿਅਕਤੀਆਂ ਦੀ ਮੌਤ ਹੋ ਗਈ ਤੇ 12 ਜ਼ਖ਼ਮੀ ਹੋ ਗਏ। ਮਾਰੇ ਗਏ ਤਿੰਨੇ ਜਣੇ ਇੱਕੋ ਪਰਿਵਾਰ ਦੇ ਸਨ। ਇਸ ਦੇ ਨਾਲ ਹੀ ਦੇਸ਼ ਦੇ ਉੱਤਰ ਤੇ ਪੂਰਬ ’ਚ ਚਾਰ ਲੋਕ ਹੋਰ ਮਾਰੇ ਗਏ। ਜੋਪੋਰੀਜੀਆ ’ਤੇ 12 ਡ੍ਰੋਨਾਂ ਨਾਲ ਹਮਲਾ ਕੀਤਾ ਗਿਆ। ਹਾਲਾਂਕਿ ਕੁੱਲ 179 ਹੋਰ ਯੂਕਰੇਨ ਵੱਲ ਭੇਜੇ ਗਏ ਸਨ। ਖੇਤਰੀ ਮੁਖੀ ਇਵਾਨ ਫੇਡੋਰੋਵ ਨੇ ਕਿਹਾ ਕਿ ਸ਼ੁੱਕਰਵਾਰ ਰਾਤ ਦੇ ਹਮਲੇ ’ਚ ਇਮਾਰਤਾਂ ਤੇ ਕਾਰਾਂ ਵਿਚ ਅੱਗ ਲੱਗ ਗਈ। ਐਮਰਜੈਂਸੀ ਸੇਵਾ ਦੇ ਮੁਲਾਜ਼ਮ ਮਲਬੇ ’ਚੋਂ ਜ਼ਿੰਦਾ ਲੋਕਾਂ ਦੀ ਭਾਲ ਕਰ ਰਹੇ ਸਨ। ਯੂਕਰੇਨ ਤੇ ਰੂਸ ਨੇ ਬੁੱਧਵਾਰ ਨੂੰ ਸਿਧਾਂਤਕ ਤੌਰ ’ਤੇ ਸੀਮਿਤ ਜੰਗਬੰਦੀ ’ਤੇ ਸਹਿਮਤੀ ਪ੍ਰਗਟਾਈ ਸੀ, ਜਦੋਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਉਨ੍ਹਾਂ ਨਾਲ ਗੱਲ ਕੀਤੀ ਸੀ। ਤਿੰਨੇ ਧਿਰਾਂ ਇਸ ਗੱਲ ’ਤੇ ਬਿਲਕੁਲ ਅਲੱਗ-ਅਲੱਗ ਦਿਖਾਈ ਦਿੱਤੀਆਂ ਕਿ ਇਸ ਸਮਝੌਤੇ ’ਚ ਕੀ ਸ਼ਾਮਲ ਹੈ, ਜਦਕਿ ਵ੍ਹਾਈਟ ਹਾਊਸ ਨੇ ਕਿਹਾ ਕਿ ਊਰਜਾ ਤੇ ਬੁਨਿਆਦੀ ਢਾਂਚਾ ਸਮਝੌਤੇ ਦਾ ਹਿੱਸਾ ਹੋਵੇਗਾ।

ਕ੍ਰੈਮਲਿਨ ਨੇ ਐਲਾਨ ਕੀਤਾ ਕਿ ਸਮਝੌਤੇ ’ਚ ਊਰਜਾ ਬੁਨਿਆਦੀ ਢਾਂਚੇ ਨੂੰ ਜ਼ਿਆਦਾ ਸੀਮਿਤ ਤੌਰ ’ਤੇ ਦਰਸਾਇਆ ਗਿਆ ਹੈ। ਯੂਕਰੇਨੀ ਰਾਸ਼ਟਰਪਤੀ ਵਲੋਦੋਮੀਰ ਜ਼ੇਲੈਂਸਕੀ ਨੇ ਕਿਹਾ ਕਿ ਉਹ ਰੇਲਵੇ ਤੇ ਬੰਦਰਗਾਹਾਂ ਦੀ ਵੀ ਸੁਰੱਖਿਆ ਕਰਨਾ ਚਾਹੁੰਦੇ ਹਨ। ਯੂਕਰੇਨੀ ਹਵਾਈ ਫ਼ੌਜ ਨੇ ਕਿਹਾ ਕਿ ਰੂਸ ਨੇ ਸ਼ਨਿਚਰਵਾਰ ਰਾਤ ਤੱਕ 179 ਡ੍ਰੋਨ ਭੇਜੇ। ਇਨ੍ਹਾਂ ’ਚੋਂ 100 ਨੂੰ ਰੋਕ ਲਿਆ ਗਿਆ ਤੇ 63 ਹੋਰ ਸੰਭਾਵਤ ਤੌਰ ’ਤੇ ਇਲੈਕਟ੍ਰਾਨਿਕ ਤਰੀਕੇ ਨਾਲ ਜਾਮ ਹੋ ਗਏ। ਕੀਵ ਤੇ ਨਿਪ੍ਰਾਪੇਟ੍ਰੋਵਸਕ ਖੇਤਰਾਂ ਦੇ ਅਧਿਕਾਰੀਆਂ ਨੇ ਵੀ ਰੋਕੇ ਗਏ ਡ੍ਰੋਨਾਂ ਤੋਂ ਡਿੱਗਦੇ ਮਲਬੇ ਕਾਰਨ ਅੱਗ ਲੱਗਣ ਦੀ ਸੂਚਨਾ ਦਿੱਤੀ। ਇਸ ਦੌਰਾਨ ਰੂਸ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਉਸ ਦੀਆਂ ਹਵਾਈ ਰੱਖਿਆ ਪ੍ਰਣਾਲੀਆਂ ਨੇ 47 ਯੂਕਰੇਨੀ ਡ੍ਰੋਨ ਡੇਗ ਲਏ। ਇਸ ਦੌਰਾਨ ਜ਼ੇਲੈਂਸਕੀ ਨੇ ਸ਼ਨਿਚਰਵਾਰ ਨੂੰ ਯੂਕਰੇਨ ਦੇ ਦੋਨੇਤਸਕ ਖੇਤਰ ਦਾ ਦੌਰਾ ਕੀਤਾ, ਜਿੱਥੇ ਉਨ੍ਹਾਂ ਨੇ ਪੋਕਰੋਵਸਕ ਨੇੜੇ ਡ੍ਰੋਨ ਯੂਨਿਟਾਂ ਦੇ ਕਮਾਂਡਰਾਂ ਨਾਲ ਮੁਲਾਕਾਤ ਕੀਤੀ।

Russia Attacks Ukraine During Limited Ceasefire Seven Killed Ukrainian Air Force Claims Russia Sent 179 Drones