ਆਫ-ਰੋਡਿੰਗ ਦਾ ਬਿਜਲੀ ਵਾਲਾ ਦੌਰ ਸ਼ੁਰੂ ਕਰਨ ਦੀ ਤਿਆਰੀ, ਜਲਦ ਦਸਤਕ ਦੇ ਸਕਦੀ ਹੈ ਮਹਿੰਦਰਾ ਦੀ ਨਵੀਂ ਥਾਰ ਈਵੀ
07/07/2026 | Public Times Bureau | Panjabਭਾਰਤੀ ਬਾਜ਼ਾਰ ਵਿੱਚ ਇਲੈਕਟ੍ਰਿਕ ਵਾਹਨਾਂ ਦੀ ਵਧਦੀ ਮੰਗ ਨੂੰ ਦੇਖਦੇ ਹੋਏ ਵਾਹਨ ਨਿਰਮਾਤਾ ਕੰਪਨੀਆਂ ਲਗਾਤਾਰ ਨਵੇਂ ਮਾਡਲ ਲਿਆ ਰਹੀਆਂ ਹਨ। ਇਸੇ ਕੜੀ ਵਿੱਚ ਮਹਿੰਦਰਾ ਵੀ ਆਪਣੀ ਮਸ਼ਹੂਰ ਥਾਰ ਦਾ ਇਲੈਕਟ੍ਰਿਕ ਰੂਪ ਬਾਜ਼ਾਰ ਵਿੱਚ ਉਤਾਰਨ ਦੀ ਤਿਆਰੀ ਕਰ ਰਹੀ ਹੈ। ਹਾਲਾਂਕਿ ਕੰਪਨੀ ਨੇ ਅਜੇ ਤੱਕ ਇਸ ਸਬੰਧੀ ਕੋਈ ਅਧਿਕਾਰਤ ਐਲਾਨ ਨਹੀਂ ਕੀਤਾ, ਪਰ ਮੰਨਿਆ ਜਾ ਰਿਹਾ ਹੈ ਕਿ ਇਸ ਨੂੰ ਜਲਦ ਪੇਸ਼ ਕੀਤਾ ਜਾ ਸਕਦਾ ਹੈ। ਜਾਣਕਾਰੀ ਅਨੁਸਾਰ ਨਵੀਂ ਥਾਰ ਈਵੀ ਨੂੰ ਆਧੁਨਿਕ ਡਿਜ਼ਾਈਨ ਅਤੇ ਆਫ-ਰੋਡਿੰਗ ਸਮਰੱਥਾ ਨੂੰ ਧਿਆਨ ਵਿੱਚ ਰੱਖ ਕੇ ਤਿਆਰ ਕੀਤਾ ਜਾ ਰਿਹਾ ਹੈ। ਇਸ ਵਿੱਚ ਗੋਲ ਕੋਨਿਆਂ ਵਾਲੀਆਂ ਚੌਰਸ ਆਕਾਰ ਦੀਆਂ ਐਲਈਡੀ ਹੈੱਡਲਾਈਟਾਂ, ਮਜ਼ਬੂਤ ਸਟੀਲ ਦਾ ਅੱਗਲਾ ਬੰਪਰ ਅਤੇ ਦਮਦਾਰ ਬਾਹਰੀ ਬਣਾਵਟ ਦਿੱਤੀ ਜਾ ਸਕਦੀ ਹੈ, ਜੋ ਇਸ ਨੂੰ ਵੱਖਰੀ ਪਹਿਚਾਣ ਦੇਵੇਗੀ।
ਇਹ ਇਲੈਕਟ੍ਰਿਕ ਐਸਯੂਵੀ ਕੰਪਨੀ ਦੇ ਆਧੁਨਿਕ ਇੰਗਲੋ ਪਲੇਟਫਾਰਮ 'ਤੇ ਤਿਆਰ ਕੀਤੀ ਜਾ ਰਹੀ ਹੈ। ਇਸ ਪਲੇਟਫਾਰਮ ਦੀ ਮਦਦ ਨਾਲ ਵਾਹਨ ਨੂੰ ਸੜਕਾਂ ਦੇ ਨਾਲ-ਨਾਲ ਔਖੇ ਰਸਤਿਆਂ 'ਤੇ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਯੋਗ ਬਣਾਇਆ ਜਾ ਸਕਦਾ ਹੈ। ਸੰਭਾਵਨਾ ਹੈ ਕਿ ਕੰਪਨੀ ਇਸ ਨੂੰ ਦੋ ਬੈਟਰੀ ਵਿਕਲਪਾਂ ਨਾਲ ਪੇਸ਼ ਕਰੇਗੀ। ਇਨ੍ਹਾਂ ਵਿੱਚ 59 ਕਿਲੋਵਾਟ-ਘੰਟਾ ਅਤੇ 79 ਕਿਲੋਵਾਟ-ਘੰਟਾ ਸਮਰੱਥਾ ਵਾਲੇ ਬੈਟਰੀ ਪੈਕ ਸ਼ਾਮਲ ਹੋ ਸਕਦੇ ਹਨ। ਵੱਡੇ ਬੈਟਰੀ ਪੈਕ ਨਾਲ ਇਹ ਇਲੈਕਟ੍ਰਿਕ ਵਾਹਨ ਇੱਕ ਵਾਰ ਪੂਰੀ ਤਰ੍ਹਾਂ ਚਾਰਜ ਹੋਣ 'ਤੇ ਕਰੀਬ 550 ਤੋਂ 600 ਕਿਲੋਮੀਟਰ ਤੱਕ ਦੀ ਦੂਰੀ ਤੈਅ ਕਰ ਸਕਦਾ ਹੈ।
ਮਹਿੰਦਰਾ ਇਸ ਤੋਂ ਪਹਿਲਾਂ ਥਾਰ ਈਵੀ ਦਾ ਸੰਕਲਪ ਮਾਡਲ ਵੀ ਪੇਸ਼ ਕਰ ਚੁੱਕੀ ਹੈ। ਹੁਣ ਕੰਪਨੀ ਇਸ ਦੇ ਉਤਪਾਦਨ ਮਾਡਲ ਨੂੰ ਅੰਤਿਮ ਰੂਪ ਦੇਣ ਵਿੱਚ ਜੁਟੀ ਹੋਈ ਹੈ, ਜਿਸ ਕਾਰਨ ਇਸ ਦੀ ਲਾਂਚਿੰਗ ਨੂੰ ਲੈ ਕੇ ਉਤਸ਼ਾਹ ਵਧ ਗਿਆ ਹੈ। ਭਾਵੇਂ ਕੰਪਨੀ ਵੱਲੋਂ ਅਜੇ ਤੱਕ ਕੋਈ ਅਧਿਕਾਰਤ ਤਾਰੀਖ ਦਾ ਐਲਾਨ ਨਹੀਂ ਕੀਤਾ ਗਿਆ, ਪਰ ਉਦਯੋਗ ਨਾਲ ਜੁੜੀਆਂ ਜਾਣਕਾਰੀਆਂ ਮੁਤਾਬਕ ਇਸ ਇਲੈਕਟ੍ਰਿਕ ਐਸਯੂਵੀ ਨੂੰ 15 ਅਗਸਤ ਦੇ ਆਸ-ਪਾਸ ਪੇਸ਼ ਕੀਤੇ ਜਾਣ ਦੀ ਉਮੀਦ ਜਤਾਈ ਜਾ ਰਹੀ ਹੈ।
Gearing Up To Kickstart The Electric Off roading Era Mahindra s New Thar Ev Could Arrive Soon
RSS FEED