17 ਸਾਲ ਦੀ ਉਮਰ 'ਚ ਛੱਡਿਆ ਸਕੂਲ, 25 'ਚ ਬਣਿਆ ਅਰਬਪਤੀ

18/08/2026 | Public Times Bureau | Panjab

ਬ੍ਰਿਟੇਨ ਦੇ ਜੇਮਸ ਡੈਕੋਮਬੇ ਨੇ 17 ਸਾਲ ਦੀ ਉਮਰ ਵਿੱਚ ਸਕੂਲ ਛੱਡ ਕੇ ਟੈਕਨੋਲੋਜੀ ਦੀ ਦੁਨੀਆ ਵਿੱਚ ਕਦਮ ਰੱਖਿਆ ਅਤੇ ਹੁਣ 25 ਸਾਲ ਦੀ ਉਮਰ ਵਿੱਚ ਅਰਬਪਤੀ ਬਣਨ ਵਾਲੇ ਯੂਰਪ ਦੇ ਸਭ ਤੋਂ ਨੌਜਵਾਨ self-made ਉੱਦਮੀਆਂ ਵਿੱਚ ਸ਼ਾਮਲ ਹੋ ਗਏ ਹਨ। ਉਨ੍ਹਾਂ ਦੀ ਦੌਲਤ ਵਿੱਚ ਵੱਡਾ ਉਛਾਲ ਉਨ੍ਹਾਂ ਦੇ AI ਚਿਪ ਸਟਾਰਟਅਪ Olix ਦੀ ਵਧਦੀ ਕੀਮਤ ਕਾਰਨ ਆਇਆ ਹੈ। ਹਾਲੀਆ ਫੰਡਿੰਗ ਤੋਂ ਬਾਅਦ ਕੰਪਨੀ ਦੀ ਵੈਲਿਊਏਸ਼ਨ ਕਰੀਬ 3.3 ਅਰਬ ਡਾਲਰ ਹੋ ਗਈ ਹੈ।ਡੈਕੋਮਬੇ ਦਾ ਟੈਕਨੋਲੋਜੀ ਨਾਲ ਜੁੜਾਅ ਛੋਟੀ ਉਮਰ ਤੋਂ ਸੀ। ਉਹ ਕਰੀਬ 13 ਸਾਲ ਦੀ ਉਮਰ ਵਿੱਚ ਪ੍ਰੋਗਰਾਮਿੰਗ ਕਰਨ ਲੱਗ ਪਏ ਸਨ ਅਤੇ ਐਪਸ ਤੇ ਵੈੱਬਸਾਈਟਾਂ ਬਣਾਉਂਦੇ ਸਨ। 16 ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਨੇ ਸਕੂਲ ਛੱਡ ਕੇ ਸਾਫਟਵੇਅਰ ਇੰਜੀਨੀਅਰ ਵਜੋਂ ਕੰਮ ਕੀਤਾ ਅਤੇ 17 ਸਾਲ ਦੀ ਉਮਰ ਵਿੱਚ ਆਪਣਾ ਸਟਾਰਟਅਪ CoMind ਸ਼ੁਰੂ ਕੀਤਾ। CoMind ਰਾਹੀਂ ਡੈਕੋਮਬੇ ਨੇ ਬਿਨਾਂ ਸਰਜਰੀ ਦਿਮਾਗ ਦੀ ਗਤੀਵਿਧੀ ਮਾਪਣ ਵਾਲੀ ਤਕਨਾਲੋਜੀ ਵਿਕਸਿਤ ਕਰਨ 'ਤੇ ਕੰਮ ਕੀਤਾ।

ਕੰਪਨੀ ਨੇ 2025 ਤੱਕ 100 ਮਿਲੀਅਨ ਡਾਲਰ ਤੋਂ ਵੱਧ ਦੀ ਫੰਡਿੰਗ ਹਾਸਲ ਕੀਤੀ ਸੀ। ਇਸ ਤਕਨਾਲੋਜੀ ਦਾ ਮਕਸਦ ਦਿਮਾਗ ਨਾਲ ਜੁੜੀਆਂ ਸਥਿਤੀਆਂ ਨੂੰ ਸਮਝਣ ਅਤੇ ਮਰੀਜ਼ਾਂ ਦੇ ਇਲਾਜ ਵਿੱਚ ਡਾਕਟਰਾਂ ਦੀ ਮਦਦ ਕਰਨਾ ਹੈ। ਇਸ ਤੋਂ ਬਾਅਦ ਡੈਕੋਮਬੇ ਨੇ AI ਇਨਫਰਾਸਟਰਕਚਰ ਲਈ ਚਿਪਸ ਬਣਾਉਣ ਵੱਲ ਰੁਖ ਕੀਤਾ। ਉਨ੍ਹਾਂ ਦੇ ਸਟਾਰਟਅਪ Olix ਨੇ ਅਗਸਤ 2026 ਵਿੱਚ 312 ਮਿਲੀਅਨ ਡਾਲਰ ਦੀ ਨਵੀਂ ਫੰਡਿੰਗ ਹਾਸਲ ਕੀਤੀ, ਜਿਸ ਨਾਲ ਕੰਪਨੀ ਦੀ ਵੈਲਿਊਏਸ਼ਨ ਛੇ ਮਹੀਨਿਆਂ ਵਿੱਚ ਤਿੰਨ ਗੁਣਾ ਵਧ ਕੇ 3.3 ਅਰਬ ਡਾਲਰ ਹੋ ਗਈ। ਫੰਡਿੰਗ ਵਿੱਚ Arm, Hudson River Trading ਅਤੇ Netflix ਦੇ ਸਹਿ-ਸੰਸਥਾਪਕ ਰੀਡ ਹੇਸਟਿੰਗਜ਼ ਨਾਲ ਜੁੜੇ ਨਿਵੇਸ਼ਕ ਵੀ ਸ਼ਾਮਲ ਸਨ। ਡੈਕੋਮਬੇ ਦੀ ਕਹਾਣੀ ਵਿੱਚ ਇੱਕ ਹੋਰ ਖਾਸ ਗੱਲ ਇਹ ਹੈ ਕਿ ਉਨ੍ਹਾਂ ਨੇ ਰਵਾਇਤੀ ਕਰੀਅਰ ਦੀ ਬਜਾਏ ਤਕਨਾਲੋਜੀ ਅਤੇ ਉਦਯੋਗਪਤੀ ਬਣਨ ਦਾ ਰਸਤਾ ਚੁਣਿਆ। ਉਨ੍ਹਾਂ ਦੀ ਸ਼ੁਰੂਆਤੀ ਦਿਲਚਸਪੀ ਪ੍ਰੋਗਰਾਮਿੰਗ ਤੋਂ ਲੈ ਕੇ ਦਿਮਾਗ ਦੀ ਨਿਗਰਾਨੀ ਅਤੇ ਹੁਣ AI ਚਿਪਸ ਤੱਕ ਪਹੁੰਚ ਚੁੱਕੀ ਹੈ।

Dropped Out Of School At 17 Became A Billionaire At 25