Hero Vida ਹੁਣ ਇਲੈਕਟ੍ਰਿਕ ਸਕੂਟਰਾਂ ਅਤੇ ਮੋਟਰਸਾਈਕਲਾਂ ਤੋਂ ਅੱਗੇ ਵਧ ਕੇ ਇਲੈਕਟ੍ਰਿਕ ਕਾਰ ਸੈਗਮੈਂਟ ਵਿੱਚ ਵੀ ਦਾਖ਼ਲੇ ਦੀ ਤਿਆਰੀ ਕਰ ਰਹੀ ਹੈ। ਕੰਪਨੀ ਦੀ ਨਵੀਂ Vida Novus ਰੇਂਜ ਤਹਿਤ NEX 1, NEX 2 ਅਤੇ NEX 3 ਮਾਡਲ ਪੇਸ਼ ਕੀਤੇ ਜਾਣੇ ਹਨ। ਇਨ੍ਹਾਂ ਵਿੱਚੋਂ NEX 3 ਇੱਕ ਅਲਟਰਾ-ਕੰਪੈਕਟ ਦੋ ਸੀਟਰ ਇਲੈਕਟ੍ਰਿਕ ਮਾਈਕ੍ਰੋ SUV ਹੈ।
Hero ਨੇ ਪਿਛਲੇ ਸਾਲ EICMA ਈਵੈਂਟ ਵਿੱਚ NEX 3 ਦਾ ਪ੍ਰਦਰਸ਼ਨ ਕੀਤਾ ਸੀ। ਹੁਣ ਸਾਹਮਣੇ ਆਈਆਂ ਡਿਜ਼ਾਈਨ ਪੇਟੈਂਟ ਤਸਵੀਰਾਂ ਵਿੱਚ ਇਸ ਦੇ ਕਈ ਖ਼ਾਸ ਫੀਚਰਜ਼ ਦੇਖਣ ਨੂੰ ਮਿਲੇ ਹਨ। ਇਸ ਦੀ ਸਭ ਤੋਂ ਵੱਡੀ ਖ਼ਾਸੀਅਤ ਸਿੰਗਲ ਵਿੰਗ-ਸਟਾਈਲ ਡੋਰ ਹੈ, ਜੋ ਇਸ ਨੂੰ ਆਮ ਕਾਰਾਂ ਤੋਂ ਵੱਖਰਾ ਬਣਾਉਂਦਾ ਹੈ।
NEX 3 ਦੇ ਅਗਲੇ ਹਿੱਸੇ ਵਿੱਚ V-ਸ਼ੇਪ ਗ੍ਰਿਲ, ਲੰਬਵਤ LED ਲਾਈਟਿੰਗ ਐਲੀਮੈਂਟਸ ਅਤੇ ਫੁੱਲ-ਵਿਡਥ LED ਸਟ੍ਰਿਪ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ ਵੱਡੇ ਐਰੋ-ਆਪਟੀਮਾਈਜ਼ਡ ਅਲੌਏ ਵ੍ਹੀਲਜ਼, ਫਲੇਅਰਡ ਵ੍ਹੀਲ ਆਰਚ ਅਤੇ ਢਲਾਣ ਵਾਲੀ ਰੂਫਲਾਈਨ ਇਸ ਦੀ ਦਿੱਖ ਨੂੰ ਖ਼ਾਸ ਬਣਾਉਂਦੇ ਹਨ। ਪਿਛਲੇ ਪਾਸੇ ਹੈਕਸਾਗੋਨਲ ਡਿਜ਼ਾਈਨ ਵਾਲਾ ਬੂਟ ਕੈਪ ਅਤੇ ਵੱਖਰਾ ਬੰਪਰ ਮਿਲਦਾ ਹੈ।
ਇਸ ਇਲੈਕਟ੍ਰਿਕ ਮਾਈਕ੍ਰੋ ਕਾਰ ਵਿੱਚ ਦੋ ਲੋਕਾਂ ਦੇ ਬੈਠਣ ਦੀ ਵਿਵਸਥਾ ਹੈ। ਇਸ ਦਾ ਇੰਟੀਰੀਅਰ ਮਿਨੀਮਲਿਸਟ ਡਿਜ਼ਾਈਨ ਵਾਲਾ ਹੈ, ਜਿਸ ਵਿੱਚ ਹੈਕਸਾਗੋਨਲ ਸਟੀਅਰਿੰਗ ਵ੍ਹੀਲ, ਦੋ ਸਰਕੂਲਰ ਇੰਸਟਰੂਮੈਂਟ ਡਾਇਲਜ਼ ਅਤੇ ਕਸਟਮਾਈਜ਼ਡ ਕੈਬਿਨ ਦਿੱਤਾ ਗਿਆ ਹੈ।
ਸੰਭਾਵਨਾ ਹੈ ਕਿ ਇਸ ਵਿੱਚ ਆਟੋਮੈਟਿਕ AC ਅਤੇ ਟਰਨ-ਬਾਇ-ਟਰਨ ਨੈਵੀਗੇਸ਼ਨ ਵਰਗੇ ਫੀਚਰਜ਼ ਵੀ ਮਿਲਣ। ਹਾਲਾਂਕਿ, ਕੰਪਨੀ ਨੇ ਅਜੇ ਤੱਕ ਇਸ ਦੀ ਬੈਟਰੀ, ਰੇਂਜ, ਮੋਟਰ, ਕੀਮਤ ਅਤੇ ਲਾਂਚਿੰਗ ਬਾਰੇ ਅਧਿਕਾਰਤ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਹੈ।
