ਪੁਰਾਣੀਆਂ ਕਾਰਾਂ ਦੇ ਡੀਲਰਾਂ ਲਈ ਨਵਾਂ ਨਿਯਮ, RTO ਰਜਿਸਟ੍ਰੇਸ਼ਨ ਹੋਵੇਗੀ ਲਾਜ਼ਮੀ

17/09/2026 | Public Times Bureau | Panjab

ਪੰਜਾਬ ਵਿੱਚ ਪੁਰਾਣੇ ਵਾਹਨਾਂ ਦੀ ਖਰੀਦ-ਵਿਕਰੀ ਕਰਨ ਵਾਲੇ ਕਾਰ ਡੀਲਰਾਂ ਲਈ ਹੁਣ RTO ਦਫ਼ਤਰ ਵਿੱਚ ਰਜਿਸਟ੍ਰੇਸ਼ਨ ਕਰਵਾਉਣਾ ਲਾਜ਼ਮੀ ਹੋਵੇਗਾ। ਟਰਾਂਸਪੋਰਟ ਵਿਭਾਗ ਦੀ ਨਵੀਂ ਵਿਵਸਥਾ ਤਹਿਤ ਬਿਨਾਂ ਰਜਿਸਟ੍ਰੇਸ਼ਨ ਪੁਰਾਣੀਆਂ ਕਾਰਾਂ ਦੀ ਖਰੀਦ-ਫਰੋਖ਼ਤ ਦਾ ਕਾਰੋਬਾਰ ਨਹੀਂ ਕੀਤਾ ਜਾ ਸਕੇਗਾ। ਨਿਯਮਾਂ ਮੁਤਾਬਕ ਡੀਲਰ ਦੀ ਪਹਿਲੀ ਰਜਿਸਟ੍ਰੇਸ਼ਨ ਪੰਜ ਸਾਲ ਲਈ ਹੋਵੇਗੀ, ਜਿਸ ਲਈ 25 ਹਜ਼ਾਰ ਰੁਪਏ ਫੀਸ ਦੇਣੀ ਪਵੇਗੀ। ਮਿਆਦ ਪੂਰੀ ਹੋਣ ਤੋਂ ਬਾਅਦ ਰਜਿਸਟ੍ਰੇਸ਼ਨ ਦਾ ਨਵੀਨੀਕਰਨ ਕਰਵਾਉਣਾ ਲਾਜ਼ਮੀ ਹੋਵੇਗਾ।

ਰਜਿਸਟ੍ਰੇਸ਼ਨ ਤੋਂ ਬਾਅਦ ਡੀਲਰਾਂ ਨੂੰ ਵਿਭਾਗ ਦੇ ਪੋਰਟਲ ਦੀ ਸਹੂਲਤ ਦਿੱਤੀ ਜਾਵੇਗੀ। ਇਸ ’ਤੇ ਡੀਲਰ ਕੋਲ ਵਿਕਰੀ ਲਈ ਆਉਣ ਵਾਲੀ ਹਰ ਪੁਰਾਣੀ ਕਾਰ ਦਾ ਰਿਕਾਰਡ ਦਰਜ ਕਰਨਾ ਹੋਵੇਗਾ। ਵਾਹਨ ਡੀਲਰ ਦੇ ਕਬਜ਼ੇ ਵਿੱਚ ਆਉਣ ਸਮੇਂ ਉਸ ਦੀ ਐਂਟਰੀ ਕਰਨ ਦੇ ਨਾਲ ਵਿਕਰੀ ਤੋਂ ਬਾਅਦ ਖਰੀਦਦਾਰ ਦੀ ਜਾਣਕਾਰੀ ਵੀ ਅਪਡੇਟ ਕਰਨੀ ਪਵੇਗੀ। ਨਵੀਂ ਵਿਵਸਥਾ ਤਹਿਤ ਵਾਹਨ ਜਦੋਂ ਤੱਕ ਡੀਲਰ ਦੇ ਕਬਜ਼ੇ ਵਿੱਚ ਰਹੇਗਾ, ਉਸ ਦੌਰਾਨ ਕਿਸੇ ਹਾਦਸੇ ਜਾਂ ਹੋਰ ਘਟਨਾ ਦੀ ਸੂਰਤ ਵਿੱਚ ਡੀਲਰ ਦੀ ਜਵਾਬਦੇਹੀ ਤੈਅ ਕੀਤੀ ਜਾ ਸਕੇਗੀ। ਇਸ ਲਈ ਵਾਹਨ ਦੇ ਕਬਜ਼ੇ ਤੋਂ ਲੈ ਕੇ ਵਿਕਰੀ ਤੱਕ ਸਾਰੇ ਲੋੜੀਂਦੇ ਰਿਕਾਰਡ ਅਤੇ ਦਸਤਾਵੇਜ਼ ਸੰਭਾਲ ਕੇ ਰੱਖਣੇ ਪੈਣਗੇ।

ਵਿਭਾਗ ਦਾ ਕਹਿਣਾ ਹੈ ਕਿ ਇਸ ਵਿਵਸਥਾ ਦਾ ਉਦੇਸ਼ ਪੁਰਾਣੇ ਵਾਹਨਾਂ ਦੀ ਖਰੀਦ-ਵਿਕਰੀ ਨੂੰ ਸਰਕਾਰੀ ਰਿਕਾਰਡ ਵਿੱਚ ਲਿਆਉਣਾ ਅਤੇ ਟ੍ਰੈਕਿੰਗ ਨੂੰ ਸੁਚਾਰੂ ਬਣਾਉਣਾ ਹੈ। ਪੋਰਟਲ ਰਾਹੀਂ ਇਹ ਜਾਣਕਾਰੀ ਉਪਲਬਧ ਹੋਵੇਗੀ ਕਿ ਵਾਹਨ ਕਿਸ ਡੀਲਰ ਕੋਲ ਕਦੋਂ ਆਇਆ ਅਤੇ ਬਾਅਦ ਵਿੱਚ ਕਿਸ ਖਰੀਦਦਾਰ ਨੂੰ ਵੇਚਿਆ ਗਿਆ। RTO ਕਪਿਲ ਜਿੰਦਲ ਨੇ ਕਿਹਾ ਕਿ ਪੁਰਾਣੀਆਂ ਕਾਰਾਂ ਦੀ ਖਰੀਦ-ਵਿਕਰੀ ਕਰਨ ਵਾਲੇ ਸਾਰੇ ਡੀਲਰਾਂ ਲਈ ਰਜਿਸਟ੍ਰੇਸ਼ਨ ਲਾਜ਼ਮੀ ਹੋਵੇਗੀ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਇਸ ਦਾ ਮਤਲਬ ਕਾਰੋਬਾਰ ਬੰਦ ਕਰਨਾ ਨਹੀਂ ਹੈ। ਡੀਲਰ ਪਹਿਲਾਂ ਵਾਂਗ ਕਾਰਾਂ ਦੀ ਖਰੀਦ-ਵਿਕਰੀ ਕਰ ਸਕਣਗੇ, ਪਰ ਉਨ੍ਹਾਂ ਨੂੰ ਵਿਭਾਗ ਵੱਲੋਂ ਨਿਰਧਾਰਤ ਨਿਯਮਾਂ ਦੀ ਪਾਲਣਾ ਕਰਨੀ ਹੋਵੇਗੀ।

New Rule For Used Car Dealers Rto Registration To Be Mandatory