ਰੂਸ-ਯੂਕਰੇਨ ਜੰਗ ਲੰਬੇ ਸਮੇਂ ਬਾਅਦ ਵੀ ਰੁਕ ਨਹੀਂ ਰਹੀ ਹੈ। ਦੋਵੇਂ ਦੇਸ਼ ਇਕ ਦੂਜੇ 'ਤੇ ਲਗਾਤਾਰ ਡਰੋਨ ਹਮਲੇ ਕਰ ਰਹੇ ਹਨ। ਇਸ ਦੌਰਾਨ ਰੂਸ ਨੇ ਦਾਅਵਾ ਕੀਤਾ ਹੈ ਕਿ ਉਸ ਨੇ ਮਾਸਕੋ ਵਿੱਚ 20 ਯੂਕਰੇਨੀ ਡਰੋਨਾਂ ਨੂੰ ਡੇਗ ਦਿੱਤਾ ਹੈ। ਰੱਖਿਆ ਮੰਤਰਾਲੇ ਨੇ ਐਤਵਾਰ ਨੂੰ ਕਿਹਾ ਕਿ ਰੂਸੀ ਹਵਾਈ ਰੱਖਿਆ ਨੇ ਮਾਸਕੋ ਸਮੇਤ ਰੂਸੀ ਖੇਤਰਾਂ 'ਤੇ 20 ਯੂਕਰੇਨੀ ਡਰੋਨਾਂ ਨੂੰ ਡੇਗ ਦਿੱਤਾ ਹੈ। ਮਾਸਕੋ ਦੇ ਮੇਅਰ ਸਰਗੇਈ ਸੋਬਯਾਨਿਨ ਨੇ ਕਿਹਾ ਕਿ ਰੂਸ ਦੀ ਰਾਜਧਾਨੀ ਵੱਲ ਜਾ ਰਹੇ ਕਈ ਡਰੋਨ ਤਬਾਹ ਕਰ ਦਿੱਤੇ ਗਏ ਹਨ। ਰੂਸ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਯੂਕਰੇਨੀ ਡਰੋਨ ਮਾਸਕੋ, ਤੁਲਾ, ਕਲੁਗਾ ਅਤੇ ਬ੍ਰਿਆਂਸਕ ਸਮੇਤ ਖੇਤਰਾਂ ਵਿੱਚ ਡੇਗੇ ਗਏ। ਖੇਤਰ ਦੇ ਗਵਰਨਰ ਅਲੈਕਸੀ ਡਯੂਮਿਨ ਨੇ ਦੱਸਿਆ ਕਿ ਤੁਲਾ ਵਿੱਚ ਇੱਕ ਵਿਅਕਤੀ ਜ਼ਖ਼ਮੀ ਹੋ ਗਿਆ। ਮਾਸਕੋ ਦੇ ਮੇਅਰ ਸਰਗੇਈ ਸੋਬਯਾਨਿਨ ਨੇ ਕਿਹਾ, ''ਰਾਤ 'ਚ ਵੱਡੇ ਪੱਧਰ 'ਤੇ ਡਰੋਨ ਹਮਲੇ ਦੀ ਕੋਸ਼ਿਸ਼ ਕੀਤੀ ਗਈ। ਰੂਸੀ ਅਧਿਕਾਰੀਆਂ ਨੇ ਦੱਸਿਆ ਕਿ ਮਾਸਕੋ ਖੇਤਰ ਦੇ ਕਈ ਇਲਾਕਿਆਂ 'ਚ ਯੂਕਰੇਨੀ ਡਰੋਨ ਨੂੰ ਡੇਗਿਆ ਗਿਆ।
ਕਾਮਰਸੈਂਟ ਅਖਬਾਰ ਨੇ ਕਿਹਾ ਕਿ ਡਰੋਨ ਹਮਲੇ ਕਾਰਨ ਮਾਸਕੋ ਦੇ ਮੁੱਖ ਹਵਾਈ ਅੱਡਿਆਂ 'ਤੇ ਉਡਾਣਾਂ ਦੇਰੀ ਜਾਂ ਰੱਦ ਹੋਈਆਂ। ਇੱਕ ਦਿਨ ਪਹਿਲਾਂ ਵੀ ਯੂਕਰੇਨ ਨੇ ਰੂਸ ਦੇ ਖਿਲਾਫ ਜਵਾਬੀ ਕਾਰਵਾਈ ਦੀ ਕੋਸ਼ਿਸ਼ ਕੀਤੀ ਸੀ। ਦਰਅਸਲ, ਯੂਕਰੇਨ ਨੇ ਕਈ ਡਰੋਨ ਹਮਲੇ ਕੀਤੇ, ਪਰ ਰੂਸੀ ਰੱਖਿਆ ਪ੍ਰਣਾਲੀ ਨੇ ਕ੍ਰੀਮੀਆ 'ਤੇ 16 ਯੂਕਰੇਨ ਦੇ ਡਰੋਨਾਂ ਨੂੰ ਡੇਗ ਦਿੱਤਾ। ਰੂਸੀ ਰੱਖਿਆ ਮੰਤਰਾਲੇ ਨੇ ਇਸ ਦੀ ਪੁਸ਼ਟੀ ਕੀਤੀ ਹੈ। ਦਰਅਸਲ, ਯੁੱਧ ਦੀ ਸ਼ੁਰੂਆਤ 'ਚ ਰੂਸ ਦਾ ਧਿਆਨ ਕੀਵ 'ਤੇ ਸੀ ਪਰ ਹੁਣ ਯੂਕਰੇਨ ਨੇ ਉੱਥੇ ਆਪਣੀ ਪਕੜ ਮਜ਼ਬੂਤ ਕਰ ਲਈ ਹੈ, ਜਿਸ ਤੋਂ ਬਾਅਦ ਰੂਸੀ ਫ਼ੌਜ ਨੇ ਪੂਰਬ 'ਤੇ ਧਿਆਨ ਕੇਂਦਰਿਤ ਕਰ ਲਿਆ ਹੈ। ਉਨ੍ਹਾਂ ਕੋਲ ਯੂਕਰੇਨੀ ਖੇਤਰ ਦਾ 20 ਪ੍ਰਤੀਸ਼ਤ ਤੋਂ ਵੀ ਘੱਟ ਹਿੱਸਾ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਯੂਕਰੇਨ ਦੀ ਫੌਜ ਨੇ ਜੂਨ ਵਿੱਚ ਜਵਾਬੀ ਕਾਰਵਾਈ ਸ਼ੁਰੂ ਕੀਤੀ ਸੀ ਅਤੇ ਪੂਰਬ ਅਤੇ ਦੱਖਣ ਵਿੱਚ ਮਾਮੂਲੀ ਲਾਭ ਹਾਸਲ ਕੀਤਾ ਹੈ।
