‘ਹੈੱਡਮਾਸਟਰਜ਼’ ਬ੍ਰਾਂਡ ਦੇ ਨਾਂ ’ਤੇ 1.65 ਕਰੋੜ ਦੀ ਕਥਿਤ ਠੱਗੀ, ਸੈਲੂਨ ਸੰਚਾਲਕ ਜੋੜੇ ’ਤੇ FIR

08/08/2026 | Public Times Bureau | Panjab

ਮਾਮਲੇ ਵਿੱਚ ਸੈਕਟਰ-3 ਥਾਣਾ ਪੁਲਿਸ ਨੇ ਸੈਲੂਨ ਸੰਚਾਲਕ ਵੀਰ ਕੌਲ ਅਤੇ ਉਸ ਦੀ ਪਤਨੀ ਪਰਮਿੰਦਰ ਕੌਰ ਉਰਫ਼ ਪੰਮੀ ਕੌਲ ਖ਼ਿਲਾਫ਼ ਐੱਫਆਈਆਰ ਦਰਜ ਕੀਤੀ ਹੈ। ਪੁਲਿਸ ਨੇ ਧੋਖਾਧੜੀ, ਅਪਰਾਧਿਕ ਭਰੋਸਾਘਾਤ, ਅਪਰਾਧਿਕ ਸਾਜ਼ਿਸ਼ ਅਤੇ ਧਮਕੀ ਦੇਣ ਸਬੰਧੀ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਪੁਲਿਸ ਮੁਤਾਬਕ ਸੈਕਟਰ-8 ਸਥਿਤ ਹੇਅਰ ਰੇਜ਼ਰਜ਼ ਐੱਲਐੱਲਪੀ ਦੇ ਭਾਗੀਦਾਰ ਮੁਨੀਸ਼ ਬਜਾਜ ਦੀ ਸ਼ਿਕਾਇਤ ’ਤੇ ਇਹ ਕਾਰਵਾਈ ਕੀਤੀ ਗਈ। ਸ਼ਿਕਾਇਤ ਅਨੁਸਾਰ ਮੁਲਜ਼ਮ ਸੈਕਟਰ-8ਸੀ ਵਿੱਚ ‘ਹੈੱਡਮਾਸਟਰਜ਼’ ਸੈਲੂਨ ਚਲਾਉਂਦੇ ਸਨ ਅਤੇ ਮਕਾਨ ਮਾਲਕ ਨਾਲ ਇੱਕ ਕਰੋੜ ਰੁਪਏ ਤੋਂ ਵੱਧ ਦੇ ਬਕਾਇਆ ਕਿਰਾਏ ਦਾ ਵਿਵਾਦ ਚੱਲ ਰਿਹਾ ਸੀ।

ਸ਼ਿਕਾਇਤਕਰਤਾ ਦਾ ਦੋਸ਼ ਹੈ ਕਿ 20 ਮਾਰਚ 2024 ਨੂੰ ਹੋਏ ਤ੍ਰਿਪੱਖੀ ਸਮਝੌਤੇ ਤਹਿਤ ਉਸ ਨੇ ਮੁਲਜ਼ਮਾਂ ਵੱਲੋਂ ਮਕਾਨ ਮਾਲਕ ਨੂੰ 1.15 ਕਰੋੜ ਰੁਪਏ ਬਕਾਇਆ ਕਿਰਾਇਆ ਅਦਾ ਕੀਤਾ। ਇਸ ਤੋਂ ਇਲਾਵਾ ਉਸੇ ਦਿਨ ਹੋਏ ਐੱਮਓਯੂ ਤਹਿਤ ਵੀਰ ਕੌਲ ਨੇ ਚੰਡੀਗੜ੍ਹ ਵਿੱਚ ‘ਹੈੱਡਮਾਸਟਰਜ਼’ ਬ੍ਰਾਂਡ ਦੇ ਵਿਸ਼ੇਸ਼ ਅਧਿਕਾਰ ਦੇਣ ਦਾ ਵਾਅਦਾ ਕੀਤਾ। ਇਸ ਲਈ ਇੱਕ ਕਰੋੜ ਰੁਪਏ ਦੀ ਰਕਮ ਤੈਅ ਹੋਈ, ਜਿਸ ਵਿੱਚੋਂ 50 ਲੱਖ ਰੁਪਏ ਵੱਖ-ਵੱਖ ਕਿਸ਼ਤਾਂ ਵਿੱਚ ਪਰਮਿੰਦਰ ਕੌਰ ਦੇ ਬੈਂਕ ਖਾਤੇ ਵਿੱਚ ਜਮ੍ਹਾਂ ਕਰਵਾਏ ਗਏ।

