Zomato : ਦੀਪਿੰਦਰ ਗੋਇਲ ਨੇ ਛੱਡੀ CEO ਦੀ ਕੁਰਸੀ, ਹੁਣ ਅਲਬਿੰਦਰ ਢੀਂਡਸਾ ਸੰਭਾਲਣਗੇ ਕਮਾਨ!

21/01/2026 | Public Times Bureau | Panjab

ਜ਼ੋਮੈਟੋ ਦੇ ਫਾਊਂਡਰ ਦੀਪਿੰਦਰ ਗੋਇਲ ਨੇ ਕੰਪਨੀ ਵਿੱਚ ਗਰੁੱਪ CEO ਦੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ। ਕੰਪਨੀ ਦੀ ਪੈਰੈਂਟ ਇਕਾਈ ‘ਇਟਰਨਲ’ (Eternal) ਵੱਲੋਂ ਵੱਡੇ ਲੀਡਰਸ਼ਿਪ ਬਦਲਾਅ ਦੇ ਤਹਿਤ ਇਸ ਦਾ ਐਲਾਨ ਕੀਤਾ ਗਿਆ। ਸ਼ੇਅਰਧਾਰਕਾਂ ਦੀ ਮਨਜ਼ੂਰੀ ਮਿਲਣ ਤੋਂ ਬਾਅਦ ਦੀਪਿੰਦਰ ਗੋਇਲ ਨੇ ਅਹੁਦਾ ਛੱਡ ਦਿੱਤਾ ਹੈ ਅਤੇ ਅਲਬਿੰਦਰ ਢੀਂਡਸਾ ਨੂੰ ਤੁਰੰਤ ਪ੍ਰਭਾਵ ਨਾਲ ਇਟਰਨਲ ਦਾ ਨਵਾਂ ਗਰੁੱਪ CEO ਨਿਯੁਕਤ ਕੀਤਾ ਗਿਆ ਹੈ।
ਦੀਪਿੰਦਰ ਗੋਇਲ ਵੱਲੋਂ ਗਰੁੱਪ CEO ਦਾ ਅਹੁਦਾ ਛੱਡਣ ਦਾ ਫ਼ੈਸਲਾ ਨਵੀਆਂ ਚੀਜ਼ਾਂ ਨੂੰ ਅਜ਼ਮਾਉਣ ਅਤੇ ਵਧੇਰੇ ਜੋਖਮ ਲੈਣ ਦੀ ਇੱਛਾ ਨਾਲ ਜੁੜਿਆ ਹੋਇਆ ਦੱਸਿਆ ਜਾ ਰਿਹਾ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਸ ਤਰ੍ਹਾਂ ਦੇ ਪ੍ਰਯੋਗ ਪਬਲਿਕ ਕੰਪਨੀ ਦੇ ਢਾਂਚੇ ਤੋਂ ਬਾਹਰ ਰਹਿ ਕੇ ਜ਼ਿਆਦਾ ਬਿਹਤਰ ਢੰਗ ਨਾਲ ਕੀਤੇ ਜਾ ਸਕਦੇ ਹਨ। ਉਨ੍ਹਾਂ ਅਨੁਸਾਰ, ਇਟਰਨਲ ਨੂੰ ਹੁਣ ਅਜਿਹੀ ਲੀਡਰਸ਼ਿਪ ਦੀ ਲੋੜ ਹੈ ਜੋ ਮੁੱਖ ਕਾਰੋਬਾਰ ’ਤੇ ਕੇਂਦਰਿਤ ਅਤੇ ਅਨੁਸ਼ਾਸਿਤ ਹੋਵੇ।
ਦੀਪਿੰਦਰ ਗੋਇਲ ਦੀ ਜਗ੍ਹਾ ਸੰਭਾਲਣ ਵਾਲੇ ਅਲਬਿੰਦਰ ਢੀਂਡਸਾ (ਅਲਬੀ) ਹੁਣ ਕੰਪਨੀ ਦੀਆਂ ਆਪਰੇਟਿੰਗ ਤਰਜੀਹਾਂ ਅਤੇ ਕਾਰੋਬਾਰ ਨਾਲ ਜੁੜੇ ਮਹੱਤਵਪੂਰਨ ਫ਼ੈਸਲਿਆਂ ਲਈ ਜ਼ਿੰਮੇਵਾਰ ਹੋਣਗੇ। ਬਲਿੰਕਿਟ ਨੂੰ ਖਰੀਦਣ ਤੋਂ ਲੈ ਕੇ ਉਸ ਨੂੰ ਨਫ਼ੇ ਵਿੱਚ ਲਿਆਉਣ ਤੱਕ ਢੀਂਡਸਾ ਦੀ ਲੀਡਰਸ਼ਿਪ ਦੀ ਕਾਫ਼ੀ ਪ੍ਰਸ਼ੰਸਾ ਕੀਤੀ ਗਈ ਹੈ।
ਢੀਂਡਸਾ ਦੀ ਅਗਵਾਈ ਹੇਠ ਬਲਿੰਕਿਟ ਅੱਗੇ ਵੀ ਕੰਪਨੀ ਦੀ ਇੱਕ ਮੁੱਖ ਤਰਜੀਹ ਬਣੀ ਰਹੇਗੀ। ਇਸ ਲੀਡਰਸ਼ਿਪ ਬਦਲਾਅ ਨੂੰ ਇਟਰਨਲ ਦੇ ਭਵਿੱਖੀ ਵਿਕਾਸ ਲਈ ਇੱਕ ਮਹੱਤਵਪੂਰਨ ਕਦਮ ਵਜੋਂ ਦੇਖਿਆ ਜਾ ਰਿਹਾ ਹੈ।

Zomato Deepinder Goyal Leaves Ceo Post Now Albinder Dhindsa Will Take Over