ਡਾਇਰੈਕਟਰ ਸਕੂਲ ਸਿੱਖਿਆ ਵਿਭਾਗ ਆਸ਼ੀਸ਼ ਕੋਹਲੀ ਨੇ ਸਕੂਲਾਂ ’ਚ ਅਧਿਆਪਕ ਤੇ ਵਿੱਦਿਆਰਥੀਆਂ ਦਾ ਮੋਬਾਈਲ ਤੇ ਲਾਈ ਪਾਬੰਦੀ

20/09/2025 | Public Times Bureau | National

ਹਿਮਾਚਲ ਪ੍ਰਦੇਸ਼ ਦੇ ਸਰਕਾਰੀ ਸਕੂਲਾਂ ’ਚ ਅਧਿਆਪਕ ਤੇ ਵਿਦਿਆਰਥੀ ਹੁਣ ਕਲਾਸਾਂ ’ਚ ਮੋਬਾੀਲ ਫੋਨ ਦੀ ਵਰਤੋਂ ਨਹੀਂ ਕਰ ਸਕਣਗੇ। ਵਿੱਦਿਅਕ ਅਦਾਰਿਆਂ ’ਚ ਮੋਬਾਈਲ ਫੋਨ ਦੇ ਵਧਦੇ ਰੁਝਾਨ ਤੇ ਵਿਦਿਆਰਥੀਆਂ ਦੀ ਪੜ੍ਹਾਈ ’ਤੇ ਪੈਂਦੇ ਅਸਰ ਨੂੰ ਦੇਖਦੇ ਹੋਏ ਸਿੱਖਿਆ ਵਿਭਾਗ ਨੇ ਕਲਾਸਾਂ ’ਚ ਮੋਬਾਈਲ ਫੋਨ ਦੀ ਵਰਤੋਂ ’ਤੇ ਪੂਰਣ ਪਾਬੰਦੀ ਲਗਾ ਦਿੱਤੀ ਹੈ। ਅਧਿਆਪਕ ਜਦੋਂ ਕਲਾਸ ’ਚ ਪੜ੍ਹਾਉਣ ਜਾਣਗੇ ਤਾਂ ਆਪਣਾ ਮੋਬਾਈਲ ਫੋਨ ਸਟਾਫ ਰੂਮ ਜਾਂ ਸੁਰੱਖਿਅਤ ਥਾਂ ’ਤੇ ਛੱਡ ਕੇ ਜਾਣਗੇ। ਵਿਦਿਆਰਥੀ ਤਾਂ ਮੋਬਾਈਲ ਸਕੂਲ ਲਿਆ ਹੀ ਨਹੀਂ ਸਕਣਗੇ। ਡਾਇਰੈਕਟਰ ਸਕੂਲ ਸਿੱਖਿਆ ਵਿਭਾਗ ਆਸ਼ੀਸ਼ ਕੋਹਲੀ ਨੇ ਇਸ ਸਬੰਧ ’ਚ ਨੋਟੀਫਿਕੇਸ਼ਨ ਜਾਰੀ ਕਰ ਦਿੱਤਾ ਹੈ। ਉਨ੍ਹਾਂ ਨੇ ਸਾਰੇ ਜ਼ਿਲ੍ਹਿਆਂ ਦੇ ਡਿਪਟੀ ਡਾਇਰੈਕਟਰਾਂ ਨੂੰ ਪੱਤਰ ਲਿਖਿਆ ਹੈ। ਵਿਭਾਗ ਨੇ ਜਾਰੀ ਆਦੇਸ਼ ’ਚ ਕਿਹਾ ਹੈ ਕਿ ਮੋਬਾਈਲ ਫੋਨ ਵਿਦਿਆਰਥੀਆਂ ਦਾ ਧਿਆਨ ਕਲਾਸ ਤੋਂ ਹਟਾ ਕੇ ਇੰਟਰਨੈੱਟ ਮੀਡੀਆ ਵੱਲ ਖਿੱਚਦੇ ਹਨ। ਵਿਭਾਗ ਨੇ ਸਾਰੇ ਸਕੂਲਾਂ ਦੇ ਪ੍ਰਿੰਸੀਪਲਾਂ ਤੇ ਮੁੱਖ ਅਧਿਆਪਕਾਂ ਨੂੰ ਨਿਰਦੇਸ਼ ਦਿੱਤੇ ਹਨ ਕਿ ਆਦੇਸ਼ ਦੀ ਸਖਤੀ ਨਾਲ ਪਾਲਣਾ ਕੀਤੀ ਜਾਏ। ਜੇਕਰ ਕੋਈ ਅਧਿਆਪਕ ਇਸਦੀ ਉਲੰਘਣਾ ਕਰਦਾ ਹੈ ਤਾਂ ਅਨੁਸ਼ਾਸਨੀ ਕਾਰਵਾਈ ਹੋਵੇਗੀ। ਡਿਪਟੀ ਡਾਇਰੈਕਟਰਾਂ ਨੂੰ ਨਿਰਦੇਸ਼ ਦਿੱਤੇ ਹਨ ਕਿ ਅਚਾਨਕ ਨਿਰੀਖਣ ਕਰਨ। ਹੰਗਾਮੀ ਸਥਿਤੀ ’ਚ ਵਿਦਿਆਰਥੀਆਂ ਤੇ ਅਧਿਆਪਕਾਂ ਨੂੰ ਸੁਵਿਧਾ ਲਈ ਸਕੂਲ ’ਚ ਲੈਂਡਲਾਈਨ ਫੋਨ ਦੀ ਵਿਵਸਥਾ ਹੋਣੀ ਚਾਹੀਦੀ ਹੈ, ਜਿਸਦੀ ਜਾਣਕਾਰੀ ਮਾਤਾ-ਪਿਤਾ ਨਾਲ ਸਾਂਝੀ ਕੀਤੀ ਜਾਏਗੀ।

Director School Education Department Ashish Kohli Has Banned Mobile Phones For Teachers And Students In Schools