TMC ਦੇ 17 ਬਾਗੀ ਸੰਸਦ ਮੈਂਬਰ BJP ’ਚ ਹੋ ਸਕਦੇ ਨੇ ਸ਼ਾਮਲ, ਬਸੁਨੀਆ ਦਾ ਦਾਅਵਾ

14/09/2026 | Public Times Bureau | Panjab

ਤ੍ਰਿਣਮੂਲ ਕਾਂਗਰਸ (TMC) ਤੋਂ ਬਗਾਵਤ ਕਰ ਚੁੱਕੇ ਕੂਚ ਬਿਹਾਰ ਦੇ ਸੰਸਦ ਮੈਂਬਰ ਜਗਦੀਸ਼ ਚੰਦਰ ਵਰਮਾ ਬਸੁਨੀਆ ਨੇ ਦਾਅਵਾ ਕੀਤਾ ਹੈ ਕਿ 20 ਬਾਗੀ ਸੰਸਦ ਮੈਂਬਰਾਂ ਵਿੱਚੋਂ 17 ਦੁਰਗਾ ਪੂਜਾ ਤੋਂ ਪਹਿਲਾਂ ਜਾਂ ਬਾਅਦ ਭਾਰਤੀ ਜਨਤਾ ਪਾਰਟੀ (BJP) ਵਿੱਚ ਸ਼ਾਮਲ ਹੋ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਬਾਕੀ ਤਿੰਨ ਸੰਸਦ ਮੈਂਬਰ ਭਾਜਪਾ ਵਿੱਚ ਸ਼ਾਮਲ ਹੋਣ ਦੀ ਬਜਾਏ ਬਾਹਰੋਂ ਰਾਸ਼ਟਰੀ ਜਨਤਾਂਤਰਿਕ ਗਠਜੋੜ (NDA) ਨੂੰ ਸਮਰਥਨ ਦੇਣਗੇ। ਬਸੁਨੀਆ ਮੁਤਾਬਕ 17 ਸੰਸਦ ਮੈਂਬਰਾਂ ਨੇ ਇਕੱਠੇ ਭਾਜਪਾ ਵਿੱਚ ਸ਼ਾਮਲ ਹੋਣ ਦਾ ਫੈਸਲਾ ਕੀਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ 20 ਮੈਂਬਰਾਂ ਵਿੱਚੋਂ ਦੋ-ਤਿਹਾਈ ਤੋਂ ਵੱਧ ਸੰਸਦ ਮੈਂਬਰ ਇਕੱਠੇ ਦਲ-ਬਦਲ ਕਰਦੇ ਹਨ ਤਾਂ ਉਨ੍ਹਾਂ ’ਤੇ ਦਲ-ਬਦਲ ਵਿਰੋਧੀ ਕਾਨੂੰਨ ਤਹਿਤ ਅਯੋਗਤਾ ਦੀ ਕਾਰਵਾਈ ਨਹੀਂ ਬਣਦੀ।

20 ਮੈਂਬਰਾਂ ਦੇ ਸਮੂਹ ਵਿੱਚ ਦੋ-ਤਿਹਾਈ ਗਿਣਤੀ 14 ਸੰਸਦ ਮੈਂਬਰਾਂ ਦੀ ਬਣਦੀ ਹੈ। ਬਸੁਨੀਆ ਦਾ ਦਾਅਵਾ ਹੈ ਕਿ 17 ਮੈਂਬਰਾਂ ਦੇ ਇਕੱਠੇ ਭਾਜਪਾ ਵਿੱਚ ਜਾਣ ਨਾਲ ਇਹ ਗਿਣਤੀ ਪੂਰੀ ਹੋ ਜਾਂਦੀ ਹੈ। ਇਹ ਦਾਅਵਾ ਬਾਗੀ TMC ਸੰਸਦ ਮੈਂਬਰਾਂ ਵੱਲੋਂ 14 ਜੂਨ ਨੂੰ ਨੈਸ਼ਨਲਿਸਟ ਸਿਟੀਜ਼ਨ ਪਾਰਟੀ ਆਫ ਇੰਡੀਆ (NCPI) ਵਿੱਚ ਰਲੇਵੇਂ ਅਤੇ NDA ਨੂੰ ਸਮਰਥਨ ਦੇਣ ਦੇ ਐਲਾਨ ਤੋਂ ਕਰੀਬ ਤਿੰਨ ਮਹੀਨੇ ਬਾਅਦ ਸਾਹਮਣੇ ਆਇਆ ਹੈ। ਬਸੁਨੀਆ ਨੇ ਕਿਹਾ ਕਿ ਘੱਟ ਗਿਣਤੀ ਭਾਈਚਾਰੇ ਨਾਲ ਸਬੰਧਤ ਅਬੂ ਤਾਹਿਰ ਖਾਨ, ਖਲੀਲੁਰ ਰਹਿਮਾਨ ਅਤੇ ਯੂਸੁਫ ਪਠਾਨ ਭਾਜਪਾ ਵਿੱਚ ਰਸਮੀ ਤੌਰ ’ਤੇ ਸ਼ਾਮਲ ਨਹੀਂ ਹੋਣਗੇ। ਉਨ੍ਹਾਂ ਮੁਤਾਬਕ ਇਹ ਤਿੰਨੇ ਆਪਣੇ ਚੋਣ ਹਲਕਿਆਂ ਦੀਆਂ ਸਿਆਸੀ ਅਤੇ ਪ੍ਰਸ਼ਾਸਨਿਕ ਸਥਿਤੀਆਂ ਨੂੰ ਦੇਖਦਿਆਂ ਬਾਹਰੋਂ NDA ਨੂੰ ਸਮਰਥਨ ਦੇਣਗੇ। ਬਸੁਨੀਆ ਨੇ ਇਹ ਵੀ ਦਾਅਵਾ ਕੀਤਾ ਕਿ ਇਨ੍ਹਾਂ ਤਿੰਨਾਂ ਨੂੰ ਅਹਿਮ ਜ਼ਿੰਮੇਵਾਰੀਆਂ ਜਾਂ ਮੰਤਰਾਲੇ ਦਿੱਤੇ ਜਾ ਸਕਦੇ ਹਨ। ਹਾਲਾਂਕਿ, 17 ਸੰਸਦ ਮੈਂਬਰਾਂ ਦੇ ਭਾਜਪਾ ਵਿੱਚ ਸ਼ਾਮਲ ਹੋਣ ਅਤੇ ਤਿੰਨਾਂ ਵੱਲੋਂ NDA ਨੂੰ ਸਮਰਥਨ ਦੇਣ ਸਬੰਧੀ ਦਾਅਵੇ ਦੀ ਅਜੇ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ ਹੈ।

17 Rebel Tmc Mps May Join Bjp Claims Basunia