ਐੱਫਆਈਆਰ ਮੁਤਾਬਕ ਬਾਅਦ ਵਿੱਚ ਸ਼ਿਕਾਇਤਕਰਤਾ ਨੂੰ ਪਤਾ ਲੱਗਿਆ ਕਿ ‘ਹੈੱਡਮਾਸਟਰਜ਼’ ਨਾਲ ਸਬੰਧਤ ਵੱਖ-ਵੱਖ ਟ੍ਰੇਡਮਾਰਕ ਅਤੇ ਕਾਰੋਬਾਰੀ ਅਧਿਕਾਰ ਸਾਲ 2020 ਵਿੱਚ ਹੀ ਗਿਲਜ਼ ਗਰੁੱਪ ਬਿਊਟੀ ਐਂਡ ਵੈਲਨੈੱਸ ਪ੍ਰਾਈਵੇਟ ਲਿਮਟਿਡ ਦੇ ਨਾਂ ਕੀਤੇ ਜਾ ਚੁੱਕੇ ਸਨ। ਦੋਸ਼ ਹੈ ਕਿ ਇਸ ਜਾਣਕਾਰੀ ਨੂੰ ਲੁਕਾ ਕੇ ਮੁਲਜ਼ਮਾਂ ਨੇ ਬ੍ਰਾਂਡ ਦੇ ਵਿਸ਼ੇਸ਼ ਅਧਿਕਾਰ ਦੇਣ ਦੇ ਨਾਂ ’ਤੇ ਕੁੱਲ 1.65 ਕਰੋੜ ਰੁਪਏ ਹਾਸਲ ਕੀਤੇ।

ਸ਼ਿਕਾਇਤ ਵਿੱਚ ਇਹ ਵੀ ਦੋਸ਼ ਲਾਇਆ ਗਿਆ ਹੈ ਕਿ ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਰਕਮ ਵਾਪਸ ਮੰਗਣ ’ਤੇ ਮੁਲਜ਼ਮਾਂ ਨੇ ਪੈਸੇ ਵਾਪਸ ਕਰਨ ਤੋਂ ਇਨਕਾਰ ਕਰ ਦਿੱਤਾ ਅਤੇ ਸ਼ਿਕਾਇਤਕਰਤਾ ਤੇ ਉਸ ਦੇ ਪਰਿਵਾਰ ਨੂੰ ਕਥਿਤ ਤੌਰ ’ਤੇ ਗੰਭੀਰ ਨਤੀਜੇ ਭੁਗਤਣ ਦੀਆਂ ਧਮਕੀਆਂ ਦਿੱਤੀਆਂ। ਪੁਲਿਸ ਹੁਣ ਸਮਝੌਤਿਆਂ, ਬੈਂਕ ਲੈਣ-ਦੇਣ, ਟ੍ਰੇਡਮਾਰਕ ਹਸਤਾਂਤਰਨ ਨਾਲ ਸਬੰਧਤ ਦਸਤਾਵੇਜ਼ਾਂ ਅਤੇ ਹੋਰ ਸਬੂਤਾਂ ਦੀ ਜਾਂਚ ਕਰ ਰਹੀ ਹੈ।

Alleged Fraud Of 1 65 Crore In The Name Of headmasters Brand Fir Against Salon owning Couple