ਫਰੀਦਕੋਟ ’ਚ ਪੁਲ ਨਿਰਮਾਣ ਦੌਰਾਨ ਆਰਜ਼ੀ ਰਸਤਾ ਧੱਸਿਆ, ਆਵਾਜਾਈ ਡਾਇਵਰਟ

24/09/2026 | Public Times Bureau | Panjab

ਕੋਟਕਪੂਰਾ ਰੋਡ ’ਤੇ ਪੁਲ ਨਿਰਮਾਣ ਦੌਰਾਨ ਵੀਰਵਾਰ ਨੂੰ ਵਾਹਨਾਂ ਦੀ ਆਵਾਜਾਈ ਲਈ ਬਣਾਇਆ ਗਿਆ ਆਰਜ਼ੀ ਰਸਤਾ ਅਚਾਨਕ ਧੱਸ ਗਿਆ। ਰਸਤੇ ਦੇ ਵਿਚਕਾਰ ਵੱਡਾ ਟੋਆ ਬਣਨ ਕਾਰਨ ਪੁਲਿਸ ਨੇ ਤੁਰੰਤ ਆਵਾਜਾਈ ਰੋਕ ਕੇ ਵਾਹਨਾਂ ਨੂੰ ਬਦਲਵੇਂ ਰਸਤਿਆਂ ਰਾਹੀਂ ਡਾਇਵਰਟ ਕਰ ਦਿੱਤਾ। ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਟ੍ਰੈਫਿਕ ਪੁਲਿਸ ਦੀ ਟੀਮ ਮੌਕੇ ’ਤੇ ਪਹੁੰਚੀ ਅਤੇ ਸਥਿਤੀ ਦਾ ਜਾਇਜ਼ਾ ਲਿਆ। ਅਧਿਕਾਰੀਆਂ ਨੇ ਸੁਰੱਖਿਆ ਦੇ ਮੱਦੇਨਜ਼ਰ ਧੱਸੇ ਹਿੱਸੇ ਤੋਂ ਆਵਾਜਾਈ ਬੰਦ ਰੱਖੀ।

ਕੋਟਕਪੂਰਾ ਰੋਡ ’ਤੇ ਸੇਮ ਨਾਲੇ ਉੱਪਰ ਬਣਿਆ ਪੁਰਾਣਾ ਪੁਲ ਕਰੀਬ 60 ਸਾਲ ਪੁਰਾਣਾ ਦੱਸਿਆ ਜਾ ਰਿਹਾ ਹੈ। ਪੁਲ ਤੰਗ ਹੋਣ ਕਾਰਨ ਇੱਥੇ ਆਵਾਜਾਈ ਵਿੱਚ ਮੁਸ਼ਕਲ ਆਉਂਦੀ ਸੀ, ਜਿਸ ਦੇ ਮੱਦੇਨਜ਼ਰ ਨਵਾਂ ਪੁਲ ਬਣਾਉਣ ਦਾ ਕੰਮ ਚੱਲ ਰਿਹਾ ਹੈ। ਨਿਰਮਾਣ ਦੌਰਾਨ ਆਵਾਜਾਈ ਜਾਰੀ ਰੱਖਣ ਲਈ ਨਾਲ ਹੀ ਆਰਜ਼ੀ ਰਸਤਾ ਬਣਾਇਆ ਗਿਆ ਸੀ।

ਵੀਰਵਾਰ ਨੂੰ ਇਸ ਆਰਜ਼ੀ ਰਸਤੇ ਦਾ ਵਿਚਕਾਰਲਾ ਹਿੱਸਾ ਅਚਾਨਕ ਜ਼ਮੀਨ ਵਿੱਚ ਧੱਸ ਗਿਆ ਅਤੇ ਵੱਡਾ ਟੋਆ ਬਣ ਗਿਆ। ਸਮੇਂ ਸਿਰ ਜਾਣਕਾਰੀ ਮਿਲਣ ਕਾਰਨ ਕਿਸੇ ਵਾਹਨ ਦੇ ਧੱਸੇ ਹਿੱਸੇ ਵਿੱਚ ਫਸਣ ਤੋਂ ਪਹਿਲਾਂ ਹੀ ਰਸਤਾ ਬੰਦ ਕਰ ਦਿੱਤਾ ਗਿਆ। ਜ਼ਿਲ੍ਹਾ ਟ੍ਰੈਫਿਕ ਇੰਚਾਰਜ ਇੰਸਪੈਕਟਰ ਜਗਵੀਰ ਸਿੰਘ ਦੀ ਅਗਵਾਈ ਹੇਠ ਪੁਲਿਸ ਨੇ ਮੌਕੇ ’ਤੇ ਆਵਾਜਾਈ ਨੂੰ ਬਦਲਵੇਂ ਰਸਤਿਆਂ ਵੱਲ ਮੋੜ ਦਿੱਤਾ। ਇਸ ਦੌਰਾਨ ਵਾਹਨ ਚਾਲਕਾਂ ਨੂੰ ਵੀ ਬਦਲਵੇਂ ਰਸਤਿਆਂ ਦੀ ਵਰਤੋਂ ਕਰਨ ਦੀ ਸਲਾਹ ਦਿੱਤੀ ਗਈ। ਰਸਤਾ ਧੱਸਣ ਤੋਂ ਬਾਅਦ ਠੇਕੇਦਾਰ ਵੱਲੋਂ ਮੁਰੰਮਤ ਦਾ ਕੰਮ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਧੱਸੇ ਹਿੱਸੇ ਨੂੰ ਠੀਕ ਕਰਨ ਅਤੇ ਰਸਤੇ ਨੂੰ ਮੁੜ ਆਵਾਜਾਈ ਯੋਗ ਬਣਾਉਣ ਦੀ ਕਾਰਵਾਈ ਜਾਰੀ ਹੈ। ਮੁਰੰਮਤ ਪੂਰੀ ਹੋਣ ਤੱਕ ਇਸ ਰਸਤੇ ’ਤੇ ਆਵਾਜਾਈ ਬੰਦ ਰਹੇਗੀ।

Temporary Road Caves In During Bridge Construction In Faridkot Traffic Diverted