ਫਿਰੋਜ਼ਪੁਰ: ਡਾਕਟਰ ਨਾਲ 86 ਲੱਖ ਰੁਪਏ ਦੀ ਠੱਗੀ, ਪੁਲਿਸ ਨੇ ਮਾਮਲਾ ਦਰਜ ਕੀਤਾ

12/04/2026 | Public Times Bureau | Panjab

ਫਿਰੋਜ਼ਪੁਰ ਵਿੱਚ ਇੱਕ ਡਾਕਟਰ ਨਾਲ ਲੱਖਾਂ ਰੁਪਏ ਦੀ ਠੱਗੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਸਿਟੀ ਫਿਰੋਜ਼ਪੁਰ ਪੁਲਿਸ ਨੇ ਇੱਕ ਵਿਅਕਤੀ ਖਿਲਾਫ ਠੱਗੀ ਅਤੇ ਧੋਖਾਧੜੀ ਦੇ ਮਾਮਲੇ ਵਿੱਚ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਸਹਾਇਕ ਥਾਣੇਦਾਰ ਗੁਰਮੀਤ ਸਿੰਘ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਡਾ. ਪ੍ਰਦੀਪ ਦਿਉੜਾ, ਜੋ ਕਿ ਰਾਮ ਲਾਲ ਨਗਰ, ਮੱਲਵਾਲ ਰੋਡ ਦਾ ਵਾਸੀ ਹੈ, ਨੇ ਪੁਲਿਸ ਨੂੰ ਸ਼ਿਕਾਇਤ ਕੀਤੀ ਸੀ। ਡਾ. ਦਿਉੜਾ ਦੀ ਇੱਕ ਫਰਮ 'ਰਾਧਿਕਾ ਫਾਰਮਾਸਿਊਟੀਕਲਸ' ਹੈ, ਜਿਸਦੀ ਕਾਰਗੁਜ਼ਾਰੀ ਦੀ ਜ਼ਿੰਮੇਵਾਰੀ ਉਹਨਾਂ ਨੇ ਰਾਜਨ ਵਰਮਾ, ਜੋ ਕਿ ਗਲੀ ਬਾਬਾ ਲਾਲ ਦਿਆਲ ਦੇ ਵਾਸੀ ਹਨ, ਨੂੰ ਸੌਂਪੀ ਸੀ।
ਦੋਹਾਂ ਵਿਚ ਤੈਅ ਹੋਇਆ ਸੀ ਕਿ ਫਰਮ ਦੇ ਕਾਰੋਬਾਰ ਤੋਂ ਹੋਣ ਵਾਲਾ ਮੁਨਾਫਾ 50-50 ਪ੍ਰਤੀਸ਼ਤ ਦੇ ਅਨੁਸਾਰ ਵੰਡਿਆ ਜਾਵੇਗਾ। ਪਰ 6 ਮਹੀਨਿਆਂ ਬਾਅਦ ਜਦੋਂ ਡਾ. ਦਿਉੜਾ ਨੇ ਆਪਣੇ ਫਰਮ ਦੇ ਖਾਤੇ ਦੀ ਜਾਂਚ ਕਰਵਾਈ, ਤਾਂ ਪਤਾ ਲੱਗਾ ਕਿ ਰਾਜਨ ਵਰਮਾ ਨੇ ਖਾਤਿਆਂ ਵਿੱਚ ਹੇਰਾਫੇਰੀ ਕਰਕੇ 86,70,318 ਰੁਪਏ ਦੀ ਵੱਡੀ ਠੱਗੀ ਕੀਤੀ ਹੈ।
ਡਾ. ਦਿਉੜਾ ਦੀ ਸ਼ਿਕਾਇਤ ਦੇ ਅਧਾਰ 'ਤੇ ਉਪ ਕਪਤਾਨ ਪੁਲਿਸ (ਡੀ) ਫਿਰੋਜ਼ਪੁਰ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਗਈ ਅਤੇ ਐੱਸਐੱਪੀ ਫਿਰੋਜ਼ਪੁਰ ਦੀ ਮਨਜ਼ੂਰੀ ਤੋਂ ਬਾਅਦ ਸਿਟੀ ਫਿਰੋਜ਼ਪੁਰ ਪੁਲਿਸ ਨੇ ਮੁਲਜ਼ਮ ਰਾਜਨ ਵਰਮਾ ਖਿਲਾਫ ਮਾਮਲਾ ਦਰਜ ਕਰ ਲਿਆ।

Ferozepur Doctor Cheated Of Rs 86 Lakh Police Registers Case