ਭਾਰਤੀ ਫੌਜ ਨੇ ਕਿਹਾ ਕਿ ਸਿਆਚਿਨ ਵਾਰੀਅਰਜ਼ ਨੇ ਬੀਐਸਐਨਐਲ ਦੀ ਮਦਦ ਨਾਲ 15,500 ਫੁੱਟ ਤੋਂ ਵੱਧ ਦੀ ਉਚਾਈ ‘ਤੇ ਪਹਿਲਾ ਟਾਵਰ ਲਗਾਇਆ ਹੈ। ਇਸ ਦੀ ਮਦਦ ਨਾਲ ਸੈਨਿਕਾਂ ਨੂੰ ਮੋਬਾਈਲ ਕਨੈਕਟੀਵਿਟੀ ਮਿਲ ਸਕੇਗੀ। ਮਹਿੰਦਰਾ ਗਰੁੱਪ ਦੇ ਚੇਅਰਮੈਨ ਆਨੰਦ ਮਹਿੰਦਰਾ ਨੇ ਲੱਦਾਖ ਦੇ ਸਿਆਚਿਨ ‘ਚ 15,500 ਫੁੱਟ ਤੋਂ ਵੱਧ ਦੀ ਉਚਾਈ ‘ਤੇ ਲਗਾਏ ਗਏ ਪਹਿਲੇ ਮੋਬਾਈਲ ਟਾਵਰ ਨੂੰ ਚੰਦਰਯਾਨ 3 ਦੇ ਵਿਕਰਮ ਲੈਂਡਰ ਵਾਂਗ ਮਹੱਤਵਪੂਰਨ ਦੱਸਿਆ ਹੈ। ਉਨ੍ਹਾਂ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਤੇ ਲਿਖਿਆ ਕਿ ‘ਦੇਵਸਿੰਘ ਨੇ ਸਿਆਚਿਨ ‘ਚ ਲਗਾਏ ਗਏ ਪਹਿਲੇ ਮੋਬਾਈਲ ਟਾਵਰ ਦੀਆਂ ਇਹ ਤਸਵੀਰਾਂ ਸ਼ੇਅਰ ਕੀਤੀਆਂ ਹਨ।’ ਉਨ੍ਹਾਂ ਕਿਹਾ ਕਿ “ਸਾਡੀ ਅਸ਼ਾਂਤ ਦੁਨੀਆ ਵਿੱਚ ਇਹ ਇੱਕ ਛੋਟੀ ਜਿਹੀ ਘਟਨਾ ਹੈ, ਪਰ ਸਭ ਤੋਂ ਉੱਚੇ ਯੁੱਧ ਦੇ ਮੈਦਾਨ ਵਿੱਚ ਹਰ ਰੋਜ਼ ਆਪਣੀ ਜਾਨ ਜੋਖਮ ਵਿੱਚ ਪਾਉਣ ਵਾਲੇ ਸੈਨਿਕਾਂ ਲਈ ਇਹ ਯੰਤਰ ਵਿਕਰਮ ਲੈਂਡਰ ਜਿੰਨਾ ਹੀ ਮਹੱਤਵਪੂਰਨ ਹੈ। ਉਹ ਹੁਣ ਆਪਣੇ ਪਰਿਵਾਰ ਨਾਲ ਜੁੜੇ ਰਹਿਣਗੇ। ਇਹ ਮੇਰੇ ਲਈ ਸੱਚਮੁੱਚ ਵੱਡੀ ਖ਼ਬਰ ਹੈ।”