ਦਿੱਲੀ ’ਚ ਖਤਰਨਾਕ ਇਮਾਰਤਾਂ ਦੇ ਸਰਵੇਖਣ ’ਤੇ ਸਵਾਲ, 30.7 ਲੱਖ ਇਮਾਰਤਾਂ ’ਚੋਂ ਸਿਰਫ਼ 62 ਨੂੰ ਐਲਾਨਿਆ ਖਤਰਨਾਕ

08/09/2026 | Public Times Bureau | National

ਦਿੱਲੀ ਵਿੱਚ ਹਰ ਸਾਲ ਮਾਨਸੂਨ ਤੋਂ ਪਹਿਲਾਂ ਖਤਰਨਾਕ ਅਤੇ ਖੰਡਰ ਇਮਾਰਤਾਂ ਦੀ ਪਛਾਣ ਲਈ ਕੀਤੇ ਜਾਂਦੇ ਸਰਵੇਖਣ ਦੇ ਬਾਵਜੂਦ ਇਨ੍ਹਾਂ ਇਮਾਰਤਾਂ ਖ਼ਿਲਾਫ਼ ਸਮੇਂ ਸਿਰ ਕਾਰਵਾਈ ਨਾ ਹੋਣ ਕਾਰਨ ਨਗਰ ਨਿਗਮ ਦੀ ਕਾਰਗੁਜ਼ਾਰੀ ’ਤੇ ਸਵਾਲ ਉੱਠ ਰਹੇ ਹਨ। ਇਸ ਸਾਲ ਕਰੀਬ 30.7 ਲੱਖ ਇਮਾਰਤਾਂ ਦੇ ਸਰਵੇਖਣ ਵਿੱਚ ਸਿਰਫ਼ 62 ਇਮਾਰਤਾਂ ਨੂੰ ਖਤਰਨਾਕ ਐਲਾਨਿਆ ਗਿਆ। ਇਨ੍ਹਾਂ ਵਿੱਚੋਂ ਕਰੋਲ ਬਾਗ ਜ਼ੋਨ ਵਿੱਚ ਸਭ ਤੋਂ ਵੱਧ 19 ਖਤਰਨਾਕ ਇਮਾਰਤਾਂ ਦੀ ਪਛਾਣ ਹੋਈ। ਇਸ ਤੋਂ ਇਲਾਵਾ ਪੱਛਮੀ ਜ਼ੋਨ ਵਿੱਚ 9, ਕੇਂਦਰੀ ਜ਼ੋਨ ਵਿੱਚ 8, ਸ਼ਹਿਰ-ਸਦਰ ਪਹਾੜਗੰਜ ਵਿੱਚ 5 ਅਤੇ ਦੱਖਣੀ ਜ਼ੋਨ ਵਿੱਚ 4 ਇਮਾਰਤਾਂ ਨੂੰ ਖਤਰਨਾਕ ਕਰਾਰ ਦਿੱਤਾ ਗਿਆ। ਦੂਜੇ ਪਾਸੇ ਸ਼ਾਹਦਰਾ ਉੱਤਰੀ, ਸ਼ਾਹਦਰਾ ਦੱਖਣੀ ਅਤੇ ਸਿਵਲ ਲਾਈਨਜ਼ ਜ਼ੋਨਾਂ ਵਿੱਚ ਸਰਵੇਖਣ ਦੌਰਾਨ ਇੱਕ ਵੀ ਇਮਾਰਤ ਖਤਰਨਾਕ ਨਹੀਂ ਮਿਲੀ। ਹਾਲਾਂਕਿ ਇਨ੍ਹਾਂ ਖੇਤਰਾਂ ਵਿੱਚ ਵੀ ਇਮਾਰਤਾਂ ਡਿੱਗਣ ਦੀਆਂ ਘਟਨਾਵਾਂ ਸਾਹਮਣੇ ਆ ਚੁੱਕੀਆਂ ਹਨ।

