ਪੰਜਾਬ ਵਿਧਾਨ ਸਭਾ ਚੋਣਾਂ ਨੇ ਵੱਖ ਕੀਤੇ ਕਿਸਾਨ ਆਗੂਆਂ ਦੇ ਰਾਹ, ਹੁਣ ਪਿਛਲੇ ਚਿਹਰੇ ਸੰਭਾਲ ਰਹੇ ਕਮਾਂਡ

10/02/2024 | Public Times Bureau | Panjab

ਦੋ ਦਿਨ ਪਹਿਲਾਂ ਚੰਡੀਗੜ੍ਹ ਦੇ ਮਹਾਤਮਾ ਗਾਂਧੀ ਪ੍ਰਬੰਧਕੀ ਸੰਸਥਾਨ 'ਚ ਤਿੰਨ ਕੇਂਦਰੀ ਮੰਤਰੀਆਂ ਅਤੇ ਖ-ਵੱਖ ਕਿਸਾਨ ਜਥੇਬੰਦੀਆਂ ਦੇ ਆਗੂਆਂ ਦਰਮਿਆਨ ਹੋਈ ਗੱਲਬਾਤ ਭਾਵੇਂ ਸਿਰੇ ਨਾ ਚੜ੍ਹੀ ਹੋਵੇ, ਪਰ ਕਿਸਾਨ ਅੰਦੋਲਨ-2 ਨੇ ਹੁਣ ਉਨ੍ਹਾਂ ਚਿਹਰਿਆਂ ਨੂੰ ਕਮਾਨ ਸੌਂਪ ਦਿੱਤੀ ਹੈ, ਜਿਹੜੇ ਅਜੇ ਤਕ ਪਿਛਲੀਆਂ ਸੀਟਾਂ 'ਤੇ ਬੈਠਦੇ ਸਨ। ਬਲਬੀਰ ਸਿੰਘ ਰਾਜੇਵਾਲ, ਦਰਸ਼ਨ ਸਿੰਘ, ਗੁਰਨਾਮ ਸਿੰਘ ਚੜੂਨੀ, ਲੱਖੋਵਾਲ, ਪ੍ਰੇਮ ਸਿੰਘ ਭੰਗੂ, ਬੂਟਾ ਸਿੰਘ ਬੁਰਜਗਿੱਲ ਤੇ ਜੋਗਿੰਦਰ ਸਿੰਘ ਉਗਰਾਹਾਂ ਵਰਗੇ ਆਗੂ ਅੰਦੋਲਨ ਦੇ ਪਰਿਦ੍ਰਿਸ਼ ਤੋਂ ਗ਼ਾਇਬ ਹਨ।

ਅਸਲ ਵਿਚ ਇਸ ਦਾ ਇੱਕ ਵੱਡਾ ਕਾਰਨ 2022 ਦੀਆਂ ਵਿਧਾਨ ਸਭਾ ਚੋਣਾਂ ਵੀ ਰਹੀਆਂ ਹਨ, ਜਿੱਥੇ ਸੰਯੁਕਤ ਕਿਸਾਨ ਮੋਰਚਾ ਜਿਸ ਦੀ ਅਗਵਾਈ 'ਚ ਅੰਦੋਲਨ ਲੜਿਆ ਗਿਆ, ਇਹ ਕਈ ਹਿੱਸਿਆਂ ਵਿੱਚ ਵੰਡਿਆ ਗਿਆ। ਇੱਕ ਹਿੱਸਾ ਸੰਯੁਕਤ ਕਿਸਾਨ ਮੋਰਚਾ ਸਿਆਸੀ ਤੇ ਇਕ ਹਿੱਸਾ ਸੰਯੁਕਤ ਕਿਸਾਨ ਗੈਰ-ਸਿਆਸੀ ਮੋਰਚੇ ਦੇ ਰੂਪ 'ਚ ਉਭਰਿਆ। ਬਲਬੀਰ ਸਿੰਘ ਰਾਜੇਵਾਲ ਆਪਣੀਆਂ ਪੰਜ ਜਥੇਬੰਦੀਆਂ ਨਾਲ ਮਿਲ ਕੇ ਵੱਖਰੇ ਤੌਰ ’ਤੇ ਭਾਰਤ ਬੰਦ ਦਾ ਸੱਦਾ ਦੇ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਦੇਸ਼ ਭਰ ਦੀਆਂ 56 ਯੂਨੀਅਨਾਂ ਤੇ ਕਿਸਾਨ ਜਥੇਬੰਦੀਆਂ ਨੇ ਇਸ ਦਾ ਸਮਰਥਨ ਕੀਤਾ ਹੈ। ਇਸ ਵਿਚ ਬੈਂਕ ਕਰਮਚਾਰੀ ਵੀ ਸ਼ਾਮਲ ਹਨ।

ਰਾਜੇਵਾਲ ਤੇ ਉਨ੍ਹਾਂ ਦੀਆਂ ਸਹਿਯੋਗੀ ਜਥੇਬੰਦੀਆਂ ਨੇ ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਲੜੀਆਂ, ਜਿਸ ਕਾਰਨ ਹੋਰ ਜਥੇਬੰਦੀਆਂ ਨਾਰਾਜ਼ ਹੋ ਕੇ ਵੱਖ ਹੋ ਗਈਆਂ ਤੇ ਆਪਣੇ ਸਾਂਝੇ ਕਿਸਾਨ ਮੋਰਚੇ ਨੂੰ ਗੈਰ-ਸਿਆਸੀ ਬਣਾ ਦਿੱਤਾ। ਰਾਜੇਵਾਲ ਤੇ ਹੋਰ ਉਮੀਦਵਾਰ ਚੋਣਾਂ 'ਚ ਬੁਰੀ ਤਰ੍ਹਾਂ ਹਾਰ ਗਏ।

ਰਾਜੇਵਾਲ ਉਸ ਹਾਰ ਤੋਂ ਨਿਰਾਸ਼ ਨਹੀਂ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਚੋਣ ਲੜਨ ਦਾ ਫੈਸਲਾ ਉਨ੍ਹਾਂ ਦਾ ਨਹੀਂ ਸਗੋਂ ਕਿਸਾਨ ਜਥੇਬੰਦੀਆਂ ਦਾ ਸੀ ਪਰ ਹੁਣ 16 ਫਰਵਰੀ ਦਾ ਭਾਰਤ ਬੰਦ ਅੰਦੋਲਨ ਨੂੰ ਨਵੀਂ ਦਿਸ਼ਾ ਦੇਵੇਗਾ। ਉਨ੍ਹਾਂ ਕਿਹਾ ਕਿ ਪੂਰੇ ਭਾਰਤ ਦੇ ਸਾਰੇ ਸ਼ਹਿਰਾਂ ਦੇ ਵੱਡੇ ਚੌਕਾਂ 'ਤੇ ਵੱਡੇ ਧਰਨੇ ਤੇ ਮੁਜ਼ਾਹਰੇ ਕੀਤੇ ਜਾਣਗੇ। ਉਨ੍ਹਾਂ ਨੇ ਯਕੀਨੀ ਤੌਰ 'ਤੇ ਸਪੱਸ਼ਟ ਕੀਤਾ ਕਿ ਅਸੀਂ ਰੇਲਾਂ ਨਹੀਂ ਰੋਕਾਂਗੇ।

The Punjab Vidhan Sabha Elections Separated The Paths Of The Farmers Leaders Now The Command Is Maintaining The Previous Faces