ਜਕਾਰਤਾ ਨੇੜੇ ਦੋ ਰੇਲਾਂ ਦੀ ਟੱਕਰ ਨਾਲ ਤਬਾਹੀ: ਮੌਤਾਂ ਦੀ ਗਿਣਤੀ 14 ਤੱਕ ਪੁੱਜੀ, ਕਈ ਗੰਭੀਰ ਜ਼ਖ਼ਮੀ

28/04/2026 | Public Times Bureau | Panjab

ਇੰਡੋਨੇਸ਼ੀਆ ਦੀ ਰਾਜਧਾਨੀ ਜਕਾਰਤਾ ਦੇ ਬਾਹਰਲੇ ਇਲਾਕੇ ਵਿੱਚ ਦੋ ਰੇਲ ਗੱਡੀਆਂ ਵਿਚਕਾਰ ਹੋਈ ਭਿਆਨਕ ਟੱਕਰ ਨੇ ਵੱਡੀ ਤਬਾਹੀ ਮਚਾ ਦਿੱਤੀ। ਅਧਿਕਾਰਕ ਜਾਣਕਾਰੀ ਮੁਤਾਬਕ ਇਸ ਹਾਦਸੇ ਵਿੱਚ ਘੱਟੋ-ਘੱਟ 14 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ 84 ਹੋਰ ਯਾਤਰੀ ਗੰਭੀਰ ਤੌਰ ‘ਤੇ ਜ਼ਖ਼ਮੀ ਹੋਏ ਹਨ। ਜ਼ਖ਼ਮੀਆਂ ਨੂੰ ਤੁਰੰਤ ਨਜ਼ਦੀਕੀ ਹਸਪਤਾਲਾਂ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ, ਜਿੱਥੇ ਕਈ ਦੀ ਹਾਲਤ ਨਾਜ਼ੁਕ ਦੱਸੀ ਜਾ ਰਹੀ ਹੈ।
ਇਹ ਦਰਦਨਾਕ ਘਟਨਾ ਬੇਕਾਸੀ ਤਿਮੁਰ ਸਟੇਸ਼ਨ ਦੇ ਨੇੜੇ ਵਾਪਰੀ, ਜੋ ਜਕਾਰਤਾ ਤੋਂ ਲਗਭਗ 25 ਕਿਲੋਮੀਟਰ ਦੂਰ ਸਥਿਤ ਹੈ। ਪ੍ਰਾਰੰਭਿਕ ਰਿਪੋਰਟਾਂ ਅਨੁਸਾਰ ਇੱਕ ਯਾਤਰੀ ਰੇਲ ਗੱਡੀ ਪਹਿਲਾਂ ਹੀ ਪਟੜੀ ਨੰਬਰ ਇੱਕ ‘ਤੇ ਖੜੀ ਸੀ। ਇਸ ਦੌਰਾਨ ਪੱਛਮੀ ਦਿਸ਼ਾ ਵੱਲੋਂ ਆ ਰਹੀ ਲੰਬੀ ਦੂਰੀ ਦੀ ਡੀਜ਼ਲ ਰੇਲ ਗੱਡੀ ਉਸੇ ਪਟੜੀ ‘ਤੇ ਆ ਗਈ ਅਤੇ ਦੋਹਾਂ ਵਿਚਕਾਰ ਸਿੱਧੀ ਟੱਕਰ ਹੋ ਗਈ।
ਚਸ਼ਮਦੀਦਾਂ ਦੇ ਮੁਤਾਬਕ ਟੱਕਰ ਬਹੁਤ ਹੀ ਜ਼ੋਰਦਾਰ ਸੀ, ਜਿਸ ਨਾਲ ਰੇਲ ਗੱਡੀਆਂ ਦੇ ਕਈ ਡੱਬੇ ਬੁਰੀ ਤਰ੍ਹਾਂ ਨੁਕਸਾਨਿਆ ਗਏ। ਕੁਝ ਡੱਬਿਆਂ ਵਿੱਚ ਫਸੇ ਯਾਤਰੀਆਂ ਨੂੰ ਬਾਹਰ ਕੱਢਣ ਲਈ ਬਚਾਅ ਟੀਮਾਂ ਨੂੰ ਕਾਫੀ ਮੁਸ਼ੱਕਤ ਕਰਨੀ ਪਈ।
ਸਰਕਾਰੀ ਰੇਲ ਕੰਪਨੀ ਦੇ ਪ੍ਰਵਕਤਾ ਨੇ ਦੱਸਿਆ ਕਿ ਹਾਦਸੇ ਤੋਂ ਤੁਰੰਤ ਬਾਅਦ ਫੌਜ, ਅੱਗ ਬੁਝਾਉ ਦਲ ਅਤੇ ਰਾਸ਼ਟਰੀ ਖੋਜ ਤੇ ਬਚਾਅ ਟੀਮਾਂ ਮੌਕੇ ‘ਤੇ ਪਹੁੰਚ ਗਈਆਂ ਸਨ। ਬਚਾਅ ਕਾਰਜ ਰਾਤ ਭਰ ਜਾਰੀ ਰਿਹਾ ਅਤੇ ਮਲਬੇ ਵਿੱਚ ਫਸੇ ਲੋਕਾਂ ਨੂੰ ਬਾਹਰ ਕੱਢਣ ਦੀ ਕੋਸ਼ਿਸ਼ ਕੀਤੀ ਗਈ।
ਰੇਲਵੇ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਹਾਦਸੇ ਦੇ ਅਸਲ ਕਾਰਨਾਂ ਦੀ ਪੜਤਾਲ ਲਈ ਉੱਚ ਪੱਧਰੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਮੌਕੇ ਤੋਂ ਸਬੂਤ ਇਕੱਠੇ ਕੀਤੇ ਜਾ ਰਹੇ ਹਨ ਅਤੇ ਇਹ ਜਾਣਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਕਿ ਇਕੋ ਪਟੜੀ ‘ਤੇ ਦੋ ਰੇਲਾਂ ਕਿਵੇਂ ਆ ਗਈਆਂ।

Devastating Collision Of Two Trains Near Jakarta Death Toll Reaches 14 Many Seriously Injured