ਪਿਊਰਟੋ ਰੀਕੋ ਦੇ ਸਾਨ ਜੁਆਨ ਵਿੱਚ ਹੋਣ ਵਾਲੇ 75ਵੇਂ ਮਿਸ ਯੂਨੀਵਰਸ ਮੁਕਾਬਲੇ ਨੂੰ ਵੱਡਾ ਝਟਕਾ ਲੱਗਾ ਹੈ। ਗ੍ਰੈਂਡ ਫਿਨਾਲੇ ਤੋਂ ਪਹਿਲਾਂ ਹੀ 15 ਦੇਸ਼ਾਂ ਦੀਆਂ ਮੁਕਾਬਲੇਬਾਜ਼ਾਂ ਇਸ ਸਾਲ ਮੁਕਾਬਲੇ ਤੋਂ ਬਾਹਰ ਹੋ ਗਈਆਂ ਹਨ। ਇਸ ਪਿੱਛੇ ਫ੍ਰੈਂਚਾਇਜ਼ੀ ਵਿਵਾਦ, ਵੀਜ਼ਾ ਸਮੱਸਿਆਵਾਂ ਅਤੇ ਨਿੱਜੀ ਸਿਹਤ ਨਾਲ ਜੁੜੇ ਕਾਰਨ ਦੱਸੇ ਜਾ ਰਹੇ ਹਨ।
ਫ੍ਰੈਂਚਾਇਜ਼ੀ ਵਿਵਾਦ ਕਾਰਨ 6 ਏਸ਼ੀਆਈ ਦੇਸ਼ ਬਾਹਰ
ਥਾਈਲੈਂਡ, ਮਲੇਸ਼ੀਆ, ਵੀਅਤਨਾਮ, ਇੰਡੋਨੇਸ਼ੀਆ, ਸਿੰਗਾਪੁਰ ਅਤੇ ਲਾਓਸ ਦੀਆਂ ਮੁਕਾਬਲੇਬਾਜ਼ਾਂ ਇਸ ਵਾਰ ਮਿਸ ਯੂਨੀਵਰਸ ਦੇ ਮੰਚ ’ਤੇ ਨਜ਼ਰ ਨਹੀਂ ਆਉਣਗੀਆਂ। ਰਿਪੋਰਟਾਂ ਮੁਤਾਬਕ ਕਾਰਪੋਰੇਟ ਅਤੇ ਫ੍ਰੈਂਚਾਇਜ਼ੀ ਵਿਵਾਦਾਂ ਕਾਰਨ ਇਨ੍ਹਾਂ ਦੇਸ਼ਾਂ ਨੂੰ ਹਿੱਸਾ ਲੈਣ ਤੋਂ ਰੋਕਿਆ ਗਿਆ ਹੈ। ਹਾਲਾਂਕਿ, ਇਨ੍ਹਾਂ ਮੁਕਾਬਲੇਬਾਜ਼ਾਂ ਦੇ ਰਾਸ਼ਟਰੀ ਖਿਤਾਬ ਬਰਕਰਾਰ ਰਹਿਣਗੇ। ਵੀਅਤਨਾਮ ਅਗਲੇ ਸਾਲ ਹੋਣ ਵਾਲੇ 76ਵੇਂ ਮੁਕਾਬਲੇ ਦੀ ਮੇਜ਼ਬਾਨੀ ਕਰੇਗਾ।
ਵੀਜ਼ਾ ਸਮੱਸਿਆਵਾਂ ਵੀ ਬਣੀਆਂ ਰੁਕਾਵਟ
ਅਮਰੀਕੀ ਵੀਜ਼ਾ ਅਤੇ ਦਸਤਾਵੇਜ਼ਾਂ ਨਾਲ ਜੁੜੀਆਂ ਮੁਸ਼ਕਲਾਂ ਕਾਰਨ ਨੇਪਾਲ, ਜ਼ਿੰਬਾਬਵੇ, ਜ਼ੈਂਬੀਆ, ਅੰਗੋਲਾ ਅਤੇ ਕਾਂਗੋ ਗਣਰਾਜ ਦੀਆਂ ਮੁਕਾਬਲੇਬਾਜ਼ਾਂ ਵੀ ਹਿੱਸਾ ਨਹੀਂ ਲੈ ਸਕਣਗੀਆਂ।
ਸਿਹਤ ਕਾਰਨ ਵੀ ਮੁਕਾਬਲੇ ਤੋਂ ਹਟੀਆਂ ਮੁਕਾਬਲੇਬਾਜ਼ਾਂ
ਬੁਲਗਾਰੀਆ ਦੀ ਐਨਾ-ਮਾਰੀਆ ਕਾਰ ਹਾਦਸੇ ਵਿੱਚ ਜ਼ਖ਼ਮੀ ਹੋਣ ਕਾਰਨ ਮੁਕਾਬਲੇ ਤੋਂ ਬਾਹਰ ਹੋ ਗਈ ਹੈ। ਉੱਥੇ ਹੀ ਆਸਟ੍ਰੀਆ ਦੀ ਵਿਕਟੋਰੀਆ ਐਮਰਸਨ ਨੇ ਮਾਨਸਿਕ ਅਤੇ ਸਰੀਰਕ ਸਿਹਤ ਨੂੰ ਤਰਜੀਹ ਦਿੰਦਿਆਂ ਮੁਕਾਬਲੇ ਵਿੱਚੋਂ ਹਟਣ ਦਾ ਫ਼ੈਸਲਾ ਕੀਤਾ ਹੈ।
ਇਸ ਤੋਂ ਇਲਾਵਾ ਮਾਲਦੀਵ ਦੀ ਆਮੀਨਾਥ ਯੂਇਨ ਮੁਹੰਮਦ ਅਤੇ ਮੋਰੱਕੋ ਦੀ ਸਾਰਾ ਅਲੱਲੀ ਨੇ ਵੀ ਮੁਕਾਬਲੇ ਤੋਂ ਆਪਣਾ ਨਾਂ ਵਾਪਸ ਲੈ ਲਿਆ ਹੈ।
ਇੰਨੀ ਵੱਡੀ ਗਿਣਤੀ ਵਿੱਚ ਮੁਕਾਬਲੇਬਾਜ਼ਾਂ ਦੇ ਬਾਹਰ ਹੋਣ ਕਾਰਨ 75ਵੇਂ ਮਿਸ ਯੂਨੀਵਰਸ ਮੁਕਾਬਲੇ ਨੂੰ ਲੈ ਕੇ ਕੌਮਾਂਤਰੀ ਪੱਧਰ ’ਤੇ ਚਰਚਾ ਤੇਜ਼ ਹੋ ਗਈ ਹੈ।