ਮਾਮਲੇ ਦੀ ਗੰਭੀਰਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਗੱਫਾਰ ਮਾਰਕੀਟ ਵਿੱਚ ਇੱਕ ਇਮਾਰਤ ਨੂੰ 2021 ਵਿੱਚ ਆਈਆਈਟੀ ਰੁੜਕੀ ਦੀ ਰਿਪੋਰਟ ਦੇ ਆਧਾਰ ’ਤੇ ਐਮਸੀਡੀ ਵੱਲੋਂ ਖੰਡਰ ਐਲਾਨਿਆ ਗਿਆ ਸੀ। ਇਸ ਦੇ ਬਾਵਜੂਦ ਇਮਾਰਤ ਵਿੱਚ ਅਜੇ ਵੀ ਹਜ਼ਾਰਾਂ ਦੁਕਾਨਾਂ ਚੱਲ ਰਹੀਆਂ ਹਨ ਅਤੇ ਇਸ ਖ਼ਿਲਾਫ਼ ਪ੍ਰਭਾਵਸ਼ਾਲੀ ਕਾਰਵਾਈ ਨਹੀਂ ਹੋਈ। ਇਸੇ ਤਰ੍ਹਾਂ ਰੋਹਿਣੀ ਸੈਕਟਰ-15 ਦੇ ਕ੍ਰਿਸ਼ਨਾ ਕੁੰਜ ਵਿੱਚ ਮਕਾਨ ਨੰਬਰ 18 ਨੂੰ ਕਰੀਬ ਚਾਰ ਸਾਲ ਪਹਿਲਾਂ ਖੰਡਰ ਐਲਾਨਿਆ ਗਿਆ ਸੀ। ਇਮਾਰਤ ਦੇ ਆਲੇ-ਦੁਆਲੇ ਬੈਰੀਕੇਡ ਲਗਾ ਕੇ ਅਤੇ ਇਸ ਨੂੰ ਖ਼ਤਰਨਾਕ ਖੇਤਰ ਵਜੋਂ ਚਿੰਨ੍ਹਿਤ ਕਰਕੇ ਕਾਰਵਾਈ ਪੂਰੀ ਕਰ ਦਿੱਤੀ ਗਈ, ਪਰ ਸਥਾਈ ਹੱਲ ਨਹੀਂ ਕੀਤਾ ਗਿਆ।

ਖਸਤਾ ਇਮਾਰਤਾਂ ਦੀ ਸਮੱਸਿਆ ਐਮਸੀਡੀ ਦੀ ਆਪਣੀ ਇਮਾਰਤ ਤੱਕ ਵੀ ਪਹੁੰਚ ਚੁੱਕੀ ਹੈ। ਪੁਰਾਣੀ ਦਿੱਲੀ ਸਥਿਤ ਐਮਸੀਡੀ ਦੇ ਜ਼ੋਨਲ ਦਫ਼ਤਰ ਦੀ ਇਮਾਰਤ ਦੀ ਹਾਲਤ ਵੀ ਖਰਾਬ ਦੱਸੀ ਜਾ ਰਹੀ ਹੈ। ਕੰਧਾਂ ਤੋਂ ਥਾਂ-ਥਾਂ ਮੋਰਟਾਰ ਡਿੱਗ ਰਿਹਾ ਹੈ ਅਤੇ ਭੂਮੀਗਤ ਮੈਟਰੋ ਲਾਈਨ ਨੇੜੇ ਹੋਣ ਕਾਰਨ ਮੈਟਰੋ ਦੇ ਲੰਘਣ ਸਮੇਂ ਇਮਾਰਤ ਵਿੱਚ ਕੰਬਣ ਮਹਿਸੂਸ ਹੋਣ ਦੀ ਗੱਲ ਕਹੀ ਗਈ ਹੈ। ਇਸ ਇਮਾਰਤ ਵਿੱਚ ਜ਼ੋਨਲ ਪ੍ਰਾਪਰਟੀ ਟੈਕਸ ਅਤੇ ਸਿੱਖਿਆ ਵਿਭਾਗ ਦੇ ਦਫ਼ਤਰ ਚੱਲ ਰਹੇ ਹਨ। ਆਮ ਆਦਮੀ ਪਾਰਟੀ ਦੀ ਕੌਂਸਲਰ ਅਰੀਬਾ ਖਾਨ ਨੇ ਹਾਲ ਹੀ ਵਿੱਚ ਸਥਾਈ ਕਮੇਟੀ ਦੀ ਮੀਟਿੰਗ ਦੌਰਾਨ ਇਸ ਇਮਾਰਤ ਦੀ ਖਸਤਾ ਹਾਲਤ ਦਾ ਮੁੱਦਾ ਚੁੱਕਿਆ ਸੀ। ਇਨ੍ਹਾਂ ਮਾਮਲਿਆਂ ਨੇ ਸਵਾਲ ਖੜ੍ਹਾ ਕਰ ਦਿੱਤਾ ਹੈ ਕਿ ਜੇਕਰ ਖਤਰਨਾਕ ਐਲਾਨੀਆਂ ਇਮਾਰਤਾਂ ਵਿਰੁੱਧ ਸਮੇਂ ਸਿਰ ਢੁਕਵੀਂ ਕਾਰਵਾਈ ਨਹੀਂ ਕੀਤੀ ਜਾਂਦੀ ਤਾਂ ਹਾਦਸੇ ਦੀ ਸੂਰਤ ਵਿੱਚ ਜ਼ਿੰਮੇਵਾਰੀ ਕਿਸ ਦੀ ਹੋਵੇਗੀ।

Questions Raised Over Survey Of Dangerous Buildings In Delhi Only 62 Out Of 3 07 Million Buildings Declared Dangerous