ਫਤਿਹਗੜ੍ਹ ਸਾਹਿਬ 'ਚ ਨੌਜਵਾਨ ਨੇ ਧਮਕੀਆਂ ਤੋਂ ਤੰਗ ਆ ਕੇ ਕੀਤੀ ਖੁਦਕੁਸ਼ੀ, ਲੜਕੀ ਦੇ ਪਰਿਵਾਰ 'ਤੇ ਦੋਸ਼

10/11/2025 | Public Times Bureau | Panjab

ਫਤਿਹਗੜ੍ਹ ਸਾਹਿਬ ਦੇ ਗੁਰਦਾਨਪੁਰ ਪਿੰਡ ਵਿੱਚ ਇੱਕ 19 ਸਾਲਾ ਨੌਜਵਾਨ ਅਨੁਰੀਤ ਸਿੰਘ ਨੇ ਧਮਕੀਆਂ ਅਤੇ ਝੂਠੇ ਦੋਸ਼ਾਂ ਤੋਂ ਤੰਗ ਆ ਕੇ ਜ਼ਹਿਰੀਲੀ ਦਵਾਈ ਪੀ ਕੇ ਖੁਦਕੁਸ਼ੀ ਕਰ ਲਈ। ਮ੍ਰਿਤਕ ਦੇ ਪਿਤਾ ਗੁਰਪ੍ਰੀਤ ਸਿੰਘ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਉਸਦਾ ਪੁੱਤਰ 12ਵੀਂ ਜਮਾਤ ਦਾ ਵਿਦਿਆਰਥੀ ਸੀ ਤੇ ਖੇਤੀਬਾੜੀ ਵਿੱਚ ਉਸਦਾ ਹੱਥ ਬਟਾਉਂਦਾ ਸੀ।

ਉਸਨੇ ਦੱਸਿਆ ਕਿ 24 ਅਕਤੂਬਰ ਨੂੰ ਨਾਭਾ ਦੀ ਰਹਿਣ ਵਾਲੀ ਇਕ ਲੜਕੀ ਦੀ ਮਾਂ ਜਸਵੀਰ ਕੌਰ ਅਤੇ ਦਾਦਾ ਗੁਰਮੀਤ ਸਿੰਘ ਉਨ੍ਹਾਂ ਦੇ ਘਰ ਆਏ ਅਤੇ ਦੋਸ਼ ਲਗਾਇਆ ਕਿ ਉਨ੍ਹਾਂ ਦੀ ਧੀ ਨੇ ਅਨੁਰੀਤ ਨੂੰ ਪੰਜ ਤੋਲੇ ਸੋਨਾ ਦਿੱਤਾ ਹੈ, ਜੋ ਉਹ ਵਾਪਸ ਕਰੇ। ਅਨੁਰੀਤ ਨੇ ਸਪੱਸ਼ਟ ਕੀਤਾ ਕਿ ਉਸਦਾ ਲੜਕੀ ਨਾਲ ਕੋਈ ਸਬੰਧ ਨਹੀਂ ਅਤੇ ਉਸਨੇ ਕਦੇ ਕੋਈ ਸੋਨਾ ਨਹੀਂ ਲਿਆ। ਇਸ 'ਤੇ ਲੜਕੀ ਦੇ ਪਰਿਵਾਰ ਨੇ ਉਸਨੂੰ ਧਮਕੀਆਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ।

ਜਦੋਂ ਲੜਕੀ ਤੋਂ ਪੁੱਛਗਿੱਛ ਕੀਤੀ ਗਈ ਤਾਂ ਉਸਦੇ ਬਿਆਨ ਵਿਰੋਧਭਰਪੂਰ ਸਨ — ਕਦੇ ਉਹ ਕਹਿੰਦੀ ਕਿ ਸੋਨਾ ਅਨੁਰੀਤ ਨੂੰ ਦਿੱਤਾ, ਕਦੇ ਕਹਿੰਦੀ ਕਿ ਬੱਸ ਵਿੱਚੋਂ ਸੁੱਟ ਦਿੱਤਾ। ਇਸ ਸਭ ਕਾਰਨ ਅਨੁਰੀਤ ਬਹੁਤ ਤਣਾਅ 'ਚ ਆ ਗਿਆ ਅਤੇ 25 ਅਕਤੂਬਰ ਦੀ ਰਾਤ ਘਰ ਵਿੱਚ ਰੱਖਿਆ ਖੇਤੀਬਾੜੀ ਵਾਲਾ ਜ਼ਹਿਰ ਪੀ ਲਿਆ। ਉਸਨੂੰ ਖੰਨਾ ਦੇ ਨਿੱਜੀ ਹਸਪਤਾਲ ਲਿਜਾਇਆ ਗਿਆ ਤੇ ਬਾਅਦ ਵਿੱਚ ਡੀਐਮਸੀ ਲੁਧਿਆਣਾ ਰੈਫਰ ਕੀਤਾ ਗਿਆ, ਜਿੱਥੇ 8 ਨਵੰਬਰ ਨੂੰ ਉਸਦੀ ਮੌਤ ਹੋ ਗਈ।

ਡੀਐਸਪੀ ਕੁਲਵੀਰ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕ ਦੇ ਪਿਤਾ ਦੇ ਬਿਆਨਾਂ ਅਤੇ ਜਾਂਚ ਦੇ ਆਧਾਰ 'ਤੇ ਲੜਕੀ ਦੀ ਮਾਂ ਅਤੇ ਦਾਦੇ ਖ਼ਿਲਾਫ਼ ਖੁਦਕੁਸ਼ੀ ਲਈ ਉਕਸਾਉਣ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ। ਪੁਲਿਸ ਨੇ ਲੜਕੀ ਦੀ ਮਾਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ, ਜਦਕਿ ਦਾਦੇ ਦੀ ਭਾਲ ਜਾਰੀ ਹੈ।

In Fatehgarh Sahib A Young Man Committed Suicide After Being Fed Up With Threats The Girl s Family Is Blamed